Paggamit nin mga Tract Tanganing Magkaigwa nin Kapakipakinabang na mga Resulta
1 An organisasyon ni Jehova sa modernong aldaw may kasaysayan nin epektibong paggamit nin mga tract. An mismong ngaran kan satong legal na korporasyon, Watch Tower Bible and Tract Society, nagpaparisa na an mga tract may mahalagang kabtang sa pagpalakop kan maogmang bareta. Poon 1881 sagkod 1918, labing 300 milyones na tract an iwinaras kan banwaan ni Jehova. An dakol sa mga nagin miembro sa natatada kan mga tugang ni Cristo kan panahon na idto enot na nakadangog kan katotoohan paagi sa enot na mga tract na ini.
2 Kan 1987 idinoon liwat an paggamit nin saradit na tract paagi sa pagluwas nin apat na makolor na mga tract na poon kaidto puwedeng makua. Ipinaisi sa “Mga Paradara nin Liwanag” na Pandistritong Kombension kan 1992 na an seryeng ini nin mga tract dudugangan nin apat pang makolor asin nakapupukaw nin isip na mga tract. An mga iyan iyo an Ranga Para sa mga May Depresyon, Maogma sa Buhay Pampamilya, Siisay an Tunay na Namomoon sa Kinaban?, asin An Kinaban daw na Ini Magdadanay? Ginagamit daw nindo an walong tract tanganing magkaigwa nin kapakipakinabang na mga resulta sa saindong ministeryo?
3 Nagkakaigwa nin marahay na mga resulta an epektibong paggamit sa mga tract. Kaipuhan na aramon niato an laog kan kada saro kaiyan. Halimbawa, binasa na daw nindo iyan nin maingat tanganing ikatanom sa isip an ipinaliliwanag kan kada saro? Naisip na daw nindo kun anong klaseng tawo an maaakit kan kada tract? An lubos na pakaaram sa laog kan kada tract maparigon sa saindong kompiansa sa paggamit kaiyan sa pagharongharong saka sa dakol na situwasyon na kamo makatatao nin impormal na patotoo.
4 Gamiton sa Ministeryo sa Harong-Harong: An sarong paraataman sa sirkito nagsurat: “Nagkakamit ako nin marahay na kapangganahan sa pagpopoon kan kadaklan sa sakong pakipag-olay paagi sa tract.” Naprobaran na daw nindo an paaging ini? Taano ta dai gumamit nin mga tract bilang paaging maponan an saindong pakipag-olay? Mantang walo an tract, igwa na kita ngonyan nin mapagpipilian na walong nakapupukaw na introduksion. An kada tract nagtatao sato nin oportunidad na makapoon nin pag-adal sa Biblia magsalang sa enot na pagdalaw o sa pagdalaw liwat.
5 Igwa pa nin ibang oportunidad sa paggamit kan mga tract. Sa pag-oolay, tibaad maaraman nindo na an tawo bago pa sanang magadanan nin sarong namomotan o na may naghehelang sa pamilya. An mga tawong nag-aagi sa makuring kamondoan o naghihingoang atubangon an naghahaloy na mga kasakitan sa parate tinutubuan nin negatibong mga saboot asin nagkakaigwa nin depresyon. Mamomoton nanggad na ihiras an nakapakokosog na mensahe na yaon sa tract na Ranga Para sa mga May Depresyon! Tibaad maaraman nindo na an tawo bago pa sanang makidiborsio o nawaran kan saiyang trabaho. An siring na mga eksperyensia puwedeng magin makologon asin makaapektar na marhay sa pamilya. Gamiton an mga hapot sa pahina 2 kan tract na Maogma sa Buhay Pampamilya: “Taano ta binobomba nin siring kaseryosong mga problema an mga pamilya ngonyan? Paano kita magigin maogma sa buhay pampamilya?” Tibaad ini mismo an mga hapot na nangingibabaw sa isip kan tawo. Dawa kun dai nin marisang interes sa oras na iyan, posible na basahon nia sa maabot an tract.—Ecl. 11:6.
6 Sa ibang kongregasyon parateng nahuhulitan an teritoryo, asin an dakol igwa na kan satong mga babasahon. Sa paggamit kan mga tract, magkakaoportunidad kitang ipakipag-olay an sarong interesante sa mga kagharong, dagkahon sindang ipahayag an nasa saindang boot, asin papag-isip-isipon sinda manongod sa paglaom sa Kahadean. Itanom sa saindang isip an sarong hapot na mapag-oolayan sa masunod. Dalawon liwat, asin patuboon pa an interes na ini. Pag-abot nin panahon tibaad maponan niato an pakikiadal sa sainda na ginagamit an sarong brochure o librong dati nang nasa sainda.
7 Gamiton sa Impormal an mga Tract: Kun permi kitang igwa nin mga tract—sa satong bulsa, pitaka, o bag—magagamit niato iyan sa dakol na laen-laen na okasyon, saen man may tawo. Gamiton iyan kun nagsasaod, nagbibiyahe, o nakikipag-olay sa mga paryentes o bisita. An mga tract nagtatao sato kan oportunidad na makatao nin halipot na patotoo. An tract bagay na dai nakabibigla sa tawo pero diretso sa punto asin mataktika. Iyan mas madaling akoon kisa libro o mga magasin, ta kakadikit kan babasahon.
8 Magin alisto sa mga oportunidad na impormal na ialok an mga tract sa eskuwelahan o sa saindong trabaho, sa mga restawran, gasolinahan, asin iba pa. Kan iinaareglo na darahon sa doktor an saiyang lolahon, sineguro nin sarong tugang na babae na may dara siang mga tract. Sa klinika kan doktor, nakapoon sia nin pakipag-olay sa sarong bados. Pakapahelingan kan tract na Life in a Peaceful New World sa babae, ihinapot kan tugang: “Gusto mo daw na padakulaon an aki mo sa kinaban na arog kan ipinaheheling digdi?” Nasundan nia an orolay na iyan nin pagsongko sa harong kan babae. Ini nagbunga nin nagkapirang regular na pagdalaw liwat.
9 Puwedeng Ponan an mga Pag-adal sa Biblia Paagi sa mga Tract: An sarong paraataman sa sirkito nagreport na an dinalaw niang kongregasyon nakapoon nin 64 pag-adal sa Biblia sa laog kan semana paagi sa paggamit nin mga tract sa enot na pagtaong galang sa kagharong.
10 Naprobaran na daw nindong mag-alok nin pag-adal sa Biblia sa enot na pagdalaw sa harong-harong? Sa paggamit nin tract, tibaad ikademonstrar nindo sa halipot kun paano an pag-adal. Ginibo ini nin sarong tugang na babae na ginagamit an tract na Life in a Peaceful New World. Itinotokdo an retrato, hinapot nia an kagharong kun sa paghona nia magigin arog pa kaiyan an daga. Pakasimbag kan kagharong, ipinabasa saiya kan tugang an 2 Pedro 3:13 asin Isaias 65:17, na natatampok sa tract. Dangan sinabi kan tugang: “An mga panugang ini bakong pangarap sana o imahinasyon kundi aktuwal na itinao sa Tataramon nin Dios, an Biblia.” Dangan inareglo nia na ipadagos an orolay sa masunod na semana. Kan sumunod na pagsongko, sinimbag an nagkapirang hapot kan babae asin ikinawalat an librong Puwede Kamong Mabuhay Sagkod Lamang sa Paraiso Digdi sa Daga. Pag-adal sa Biblia an ibinunga.
11 Saro daw kamong bagong mabautismohan o tibaad dai pa bautisadong parahayag na nagpopoon pa sanang magkaeksperyensia sa saindong ministeryo? Kun siring, tibaad boot nindong kaolayon an mga mas eksperyensiado asin hagadon an saindang mga suhestion sa paggamit nin mga tract sa teritoryo kan saindong kongregasyon. Kadakol niatong halimbawa sa Biblia nin mga nag-ako nin pagpakosog asin paggiya sa mga maygurang sa pagtubod.—Gibo 18:24-27; 1 Cor. 4:17.
12 An nangengenot sa Pag-adal sa Libro kan Kongregasyon nangorognang makatatabang sa pag-areglo na an iba tumabang saindo sa epektibong paggamit sa mga tract. An mga magurang may paninimbagan na tabangan an saindang mga aki na umoswag sa paghuhulit. An sarong hoben na Saksi tinokdoan kan saiyang mga magurang sa pag-alok kan tract na Life in a Peaceful New World. Kan kaiba kan saiyang ina sa pag-adal sa Biblia, inalokan nia nin tract an agom na lalaki kan interesado. Naghanga an lalaki na an sarong aki igwa na nin makosogon na relihiyosong mga paniniwala. Naogma siang marhay sa pagbasa kan tract. Kada bumalik an aki kaiba kan saiyang ina, ihinihiras nia an sarong teksto o estorya sa Biblia na inandam nia espesyalmente para sa saiya. Ngonyan an lalaki regular nang nagbabasa kan mga magasin, nagpaheling nin interes sa librong Revelation Climax, asin nag-atender na sa nagkapirang pagtiripon. Ini gabos nangyari ta an mga magurang nagtao nin panahon na asikasohon an saindang mga paninimbagan sa pagtokdo sa saindang aki na gamiton an mga tract.
13 Gamiton nin Epektibo an Bago Niatong mga Tract: Sa paggamit kan tract na An Kinaban daw na Ini Magdadanay?, puwede kamong magpamidbid asin ponan an orolay sa pagsabing: “Marahay na aga. Nakikipag-olay kami sa mga tawo manongod sa kuwalidad nin buhay ngonyan. Sa paghona daw nindo marahay an kuwalidad nin buhay, o iyan daw magpapadagos na bumaba? [Pasimbagon.] An paghona nin nagkapira an nangyayari sa kinaban ngonyan kaotoban kan hula sa Biblia asin harani na an katapusan kan kinaban. Ano sa paghona nindo?” Pakasimbag kan kagharong, ialok an tract asin darahon an atension sa tolong hapot sa ikaduwang parapo. Dangan sundan an paliwanag kan tract tanganing ipaheling kun paano may kinaban na natapos kaidto asin na ining kinaban ngonyan matatapos man. Sa katapusan kan pagsongko, iareglo an saro pang pagdalaw tanganing mapag-olayan an ebidensia sa Biblia na harani na an katapusan kan kinaban.
14 Sa dakol na beses namumugtak kita sa situwasyon na ikahiras an mensahe kan Kahadean sa iba sa halipot sanang panahon, arog sa trabaho o sa eskuwelahan. Sa saindong trabaho, tibaad pag-orolayan an bagong mga bareta manongod sa gobyerno. Puwede kamong umoyon na sa ibong kan gabos na paghihingoa nin mga namomoon na tibaad may marahay na intension, grabe an sakit na inagihan kan kinaban sa bilog na kasaysayan. Dangan basahon an parapo sa ibaba kan pahina 2 kan tract na Siisay an Tunay na Namomoon sa Kinaban? Basahon an tolong nakapagpapaisip na hapot. Kun mayo nin panahon para sa halipot na orolay, itao an tract asin gibohon an areglo na pag-olayan an mga hapot na ini sa ibang oras o lugar.
15 Bilang mga indibiduwal asin pamilya, tawan nin panahon an paghorophorop kun paano ikaaalok an kada saro sa laen-laen na tract na ini. Magpraktis. Paano daw nindo magagamit an mga tract kaiba kan ibang babasahon na itinatampok sa ministeryo sa langtad sa bulan na iyan? Ano an mga dudumanan nindo na puwede kamong magdara nin nagkapirang tract? May makakaolay daw kamo ngonyan na semana na makikinabang sa napapanahon na mga mensaheng itinatao kan mga tract na ini?
16 An hararom na pagkamoot ki Jehova asin pagmakolog sa mga tawo mamotibar sato na gibohon an gabos niatong makakaya na ikapahayag an maogmang bareta. An regular na paggamit sa mga tract matabang sato na gibohon iyan. An sarong aking lalaki, na siete anyos, gustong tabangan an saiyang kataed na makaabot sa bagong palakaw, kaya tinawan nia sia nin tract, asin naponan an pag-adal sa Biblia. Simplehon sana! Pero inaapresyar daw niato an simpleng paaging ini sa satong ministeryo? Sa sunod na magwalat kita nin tract sa sarong tawo, tibaad magbunga man iyan nin pag-adal sa Biblia. Kun madonong niatong gagamiton an mga tract sa paghuhulit kan maogmang bareta kan Kahadean, seguradong makaeeksperyensia kita nin kapakipakinabang na mga resulta.