Gamiton an mga Tract sa Pagpalakop kan Maogmang Bareta
1. Paano ginamit kan mga lingkod nin Dios an mga tract?
1 An mga tract na basado sa Biblia haloy nang ginagamit kan mga lingkod ni Jehova sa pagpalakop kan maogmang bareta. Kan 1880, pinonan ni C. T. Russell asin kan kairiba nia an pagprodusir nin Bible Students’ Tracts, asin itinatao ini sa mga nagbabasa kan Watch Tower tanganing idistribwir sa publiko. Para sa sainda, an mga tract mahalagang marhay kaya kan irehistro ni C. T. Russell kan 1884 an sarong legal na korporasyon na bakong komersial asin may katuyohan na palakopon an intereses kan Kahadean, an terminong “tract” iiniba sa ngaran na Zion’s Watch Tower Tract Society, na ngonyan inaapod na Watch Tower Bible and Tract Society of Pennsylvania. Pag-abot nin 1918, labi nang 300 milyones na tract an ikinadistribwir kan Mga Estudyante sa Biblia. An mga tract epektibo pa man giraray na gamit sa pagpatotoo.
2. Taano ta epektibo an mga tract?
2 Kun Taano ta Epektibo: An mga tract makolor asin nakakaakit sa paghiling. An mensahe kaiyan na deretso sa punto kawiliwili asin nakakapagtokdo. Nagugustohan iyan nin mga kagharong na tibaad habong magbasa nin magasin o libro. Pasil dawa sa mga aki asin bagohan na mga parahayag na ialok an mga tract. Dugang pa, iyan sadit asin madaling darahon.
3. Magsaysay nin personal o ipinublikar na eksperyensia na nagpapahiling kan kahalagahan nin mga tract.
3 Dakol an enot na nakaaram dapit sa katotoohan paagi sa sarong tract. Halimbawa, sarong babae sa Haiti an nakahiling sa tinampo nin saro sa mga tract niato. Pinurot nia iyan, binasa, asin maogmang nagsabi, “Nakua ko na an katotoohan!” Dangan, sia nagpa-Kingdom Hall, nagpoon na mag-adal sa Biblia, asin nabautismohan—gabos huli sa puersa kan Tataramon nin Dios na yaon sa sarong tract.
4. Ano an pasohan niato kun mga tract an alok para sa bulan?
4 Sa Harong-Harong: Huling an mga tract epektibong gamit sa pagpatotoo, iyan an magigin alok sa panapanahon, poon sa Nobyembre. An pasohan niato bako sanang manao nin tract kundi gamiton iyan sa pagpoon nin pakikipag-olay. Kun sia magpahiling nin interes sa enot na pakikipag-olay o pagdalaw liwat niato, puede tang idemonstrar an pag-adal sa Biblia gamit an librong Itinotokdo kan Biblia o iba pang publikasyon na ginagamit sa pag-adal. Paano niato iaalok an mga tract sa harong-harong? Laen-laen an laog kan kada tract, kaya kaipuhan tang magin pamilyar sa iaalok niato.
5. Paano niato iaalok sa harong-harong an mga tract?
5 An satong presentasyon maninigong ibagay sa teritoryo asin sa tract na gagamiton niato. Puede tang ponan an pakikipag-olay paagi sa pagtao kan tract sa kagharong. An magayon na cover posibleng marhay na makapukaw sa saiyang interes. O ipahiling niato an nagkapirang tract asin papilion sia kun arin an interesante sa saiya. Kun nasa teritoryo na dian an mga tawo nag-aalangan na magbukas nin pinto, kapotan an tract sa paaging mahihiling kan kagharong an cover, o maghagad nin permiso na may ilalaag kita sa irarom kan pinto asin na gusto tang madangog an opinyon nia dapit dian. Kun an titulo kan tract sarong hapot, hapoton sia kun ano an opinyon nia dapit dian. O magbangon kita nin sadiring hapot na makakapukaw nin interes asin makakaengganyar sa pag-oolay. Dangan basahon niato sa kagharong an sarong kabtang kan tract, na minapondo sa mga hapot tanganing dagkahon sia na sabihon an nasa boot nia. Basahon niato sa Biblia an angay na mga teksto. Pagkatapos na pag-olayan an nagkapirang kabtang kan tract, taposon niato an pag-oolay asin gumibo nin depinidong areglo na magbalik. Kun an kongregasyon parateng nagwawalat nin literatura sa mga harong na mayong tawo, puede kitang magwalat nin tract sa lugar na dai iyan mahihiling nin iba.
6. Paano magagamit an mga tract sa pagpatotoo sa tinampo?
6 Pagpatotoo sa Tinampo: Ginamit na daw nindo an mga tract sa pagpatotoo sa tinampo? An nagkapirang naglalakaw sa tinampo naghihidali kaya habong makipag-olay sa sato. Tibaad bakong madaling maaraman kun interesado sinda o dai. Imbes na tawan sinda kan pinakabagong mga magasin na dai aram kun baga babasahon ninda iyan, puede sindang tawan nin tract. Huling magayon an cover asin halipot an mensahe, an pagigin mapag-usyoso tibaad magpahiro sa mga tawo na basahon iyan kun may oras sinda. Siempre, kun dai man sinda naghihidali, puede tang ipakipag-olay an nagkapirang kabtang kan tract.
7. Magsaysay nin mga eksperyensia na nagpapahiling kun paano gagamiton an mga tract sa impormal na pagpatotoo.
7 Impormal na Pagpatotoo: Pasil an impormal na pagpatotoo gamit an mga tract. An sarong brother pirmeng may darang pira kaiyan sa bulsa nia kada mahale sa harong. Kun may nakakaolay sia, arog baga nin sarong kahera, inaalok nia ini nin tract na puede kaining basahon. Kan an sarong mag-agom mamamasyar sa New York City, naisip ninda na may mga makakaolay sinda hale sa laen-laen na nasyon. Kaya nagdara sinda kan buklet na Nations asin nagkapirang tract sa iba-ibang lenguahe. Dangan, kun may madangog sinda na nagtataram nin ibang lenguahe, arog baga nin nagtitinda sa bangketa o nakatukaw harani sa sainda sa parke o restawran, inaalok ninda sia nin tract sa sadiri niang tataramon.
8. Paano nakakaagid sa banhi an mga tract?
8 ‘Itanom Mo an Saimong Banhi’: An mga tract puedeng iagid sa banhi. An sarong paraoma dakol an isinasabwag na banhi huli ta dai nia aram kun arin dian an matubo asin masupang. An Parahulit 11:6 nagsasabi: ‘Itanom mo pagkaaga an saimong banhi, asin pagkahapon dai mo pagpahingaloan an saimong kamot: huli ta ika dai nakakaisi kun arin an orog karahay, kun baga ini kun baga idto, kun baga sindang duwa anas na marahay.’ Kun siring, padagos logod kitang ‘magwarak nin kadonongan’ paagi sa epektibong marhay na gamit na ini sa pagpatotoo.—Tal. 15:7.
[Blurb sa pahina 3]
Huling an mga tract epektibong gamit sa pagpatotoo, iyan an magigin alok sa panapanahon, poon sa Nobyembre