Kun Taano an mga Tract ta Mahalagang Marhay sa Satong Ministeryo Ngonyan
1 Sa Enero 1, 1991 luwas kan The Watchtower, pahina 30, igwang eksperyensia na an titulo “He Found a Tract on the Track.” Isinaysay kaiyan an sarong superbisor sa perokaril na nakakua nin saro sa satong mga tract na nakaipit sa riles. Binasa nia tolos an tract dangan sinabihan an saiyang manugang na lalaki: “Ngonyan nanompongan ko na an katotoohan!” Pareho sinda nagpedido nin dugang pang literatura asin inadalan iyan. Ngonyan, an labing sanggatos sa saindang mga gikan mga aktibo sa katotoohan.
2 Paggamit sa mga Oportunidad: An sarong hoben na Saksi narisa na an saiyang maestra sa eskuwelahan nagmomondo huli sa pagkagadan kan saiyang panugangan na babae. An hoben na tugang na babae nagsurat nin pagranga sa saiyang maestra asin isinabay an tract na What Hope for Dead Loved Ones? An maestra nagsurat nin pasasalamat dangan nakipag-olay sa satong hoben na tugang. An maestrang ini ngonyan regular na nag-aako nin mga magasin hale sa saiya.
3 An pirang parahayag na naghuhulit sa dalan na pasiring sa sarong sementeryo naheling an mga tawo na nagpipinta nin mga pantson. An mga parahayag inalokan sinda nin mga tract. An sumunod na aldaw piyesta opisyal na dakol na tawo an nagsosongko sa sementeryo, kaya an mga parahayag nagtirindog sa may tata kan sementeryo asin nag-alok nin mga tract. Labing kinyentos na tract an ikinapasakamot. Kan sumunod na taon, nagbuwelta an mga parahayag asin nagwaras nin labing sangribong tract. Binasa nin sarong lalaki an tract bago naghale asin nagsabi sa parahayag: “May saro na boot kong makabasa kan mensaheng ini. Puwede daw tabi akong makahagad nin saro pa?”
4 Kun impormal na nakikipag-olay sa iba, baga man mga estranghero o kamidbid, maninigong hingoahon niato na makasabi nin sarong punto na puwedeng gumiya pasiring sa pag-orolay sa saro sa walong tract na makukua niato ngonyan. Magigibo ini mantang nakikipag-olay sa kataraed, mantang namamakal o naghahalat sa sarong katagbo, o mantang nagsosongko sa mga paryentes.
5 Kun Taano ta Epektibo: An mga tract magagayon an kolor asin haralipot. An mga kagharong dai mabibigla, na nakamamateng obligadong magbasa nin halawig. Alagad, an mensahe malaman nanggad. An nagbabasa nakakukua nin solidong Makakasuratan na pagmansay sa tema kan tract. Pakaresibi kan tract na Life in a Peaceful New World, an sarong hoben na lalaki nagsabi: “Nungka akong nakadangog nin siring na nakapakokosog na impormasyon manongod sa kamugtakan kan kinaban!”
6 Nanompongan nin dakol na parahayag na an mga tract nakatatabang na makapoon nin pag-orolay sa pagharongharong. Kadakol na pag-adal na kinukonduktahan ngonyan an naponan paagi sa tract. Sa pahina 4 kaining An Satong Ministeryo sa Kahadean, igwa nin nagkapirang praktikal na suhestion kun paano epektibong gagamiton an mga tract. Iyo, an mga tract saradit pero mahalagang marhay na mga instrumento sa satong ministeryo.