Gamiton an mga Pulyeto sa Pagpoon nin mga Pakikipag-olay
1 Dai daw kamo maoyon na an epektibong pagpatotoo depende sa kadaklan sa saindong inisyatiba na pumoon nin mga pakikipag-olay? An angat iyo an pagsabi nin sarong bagay na makapupukaw kan interes nin saro asin madagka sa saiya na makipag-olay. Alagad paano ini epektibong magigibo?
2 Nanompongan nin dakol na parahayag na paagi sa pira sanang piniling marhay na tataramon, an pag-alok nin saro sa satong basado sa Bibliang mga pulyeto puedeng makapoon nin mga pakikipag-olay. Nakaaakit an mga titulo, asin magayon patin nakaaatraer an mga ilustrasyon. An sarong pulyeto dai nakapagagabat sa saro, na nagtatao nin impresyon na kadakol nin impormasyon na babasahon. Sa ibong kaiyan, kawiliwili an diretso sa puntong mga mensahe sa mga pulyeto asin puedeng gamiton na magiya pasiring sa pag-adal sa Biblia.
3 Ini an personal na nagin saboot nin sarong Saksi: “Sa sibot na kinaban na ini, parate na an mga tawo habong gumamit nin dakol na oras sa pagbasa, alagad an mga pulyeto igo na an laba tangani na makatao nin importanteng mensahe alagad bako man na gayong halaba tanganing sayumahan nin mga tawo bago pa ngani ninda iyan maheling. Nabasa ko an kadaklan sa mga pulyeto, asin sa katapustapusi nanodan ko an katotoohan.” Dai noarin man pagmenuson an puersa kan Tataramon nin Dios na ipinaliliwanag sa halipot, inimprentang mga mensaheng ini.—Heb. 4:12.
4 Apat na Pasil na Paagi: Dakol an nagin mapanggana paagi sa paggamit nin simpleng pagdolok. (1) Ipaheling sa saro an pira sanang pulyeto asin hapoton sia kun arin an interesante para sa saiya. (2) Pakapili nia nin saro, maghapot nin sarong iinandam na marhay na hapot na nagtatampok nin sarong pangenot na punto sa pulyeto. (3) Bilang simbag sa hapot, basahon an angay na parapo o teksto sa pulyeto. (4) Kun maghimate sa saindo, padagos na ipakipag-olay an mga laog kan pulyeto o buksan an sarong leksion sa brosyur na Kahagadan o sarong kapitulo sa librong Kaaraman na nagtatao nin dugang pang mga komento. Paagi kaini mahihimo nindong pumasiring tolos sa pag-adal sa Biblia. An minasunod na mga suhestion makatatabang sa saindo na mag-andam kun ano an sasabihon na ginagamit an apat na pulyeto.
5 An titulo kan pulyetong “Siisay an Tunay na Namomoon sa Kinaban?” puedeng iatubang bilang sarong hapot.
◼ Kun bilang simbag dian an kaolay nindo magsabing, “An Dios” o “Dai ko aram,” basahon an enot na duwang sentence sa pahina 2 asin an enot na parapo sa pahina 3. Itampok an 1 Juan 5:19 asin Kapahayagan 12:9. Baga man sia nagdududa o dai sa pag-eksister ni Satanas na Diablo o rinerekonoser nia an saiyang impluwensia sa kinaban, puede nindong sunodon an pangangatanosan na makukua sa irarom kan subtemang “Sarong Tanda Hale sa mga Kamugtakan sa Kinaban” tanganing ipadagos an pakikipag-olay. Kun may ipinaheheling na interes, alokon na ipaliwanag kun saen hale an Diablo, na ginagamit an mga punto sa pahina 3 asin 4 kan pulyeto.
6 An pulyetong “What Hope for Dead Loved Ones?” puedeng makapukaw tolos-tolos nin interes. Puede nindong ponan an pakikipag-olay paagi sa paghapot:
◼ “Sa paghona daw nindo maheheling pa giraray niato an satong nagadan nang mga namomotan?” Pakasimbag kan tawo, itokdo an ikaduwang parapo sa pahina 4 kan pulyeto asin basahon an Juan 5:28, 29. Dangan ipaliwanag na makatatabang kun masasabotan nia an impormasyon sa irarom kan enot na subtema sa pulyeto. Alokon na magkaibang pag-olayan iyan.
7 An pulyetong “Maogma sa Buhay Pampamilya” nakaaakit sa kadaklan na pamilya. Ginagamit iyan, puede nindong sabihon:
◼ “Maoyon gayod kamo na an pamilya sinasalakay ngonyan. Ano sa paghona nindo an magigibo tangani na mapakosog an bogkos nin pamilya?” Pakasimbag kan tawo, darahon an saiyang atension sa mga punto na nasa enot na parapo sa pahina 6. Pumili nin saro sa mga teksto na kinotar sa pahina 4 asin 5 kan pulyeto, asin ipaliwanag an kahulogan kaiyan. Dangan alokon nin daing bayad na pag-adal sa Biblia.
8 An pulyetong “Why You Can Trust the Bible” puedeng gamiton paagi sa pag-atubang na ini:
◼ “An kadaklan na tawo nakadangog na kan estorya manongod ki Cain asin Abel, na makukua sa enot na libro kan Biblia. An pagkasaysay sa Genesis nagtataram man manongod sa agom ni Cain. Napaghorophorop na daw nindo kun saen sia hale?” Gamiton an ultimong parapo sa pahina 2 kan pulyeto sa pagtao kan simbag. Ipaliwanag na tinatratar man kan pulyeto an importanteng mga komento sa Biblia dapit sa nakatagama para sa sato sa ngapit. Poon sa ikatolong parapo sa pahina 5, ipadagos an pakikipag-olay, na ginagamit an nagsusuportar na mga teksto.
9 An pagdistribwir kan mga pulyeto sa Biblia sarong haloy nang probado, epektibong paagi nin pag-atubang kan maogmang bareta. Huling iyan pasil darahon saen man kamo magduman, puede nindong gamiton iyan nin epektibo sa saindong paghuhulit sa mga pinto asin kun naghuhulit sa impormal na paagi. An mga pulyeto may importanteng kabtang sa pag-otob kan satong ministeryo. Seguradohon na magdara nin laen-laen na klase, asin biyong gamiton iyan sa pagpoon nin mga pakikipag-olay.—Col. 4:17.