Ano an Plano Nindo Para sa Abril?
1 An bulan nin Abril kapinonan nin panahon nin orog na aktibidad sa langtad para sa dakol sa sato. An panahon parateng marahay asin an mga nag-eeskuwela bakasyon, kaya an Abril marahayon na bulan para sa pagbugtak nin personal na mga pasohan nin orog na aktibidad sa ministeryo.
2 Anong mga areglo sa paglilingkod sa langtad an ginibo kan saindong kongregasyon para sa Abril? Magkakaigwa daw nin dugang na mga pagtiripon bago maglingkod, pati paghuhulit sa banggi? Liliwaton daw nindo an saindong iskedyul tanganing maaprobetsaran an mga areglong ini asin makaiba an iba sa paglilingkod sa langtad? Puwede daw nindong ipagilid nguna an ibang aktibidad na bako man na gayong mahalaga?
3 Apuwera sa pagsongko sa mga nag-atender sa Memorial, an Abril marahay man na panahon para sa orog na paghihingoa na dumanan an mga interesado na daing panahon na makipag-olay kan mga nakaagi. Minsan tibaad makapira na nindong prinobaran na magtao nin dagdag na patotoo, taano ta dai helingon an saindong rekord asin songkoon sinda liwat sa paghihingoa na pukawon liwat an saindang interes? Tibaad magin mabunga an pagsongko sa banggi.
4 Dakol an nag-areglo na mag-auxiliary payunir ngonyan na Abril. Kaiba digdi an nagkapira na may mga paninimbagan sa pamilya asin pati an nagkapira na may bilog na panahon na hanapbuhay. An kahagadan na 60 oras nangangahulogan nin 2 sanang oras kada aldaw sa laog kan bulan. Makakaiba daw kamo sa sainda sa Abril? May panahon pang itao an saindong aplikasyon.
5 Kun an mga kamugtakan dai minatogot saindo na mag-auxiliary payunir sa Abril, tibaad puwede nindong dugangan an saindong aktibidad sa paglilingkod sa langtad paagi sa pag-iba sa mga payunir asin iba pa na naghihingoa na dugangan an saindang ministeryo sa laog kan bulan. Makalalaom kamo na bebendisyonan ni Jehova an saindong mga paghihingoa. Paagi sa saiyang espiritu tatawan nia kamo nin kosog na maabot an saindong pasohan.—Tal. 20:18; 21:5a.