Maghulit Asin Magtao nin Lubos na Pagpatotoo
1 Bilang “poon asin komandante,” iinandam ni Jesus an mga disipulo nia para sa mahiwas na paghuhulit na mangyayari sa ngapit. (Isa. 55:4; Luc. 10:1-12; Gibo 1:8) Ilinadawan ni apostol Pedro an isinugo sa sainda ni Jesus sa mga tataramon na ini: “Pinagbotan nia kami na maghulit sa mga tawo asin magtao nin lubos na pagpatotoo na ini iyo an Saro na itinalaga nin Dios na magin hokom kan mga buhay asin gadan.” (Gibo 10:42) Ano an kalabot sa pagtao nin lubos na pagpatotoo?
2 Dakol kitang manonodan sa pag-estudyar sa halimbawa ni apostol Pablo. Kan nakikipagtipon sa kamagurangan na lalaki sa kongregasyon sa Efeso, pinagirumdom nia sinda: “Dai ako nagpogol sa pagsabi sa saindo kan ano man na bagay na kapakipakinabang ni sa pagtokdo sa saindo sa publiko asin sa pagharongharong. Kundi lubos akong nagpatotoo kapwa sa mga Judio asin Griego manongod sa pagsolsol sa Dios asin pagtubod sa satong Kagurangnan na si Jesus.” Minsan ngani napapaatubang mismo sa mga pagbalo, hiningoa ni Pablo na mapaabotan kan maogmang bareta an pinakadakol na mapupuede. Sia dai nakontento na ihiras sana an pundamental na mga katotoohan sa mga naghihinanyog sa saiya, kundi naghingoa siang itao an “gabos na hatol nin Dios.” Tangani na magibo ini, sia andam na maghingoa asin magsakripisyo. Sinabi pa nia: “Dai ko ibinibilang na mahal sa sako an sakong kalag sa ano man na paagi, tangani sanang matapos ko an sakong gibohon asin an ministeryo na inako ko sa Kagurangnan na Jesus, na lubos na magpatotoo sa maogmang bareta manongod sa dai na kutana maninigong kabootan nin Dios.”—Gibo 20:20, 21, 24, 27.
3 Paano niato maaarog ngonyan an halimbawa ni Pablo? (1 Cor. 11:1) Paagi sa paghanap sa mga maninigo na kasararo sa harong dawa kun kita mismo napapaatubang sa mga pagbalo, paagi sa pagmamaigot na mapaabotan kan maogmang bareta an mga tawo sa gabos na etnikong grupo asin lenguahe, asin paagi sa mahigos na pagkultibar kan interes na nanonompongan niato. (Mat. 10:12, 13) Ini nagkakaipo nin panahon, paghihingoa, asin pagkamoot sa mga tawo.
4 Puede daw Kamong Maglingkod Bilang Auxiliary Payunir? An mga bulan nin Marso, Abril, asin Mayo puedeng makapagtao nin marahay na oportunidad na kamo magtao nin lubos na pagpatotoo paagi sa pag-auxiliary payunir. Kanigoan kanakaparirigon sa boot na maheling kan nakaaging taon an kadakol na naggibo nin espesyal na paghihingoa na mag-auxiliary payunir!
5 An sarong 80 anyos na tugang na babae na dakol an problema sa salud napahiro kan pagparigon sa boot na itinao kan organisasyon ni Jehova. Sia nagsurat: “Pinukaw kaiyan an haloy nang panahon na pagmawot sa puso ko, asin ipinamate kaiyan sa sako na dapat talaga akong mag-auxiliary payunir nin kisuerra saro pang beses.” Nagdesisyon siang gibohon iyan sa Marso. “An enot na ginibo ko,” sabi nia, “iyo na tumukaw asin kuentahon an gastos. Ipinakipag-olay ko iyan sa sakong aking babae huli ta kakaipuhanon ko an tabang nia. Sinorpresa nia ako paagi sa pagkua man nin aplikasyon para saiya.” Durante kan bulan na iyan, an may edad nang tugang na babae naggamit nin 52 oras sa ministeryo. “Dakol na beses akong namibi ki Jehova na logod ibalik giraray an sakong kosog kun namamatean kong nauubos na iyan. Sa katapusan kan bulan na iyan, maogmahon asin kontento ako, asin pinasalamatan ko si Jehova nin dakol na beses sa pagtabang sako. Gusto kong probaran giraray iyan.” An maogma niang eksperyensia puedeng makaenkaminar sa iba na talagang boot na mag-auxiliary payunir sa ibong nin grabeng mga problema sa salud.
6 An sarong tugang na lalaki na dai linalaoman na hinale sa saiyang sekular na trabaho inaprobetsaran an situwasyon na iyan tangani na mag-auxiliary payunir. Mantang nagpapayunir sa bulan na iyan, sia napano nin kaigotan para sa paghuhulit, asin pag-abot kan katapusan kan bulan, nakapoon sia nin sarong bagong inaadalan sa Biblia. Sa paghorophorop kan eksperyensia, sia nagsabi: “Abaa kanakakokontentong bulan!” Ogmahon siang marhay huli sa paggiya asin tabang ni Jehova! Iyo, ibinubo sa saiya ni Jehova an mayaman na bendisyon huli sa dagdag na paghihingoa na ginibo kan tugang na ini sa ministeryo, asin gigibohon man nia iyan sa saindo.—Mal. 3:10.
7 Para sa dakol, bakong pasil an pag-auxiliary payunir. Minsan siring, sa ibong nin sekular asin pampamilyang mga paninimbagan saka personal na mga kadepisilan, dakol na tugang na lalaki asin babae an nakahimong gumibo kaiyan. Parateng kalabot sa pagtao nin lubos na pagpatotoo an pagsakripisyo kan satong mahalagang marhay na panahon asin kosog, alagad dai mapapantayan an mga bendisyon.—Tal. 10:22.
8 An Marso, Abril, asin Mayo marahayon na mga bulan na mag-auxiliary payunir. Igwa nin limang katapusan kan semana durante kan Marso asin igwa nin limang Sabado sa Mayo. Siring man, mga bulan ini nin bakasyon para sa mga nag-eeskuela. An pag-aprobetsar sa ekstrang mga katapusan kan semana asin mga piesta opisyal patin paghuhulit sa nagkapirang banggi puedeng magpagin posible sa nagkapirang nagtatrabaho nin bilog na panahon na makapag-auxiliary payunir. Tanganing makapag-iskedyul nin 50 oras sa ministeryo durante kan Marso, Abril, o Mayo, puede daw nindong gamiton an saro sa sampol nin mga iskedyul para sa auxiliary payunir na kaiba sa artikulong ini? Ipakipag-olay sa iba an iskedyul nindo; an nagkapira daing duda na maeenkaminar na umiba sa saindo sa ministeryo. Kun dai nindo kayang mag-auxiliary payunir, magbugtak nin espesipikong pasohan para sa mga bulan na ini, asin suportaran an mga kayang magpayunir. Magplano na kamo ngonyan para sa dinugangan na paglilingkod durante kan Marso, Abril, asin Mayo.
9 Ipaheling an Pag-apresyar Para sa Memorial: Kada taon durante kan panahon nin Memorial, an pagpasalamat sa pantubos nagpapahiro sa rinibo na ‘tuboson an panahon’ tangani na mag-auxiliary payunir. (Efe. 5:15, 16) Sa Pilipinas kan nakaaging taon, igwa nin 9,515 nag-auxiliary payunir kan Marso, 15,458 kan Abril, asin 12,652 kan Mayo. Iyan may promedyong 12,542 para sa kada saro kan tolong bulan na ini. Ikomparar iyan sa promedyong kabilangan na 1,691 na nag-auxiliary payunir durante kan kada saro sa nakaaging mga bulan kan taon nin paglilingkod. An panahon na ini nin Memorial saro pang marahay na oportunidad na ipaheling an satong sinserong pag-apresyar sa pantubos na atang ni Cristo paagi sa pagdagdag sa satong aktibidad sa ministeryo sa langtad.
10 Mantang nagdadangadang an Abril 16, horophoropon kun ano an kahulogan kan Memorial para saindo. Isip-isipa an mga pangyayari na suminagkod sa kagadanan ni Cristo asin an mga bagay na ikinapurisaw kan saiyang isip asin puso. Horophoropon man an kagayagayahan na ibinugtak sa atubangan ni Jesus asin kun paano sia natabangan kaiyan na matagalan an siring na pagmaltrato. Pensaron an saiyang katongdan sa presente bilang Payo kan kongregasyon, na nagdidirehir kan paghuhulit asin paggibo nin mga disipulo. (1 Cor. 11:3; Heb. 12:2; Kap. 14:14-16) Dangan ipaheling an saindong pag-apresyar sa gabos na ginibo ni Cristo paagi sa lubos na pakikikabtang sa paghuhulit sagkod na itinotogot kan saindong mga kamugtakan.
11 Enkaminaron an Iba na Lubos na Makikabtang: Paagi sa pagpartisipar sa paglilingkod bilang auxiliary payunir, an kamagurangan asin ministeryal na mga lingkod nasa marahay na kamugtakan na enkaminaron an iba. Kun naghuhulit kaiba kan mga parahayag sa ministeryo sa langtad asin kun nagsosongko sa pagpastor, may marahay sindang oportunidad na personal na tabangan an iba na lubos na makikabtang sa espesyal na aktibidad na ini. Logod na ipamibi niato gabos ini, sa siring dinadagdagan an puersa kan satong nagkakasararong paghihingoa sa pagtao nin lubos na pagpatotoo.
12 Minsan ngani an gabos na magurang sa kongregasyon asin ministeryal na lingkod makikikooperar sa mga areglo kan kongregasyon para sa dinugangan na aktibidad durante kan mga bulan nin Marso, Abril, asin Mayo, maninigo na magin interesado partikularmente an paraataman sa paglilingkod sa pagkoordinar kan pag-ebanghelyo. Maninigo niang organisaron an mga lugar, aldaw, asin oras nin paglilingkod sa langtad na kombenyente sa mayoriya kan mga parahayag asin ipaisi ini nin regular. Puedeng mag-areglo nin pagtiripon bago lumuwas sa paglilingkod sa nagkapirang laen-laen na oras durante kan aldaw, na tinatawan nin oportunidad an gabos na kakongregasyon na makikabtang sa manlaenlaen na klase nin paghuhulit. Puedeng kaiba digdi an paghuhulit sa komersial na teritoryo, paghuhulit sa tinampo, pagharongharong, mga pagdalaw liwat, asin paghuhulit paagi sa telepono. Dugang pa, maninigo niang iareglo na magkaigwa nin makukuang bastanteng suplay nin literatura, mga magasin, asin teritoryo durante kan mga bulan na iyan.
13 An alok sa Marso iyo an librong Kaaraman, na may pasohan na makapoon nin mga pag-adal sa Biblia. An marahay na mga suhestion sa pag-alok kan librong Kaaraman nagluwas sa suplemento kan An Satong Ministeryo sa Kahadean na Mayo 2002. An alok sa Abril iyo an mga magasin na Torrengbantayan asin Awake! Pagmaigotan na gamiton an isinuherir na mga pag-atubang na yaon sa “Kun Ano an Sasabihon Manongod sa mga Magasin.” Maninigo na an gabos gumamit nin panahon na mag-andam na marhay tangani na makatao nin lubos na pagpatotoo.
14 Kanigoan an kaogmahan niato na maghulit sa irarom kan pagdirehir kan Payo kan kongregasyon, si Cristo Jesus, asin magkaigwa kan pribilehio na ihiras sa iba an maogmang bareta! Mantang nagdadangadang an mga bulan nin Marso asin Abril, pagmaigotan niato giraray na gibohon iyan na mani satong pinakamarahay na mga bulan kasuarin man mantang kinukuyog niato an pagboot ni Cristo na maghulit asin magtao nin lubos na pagpatotoo.
[Kahon sa pahina 4]
Manlaenlaen na Paagi Para sa Pag-auxiliary Payunir sa Marso, Abril, Asin Mayo 2003
Aldaw Oras
Lunes 1 2 — — 2 —
Martes 1 — 3 — — —
Mierkoles 1 2 — 5 — —
Huebes 1 — 3 — — —
Biernes 1 2 — — — —
Sabado 5 4 3 5 6 7
Domingo 2 2 3 2 2 3
Marso 56 56 54 55 50 50
Abril 50 50 51 53 — —
Posible daw para saindo an saro sa mga iskedyul na ini?