Pagsuportar sa Programa nin Pagtogdok nin mga Kingdom Hall
1 Ngonyan an mga Kristiano nagpapadagos na asikasohon an espirituwal na pagtogdok na pinonan ni Jesus kaidtong mga 1,960 taon na an nakaagi kan ponan nia an pagtipon nin mga disipulo. (Mat. 4:17; 7:24, 25, 28; Juan 7:46) Abundang binendisyonan ni Jehova an gibohon na ini. (Tal. 10:22) Mantang ipinaiisi niato an Kahadean nin Dios, kita man nagtotogdok tanganing maasikaso an maabot na pagdakol.—Ecl. 11:6.
2 Taon-taon digdi sa Pilipinas mga 100 na bagong kongregasyon an naoorganisar, asin an mga ini nagkakaipo nin mga Kingdom Hall na mapagtitiriponan. Dugang pa, dakol na Kingdom Hall an saditon na o daan na o maluya an materyales kaya kaipuhan na salidahan. Sa laog kan nakaaging limang taon, labing 600 na bagong Kingdom Hall an itinogdok digdi sa Pilipinas huli sa areglong pagpautang sa Kingdom Hall. Ini itinatao nin Pondo sa Kingdom Hall, na nagkakaipo kan pagsuportar nin mga tugang sa bilog na kinaban. An marahayon na positibong kaisipan nin mga tugang sa pagsuportar sa pangangaipong ini mayaman na binibendisyonan.—Sal. 41:1; Tal. 19:17; Ecl. 11:1; Luc. 14:13, 14.
AN MAMOMOTON NA TABANG ITINATAO NIN DAKOL
3 An Pondo sa Kingdom Hall kan Sosyedad “pondong nag-iitok sana.” An boot sabihon, an nareresibing mga kontribusyon ibinubugtak sa kuwenta na ginagamit nin solamente sa pagpautang tanganing matabangan an mga kongregasyon sa saindang proyekto sa Kingdom Hall. Minsan ngani an nareresibing kuwarta ibinibilang na kontribusyon sa Pondo sa Kingdom Hall, iyan dai nagigin “regalo” tanganing matapos an sarong proyekto sa Kingdom Hall. Imbes, an kuwartang ipinautang sa mga kongregasyon dapat na bayadan. Mantang ginigibo ini an natitipon na bayad kaiba an nagpapadagos na kontribusyon hale sa mga kongregasyon ipinauutang man sa ibang kongregasyon para sa saindang mga proyekto sa pagtotogdok.
4 Kaoyon kan samong surat sa gabos na kongregasyon kan Enero 1, 1991, dakol na kongregasyon an regular na nagtabang paagi sa pag-aprobar sa mga resolusyon na nag-aautorisar na magkontribuwir sa Pondo sa Kingdom Hall. Minsan an mga nagbabayad nin utang sa saindang Kingdom Hall nagpapadara pa nin dugang na kontribusyon sa Pondo sa Kingdom Hall, sa siring ‘nagririsa, bako sanang sa personal na interes sa saindang sadiri, kundi siring man sa personal na interes kaidto man na iba.’ (Fil. 2:4) Ini marahayon nanggad asin inaapresyar. Minsan an kongregasyon nag-aprobar na sa sarong resolusyon, an kahon nin kontribusyon para sa Pondo sa Kingdom Hall na may marahay na lugar sa Kingdom Hall magpapangyari sa mga boot na boluntad na magkontribuwir sa pondo. An ano man na kuwartang ihinolog sa kahon na ini nin kontribusyon maninigong ipadara sa Sosyedad apuwera sa nasa resolusyon kan kongregasyon.
PAGSUSTENTO SA PAGTOGDOK NIN KINGDOM HALL
5 Kun an kongregasyon nag-iisip na magtogdok nin bagong Kingdom Hall, maninigong maingat na horophoropon kan kamagurangan an kakayahan kan kongregasyon na magbayad sa magagasto. (Luc. 14:28-30) Bakong madonong na utangon an bilog na halaga sa Sosyedad kundi enot maninigong gibohon an surbey tanganing maaraman kun (1) gurano an ikokontribuwir kan mga tugang tanganing makatabang sa pagbakal nin daga asin sa mga gastos sa pagtogdok, (2) gurano an mauutang sa lokal asin kun gurano an ilalawig kan mga pondo, asin (3) gurano an ikokontribuwir kan mga parahayag bulan-bulan tanganing mabayadan an ano man na kaipuhan na utang apuwera sa pag-asikaso sa dating mga gastos.
6 Girumdomon na mientras na mas dakol an matitipon sa lokal, mas kadikit an kaipuhan na utangon nindo sa Sosyedad kaya mas kadikit man an babayadan nindo bulan-bulan. Kun kaya kan kongregasyon na gastosan an pagbakal nin daga dangan hagadon an tabang kan Sosyedad para sa edipisyo, ini mas marahay. Minsan siring, dai mi isinasadol an pag-utang sa mga tugang, na linalaoman na bayadan iyan kan ipauutang kan Sosyedad kun iyan maaprobaran.
7 Pakatapos na madeterminaran an mga puntong ini, maninigo na ipakipag-olay kan kamagurangan an pinaplano nindang proyekto sa paraataman sa sirkito, na makatatao sainda nin hatol asin mga suhestion dapit sa proyekto. Kun an kongregasyon sumurat na sa Sosyedad para sa pag-utang, maninigong idugang kan paraataman sa sirkito an sarong surat nin rekomendasyon kun manongod sa pangangaipo asin pagkapraktikal kan proyekto. Itatao an pinansial na tabang kun may pondo na asin sono sa pangangaipo. Tabi mangnohon: Magpoon kan Setyembre 1, 1991 linimitaran kan Namamahalang Grupo an kantidad nin mga pondo na magagamit niato sa pagpautang sa Kingdom Hall huli sa pinansial na mga pangangaipo sa ibang lugar. Ini nangangahulogan na an aaprobaran sana mga paghagad nin utang na talagang kaipuhan, asin minsan an mga ini kaipuhan na maghalathalat bago magkaigwa nin supisyenteng pondo.
MADONONG NA PAGGAMIT SA ITINAONG PONDO
8 Oras na maresibi an inutang, maninigong organisaron an sarong komite sa pagtotogdok asin magkaigwa nin tamang pinansial na rekord nin gabos na transaksion. Maninigong parateng itao an report sa kongregasyon manongod sa gastos asin sa progreso kan pagtogdok. An kuwartang naresibi hale sa Sosyedad dai maninigong gamiton sa ano man na negosyo o sa pagpautang sa mga tugang. Ini kuwarta na itinagama sa sarong banal na katuyohan kaya dai maninigong gamiton sa ibang paagi.
9 Dakulang kuwarta an maeekonomiya paagi sa paggamit nin boluntaryong mga trabahador kun igwa. Kun an dakol na tugang sa kongregasyon panday, kantero, elektrisista, abp., an pagboluntaryo ninda kan saindang panahon asin abilidad makatatabang na mainaan na gayo an gastos sa proyekto. Narisa na an mga kongregasyon na naggamit nin dakol na bayadan na trabahador parateng madaling nauubosan nin kuwarta bago matapos an proyektong pinonan ninda.
10 An saro pang paagi na makaekonomiya iyo an pagpili nin simpleng disenyo na dai magigin mahal asin dai magkakaipo nin dakol na trabaho. An Sosyedad dai nagrerekomendar nin dakulaon na puwerta na may torre sa itaas, ta ini magastos asin dai kaipuhan. Dawa kun may bastanteng kuwarta an kongregasyon, bakong madonong na magkaigwa nin maluhong mga dekorasyon o mamahalon na disenyo. Bakong praktikal na magkaigwa nin magayonon na atubangan an Kingdom Hall dangan mag-ekonomiya sa mas mahahalagang bagay, arog baga kan mga kasilyas, literature counter, mga tukawan, abp.—Fil. 1:10.
11 An Sosyedad may simpleng mga disenyo na mahahagad nindo kun boot nindo asin ini makatatabang sa pagtogdok nindo nin Kingdom Hall. Kun magamit kamo nin lokal na arkitekto na magdisenyo kan edipisyo, seguradohon na sinusunod nia an paggiya kan komite sa pagtogdok, ta sa parate an mismong disenyo puwedeng magdeterminar sa kantidad kan edipisyo. Paagi sa paghale sa dai kinakaipuhan na mga disenyo asin paggibo kaiyan na simple sana, an magayon na Kingdom Hall ikatotogdok na bako man na gayong dakula an gastos.
KAIMBODAN SA PAGSUPORTAR SA PAGPAUTANG
12 An mga kongregasyon na daing utang ikapaheheling an saindang pagsuportar sa lakop sa kinaban na areglong ini paagi sa regular na pagkontribuwir sa Pondo sa Kingdom Hall. Arog kan nasambitan sa enotan, minsan an iba na may binabayadan na utang nagtatao nin dugang na kontribusyon sa pankinaban na pondo. Pero huli sa darakulang kantidad na ipinauutang ngonyan sa mga kongregasyon, an pinakamahalagang kontribusyon na ikatatao nin kongregasyon na may utang iyo an pagigin maimbod sa regular na pagpadara kan saindang bayad bulan-bulan sa Sosyedad. Mantang an satong kongregasyon pinaniwalaan nin pondo na magagamit nin temporaryo, sa katotoohan kita mga pinaniwalaan kan kuwartang iyan, asin arog kan sabi kan 1 Corinto 4:2: “An hinahanap sa mga pinaniniwalaan iyo na an tawo makuang maimbod.”
13 Kun an kongregasyon pinautang kan Sosyedad dangan dai nakabayad sono sa napagkaoyonan, ini sa katotoohan bakong pagpaheling nin mamomoton na espiritu, ta an kuwarta dai ikinababalik sa Sosyedad tanganing magamit sa pagtabang sa ibang kongregasyon. Aram niamo na an gabos magmamawot na ipaheling an saindang apresasyon paagi sa regular na pagkontribuwir tanganing mabayadan an utang.
14 Sono sa Kasuratan an pagtao nin pinansial na pagsuportar. An termino sa Hebreo na trinadusir na “kontribusyon” nangangahulogan “banal na kabtang.” (Ex. 25:2, Reference Bible, nota sa ibaba) Dai niato pinayayaman si Jehova paagi sa satong mga kontribusyon sa saiyang gibohon, pero sa paaging ini ipinaheheling niato an satong pagkamoot sa saiya asin sa satong mga tugang, asin binibendisyonan nia kita.—1 Cron. 29:14-17; Tal. 3:9.
15 Si Pablo nagsurat sa 2 Corinto 8:12: “Huli ta kun an pagigin andam yaon na, iyan orog nang inaako sono sa kun ano an nasa tawo, bakong sono sa kun ano an mayo sa tawo.” Marahay kun an gabos sa kongregasyon dinadagka na regular na magtagama nin sarong kantidad sono sa saindang kakayahan asin boot. (Ikomparar an 1 Corinto 16:1-4.) Si Tertullian nagsurat manongod sa enot na kongregasyon Kristiano: “Kada bulan an lambang saro nagdadara nin kadikit na kuwarta—o kun noarin nia gusto, asin kun gusto sana nia, asin kun kaya nia; ta mayo nin pinipirit; iyan boluntad na dolot.” Siyempre, kun an saro nanuga ki Jehova sa saiyang puso na tumao nin sarong kantidad bulan-bulan tanganing makatabang na mabayadan an utang sa Kingdom Hall, kun siring maninigo niang gibohon an “oyon sa napagdesisyonan nia sa saiyang puso,” na maimbod na inootob an saiyang panuga.—2 Cor. 9:7.
PAPAGDANAYON AN MAIGOT NA ESPIRITU
16 An gabos maninigong tawan nin komendasyon para sa saindang pagkamatinao sa pagsuportar sa Pondo sa Kingdom Hall. Dakol na kapahayagan nin pag-apresyar an nareresibi hale sa mga kongregasyon na nag-ako nin tabang, asin an ngaran ni Jehova napamumuraway sa komunidad na duman itinogdok an bagong mga Kingdom Hall. Huli sa areglong ini, nangyayari an “pagkasarama” sa mga kongregasyon. (2 Cor. 8:14) An dakol na saradit o mas dukhang mga kongregasyon nakatotogdok nin Kingdom Hall, na imposible kun mayo an areglo nin pagpautang.
17 Sa panahon kan pagtogdok nin bagong Kingdom Hall, an entusiasmo, kaigotan, asin positibong espiritu nakakokontribuwir sa kapangganahan kan proyekto. Maninigong magpadagos an espiritung iyan mantang pinagmamaigotan niatong tabangan an dakol pa na makiasosyar sa sato sa Kingdom Hall. An siring na kaigotan nagbubunga nin pagdakol kan mga nag-aatender sa pagtiripon asin kan pagtalubo kan kongregasyon.
18 Mantang padagos niatong pinahihiwas an satong ministeryo, na maigot na naghihingoa, daing duwa-duwa na mapapasatuya an bendisyon ni Jehova. (Luc. 13:24) Dai niato aram kun anong pagtalubo an naghahalat sato sa ngapit. Alagad kaipuhan na andam kitang akoon an ano man na lagduan na paglaog nin mga parasamba sa ngapit. Iyan nagkakaipo kan pag-andam niato ngonyan. Sa siring inaarang niato an padagos na bendisyon asin paggiya ni Jehova. Sa pagtogdok para sa ngapit, kita logod gabos magin mga trabahador na katabang ni Jehova—sa pisikal, materyal, asin espirituwal. Tunay na bebendisyonan nia kita mantang inaataman niato an mga naghihidaleng lumaog sa saiyang organisasyon na pan-Kahadean sa ultimong kabtang kan huring mga aldaw na ini.—Isa. 60:8, 10, 11, 22.