Mga Introduksion na Makapupukaw nin Interes
1 Ekspertong gayo si Jesus sa saiyang paggamit nin mga introduksion. Baga man nakikipag-olay sa dakulang grupo o sa sarong tawo, nakukua ni Jesus an atension kan saiyang mga paradangog paagi sa paglabot nin personal sainda. Ipinaheling nia an halaga kan saiyang tema sa saiyang mga paradangog.—Mat. 5:3-12; Luc. 20:25-37; Juan 4:7-30.
2 Kinakaipuhan an Patienot na Pag-andam: Tanganing mapukaw an interes sa satong mensahe, kaipuhan na iangay niato an satong mga introduksion tanganing ikalabot dian an indibiduwal, ikonektar iyan sa saiyang mga kahaditan, asin ipaheling kaiyan na an mensahe kan Kahadean personalmenteng makatatabang saiya.
3 Sa pag-andam para sa ministeryo, repasohon an pinakanahahaditan nin mga tawo sa komunidad. Ano an pagkakainteresan nin sarong hoben? Nin sarong gurang? Nin mga agom na lalaki, agom na babae, o mga magurang? Imbes na gumamit nin pararehong introduksion sa kada pinto, parateng mas epektibo na mag-andam nin nagkapirang introduksion asin magin andam na liwaton iyan mantang inoobserbaran nindo an reaksion kan mga kagharong. Pagdadanayon kaini an saindong pagdolok na bago asin interesante.
4 Durante kan bulan nin Pebrero, tibaad boot nindong gumamit nin pag-aatubang na arog kaini na dara an librong “Mabuhay Sagkod Lamang”:
◼ “Marahay na aldaw. Nakikipag-olay kami sa nagkapira sa satong kataed dapit sa mga kuwalidad na boot nindang maheling sa tawong namamahala sa iba. Puwede daw akong maghapot kan mga kuwalidad na hinohona nindong pinakaimportante? [Pasimbagon.] Aram daw nindo na sinasabi kan Biblia an mga kuwalipikasyon kan Saro na inaprobaran nang magin hade kan katawohan? Yaon iyan digdi sa Isaias 9:6, 7. [Basahon.] Ano daw sa paghona nindo an magigin klase nin buhay na sakop kan siring na hade?” Pasimbagon dangan darahon an atension sa librong Mabuhay Sagkod Lamang sa pahina 112 asin 113 tanganing pukawon an dugang pang pag-orolay.
5 Kun kamo nakikipag-olay sa mga pamilya, an minasunod na pag-aatubang tibaad epektibo kun itinatampok an librong Mabuhay Sagkod Lamang.
Pakatapos nin lokal na pataratara, puwede nindong sabihon:
◼ “Naobserbaran daw nindo na an pan-aroaldaw na mga kagipitan asin problema nag-aatubang nin tunay na angat sa mga pamilya ngonyan? [Pasimbagon.] Igwa daw kamo nin opinyon kun saen an mga pamilya makadodolok para sa marahay na sadol? [Pasimbagon.] Dinadara niamo an atension sa sinasabi kan Biblia manongod sa temang ini. Mangnoha an sinabi kan Kagpundar kan pag-aragoman sa enot na mag-agom.” Basahon an Genesis 1:28 dangan buksan an pahina 238 kan librong Mabuhay Sagkod Lamang asin ipadagos an saindong pag-orolay, na ginagamit an mga punto sa kapitulo 29.
6 Paagi sa pag-arog kan halimbawa ni Jesus sa pagkua nin interes asin paglabot sa mga nagdadangog sa pag-orolay, ipinaheheling niato an halaga kan espirituwal na mga bagay sa mga sadiosan an puso.