Pag-adal sa The Greatest Man Who Ever Lived
1 Durante kan semana nin Pebrero 8-14, poponan niatong pag-adalan an The Greatest Man Who Ever Lived sa satong mga Pag-adal sa Libro kan Kongregasyon sa apat na darakulang lenguahe. Maogmahon nanggad na repasohon an buhay asin ministeryo ni Jesu-Cristo! Mantang dinisenyo an libro na garo baga napalalaen sa iba pang libro na inadalan na niato, makatatabang na gayo an pirang giya.
2 Mayong mga numero an pahina kan libro, kaya ililista sa iskedyul na ipupublikar sa An Satong Ministeryo sa Kahadean poon sa sarong bulan an mga kapitulo na pag-aadalan, sa parate tolo o apat sa kada semana. An Kapitulo 35, 111, asin 116 haralawig asin babangaon an kada saro sa duwang pag-adal. Pakapabasaha sa sarong kuwalipikadong tugang na lalaki kan bilog na kapitulo (o kan bilog na subtema, arog kan kapitulo 35, 111, asin 116), mahapot an konduktor kan mga hapot sa katapusan kan kapitulo na katangod kan kapitulo o kabtang na binasa pa sana. An mga simbag bako perming sono sa pagkasunodsunod sa kapitulo. Kaipuhan na an halipot asin direktang mga komento basado sa materyal na pinag-aadalan.
3 Pakalihis kaiyan, sagkod na itinotogot nin oras, maninigong basahon an gabos na kasuratan na sinitar sa katapusan kan kapitulo. Puwedeng bangabangaon sa saradit na kabtang an haralabang kasuratan na sinitar tanganing matogotan an manlaenlaen na parahayag na makikabtang sa pagbasa, dangan puwedeng itao an mga komento sa binasa. Makatatabang an direktang mga hapot na inandam kan konduktor na paluwason an makahulogan na mga komento na nagpapaheling kun paanong an mga kasuratan na binasa konektado sa idinoon na sa libro. Maninigo na an gabos na hapot asin komento makatabang sa mga nag-aatender na isentro an atension ki Jesu-Cristo, sa saiyang buhay, asin sa saiyang mga tokdo.
4 Naglalaman an librong Greatest Man kan buhay ni Jesus sa kronolohikong pagkasunodsunod. An pagladawan sa mga pangyayari asin pagtanda kun saen an mga iyan nangyari puwedeng magin tunay na tabang na magirumdoman iyan. Kaya, siertohon na pag-olayan an makolor na mga ilustrasyon asin perming itokdo an mapa na maheheling sa enotan kan libro, na minasunod sa introduksion.
5 Kokonsideraron an introduksion kan libro sa enot na semana. Pakabasaha kan gabos na parapo sa subtema, maghahapot an konduktor nin angay na mga hapot na saiyang inandam. Aandamon an gabos kan enot na pag-orolay na ini para sa mga pag-adal na masunod durante kan maabot na taon. Madependeng gayo an grado nin kapangganahan kan pag-orolay sa materyal sa preparasyon kan gabos na nag-aatender. Nangorognang maninigong magin preparadong marhay an konduktor kada semana tanganing matabangan an grupo na mamidbid na marhay an pinakadakulang tawo na nabuhay kasuarin pa man, an satong Kagurangnan asin Paraligtas, si Jesu-Cristo.