An Pag-adal sa Libro kan Kongregasyon Pinatatalubo an Edukasyonal na mga Aktibidad
1 An Pag-adal sa Libro kan Kongregasyon igwa nin mahalagang kabtang sa edukasyonal na programa kan organisasyon ni Jehova. An mga grupo sa pag-adal sa libro kombenyente an lokasyon. Mantang an pag-adal yaon sa sainda mismong pagtaraed, mas napapasilan na umatender an mga interesado.
2 Ginigibo an paghihingoa na papagdanayon na sadit an kada grupo. Tinotogotan kaini an nangengenot na magtao nin personal na tabang sa kada saro. Kun an siisay man nadedepisilan sa pagsabot sa sarong punto, an nangengenot puwedeng ipakipag-olay iyan nin orog pa pakatapos kan pag-adal. Saro pa, sa sadit na grupo, mas dakol an makakapagkomento asin makakabasa nin mga teksto. Regular daw kamong nagkokomento? Pinagmamaigotan daw nindong sumimbag sa saindong sadiring tataramon? Mantang nag-aandam kamo, gamiton an saindong kakayahan sa pagsabot tanganing masabotan kun paano nindo personal na ikakaaplikar an mga punto sa leksion.—Heb. 5:14.
3 Paagi sa pag-obserbar sa mga paagi nin pagtotokdo na ginagamit kan nangengenot sa pag-adal, makakanood kamo kun paano magkokondukta nin mga pag-adal sa Biblia sa mas nakapagtotokdong paagi. Pakabasaha kan mga parapo kan sarong kuwalipikadong tugang na lalaki, pag-oolayan an mga hapot. Pagmamaigotan kan nangengenot sa pag-adal na humagad nin mga komento manongod sa mga teksto sa pagtabang sato na masabotan kun paano an mga iyan minaaplikar. (Ikomparar an Nehemias 8:8.) Kun beses tibaad magdagdag sia nin sarong halipot na komento o gumamit nin pantabang na mga hapot tanganing mapaluwas an sarong pangenot na punto. An ilustrasyon puwedeng makatabang sato na masabotan kun paano an leksion konektado sa satong buhay.
4 An mga nag-aatender sa pagtiripon sa ibang Pag-adal sa Libro kan Kongregasyon kadikit nanggad. Regular daw kamong nag-aatender? An areglo nin pag-adal sa libro saro sa mga paagi na dian ipinaheheling ni Jehova an saiyang pag-ataman sa sato. (1 Ped. 5:7) Boot nia kitang tumalubo sa kadonongan tangani kitang magin makosog sa espirituwal na paagi. Sa ibong na lado, gusto ni Satanas na paluwayon an satong espirituwal na pagtalubo tanganing magin dikit an kapakinabangan niato ki Jehova asin sa Saiyang organisasyon. Dai pagtogotan na mangyari ini! Togotan na aboton an saindong puso kan mainit, mamomoton na palibot sa dayupot na grupong ini asin pahiroon kamo na magpadagos sa pag-omaw ki Jehova.—Ikomparar an Salmo 111:1.
5 An mga pagtiripon para sa paglilingkod iinareglo sa kadaklan na lokasyon kan pag-adal sa libro. An nangengenot sa pag-adal sa libro sisiertohon na igwa nin igong teritoryo asin na igwa nin mangengenot sa langtad. An mga patiripon para sa paglilingkod sa langtad maninigong dai sumobra an lawig sa 10-15 minutos. An nangengenot puwedeng ipakipag-olay sa halipot an pan-aroaldaw na teksto kun iyan konektado sa satong paghuhulit asin magtao nin saro o duwang suhestion sa paglilingkod sa langtad o mag-atubang nin sarong halipot na demonstrasyon kan presenteng alok.
6 Pagmamaigotan kan nangengenot na ibanan an kada saro sa saiyang grupo, na nagtatao nin pagpapakosog asin pagsasanay.—Ikomparar an Marcos 3:14; Lucas 8:1.