Mga Paraataman na Nangengenot—An mga Konduktor sa Pag-adal sa Libro kan Kongregasyon
1 Marahayon na pribilehio para sa sarong kualipikadong magurang sa kongregasyon o ministeryal na lingkod na maglingkod bilang konduktor sa Pag-adal sa Libro kan Kongregasyon. An pag-asikaso sa espirituwal na mga pangangaipo kan mga kagrupo nia sarong magabat na paninimbagan. May tolong kategoriya an saiyang mga obligasyon.
2 May Kakayahan na Pagtotokdo: Nangangaipo nin maingat na pag-andam tangani na an konduktor sa Pag-adal sa Libro kan Kongregasyon makapagtao nin pakasabot sa grupo kada semana. Sia naghihingoang paoswagon an pagpahalaga sa materyal na pinag-aadalan. Imbes na sia mismo an magparakomento durante kan pag-adal, kun kinakaipuhan minapalataw sia nin dugang pang angay na mga hapot tangani na mapaluwas an pangenot na mga punto kan leksion. An angat sa saiya iyo na gibohon na interesante asin nakapagtotokdo an pag-adal patin ilabot an gabos sa pag-orolay. An saiyang katuyohan iyo na magparigon sa espirituwal, idoon an praktikal na halaga kan pag-adal, asin pangyarihon an materyal na makaabot pareho sa isip asin puso.—1 Tes. 2:13.
3 Nakatatabang na Pagpapastor: An konduktor sa Pag-adal sa Libro kan Kongregasyon “siring sa pailihan sa doros asin tagoan sa bagyo.” (Isa. 32:2) Sia talagang may pagmakolog sa gabos na kagrupo nia asin sinisierto nia na ikinatatao an espirituwal na tabang kun an saro sa mga inaataman nia nanluluya an boot.—Ezeq. 34:15, 16; 1 Tes. 2:7, 8.
4 Maigot na Pag-ebanghelyo: An konduktor sa Pag-adal sa Libro kan Kongregasyon maatom dapit sa paggibo nin praktikal na mga areglo na an gabos na kagrupo nia makapakikabtang nin lubos sa ministeryo sa langtad. Sia an nangengenot sa pag-ebanghelyo, na nakaaaram na an pagigin regular, kaigotan, asin entusiasmo na ipinaheheling nia sa paglilingkod mababanaag sa iba na nasa grupo. (Col. 4:17; 2 Tes. 3:9) Sa tamang panahon, hinihingoa niang makaibanan sa paglilingkod an kada miembro kan saiyang grupo. Kun boot niatong mapatarom an satong mga abilidad sa paghuhulit asin pagtotokdo sa ministeryo, an konduktor sa Pag-adal sa Libro kan Kongregasyon puedeng makatabang sa sato na maabot an satong pasohan.—1 Tim. 4:16; 2 Tim. 4:5.
5 Kita totoo nanggad na binendisyonan nin balaog na mga lalaking ini na pirmeng andam na magtao sa sato nin espirituwal na tabang asin mamomoton na suporta. (1 Tes. 5:14) Ipaheling logod niato an satong pagpahalaga sa marahayon na probisyon na ini hale ki Jehova paagi sa satong regular na pakikikabtang sa pag-adal sa libro asin sa satong fiel na suporta sa pag-ebanghelyo.—Heb. 10:25.