Gamiton nin Marahay an Daan na mga Libro
1 Sinaray nin tawo an minilyon na daan na libro sa mga libreriya sa gabos na lugar kan daga. Pero, anong daing katapusan na pakinabang an itinao kaiyan sa rasa nin tawo? (Ecl. 12:12) Orog pang marhay na may pakinabang an mga publikasyon na nakasentro an atension sa Kahadean nin Dios asin sa gigibohon kaiyan para sa katawohan. An kadaklan na kongregasyon may istak kan manlaenlaen na librong iyan na ipinublikar bago kan 1985. Ngonyan na Enero iaalok niato sa publiko an daan na mga librong ini, na espesyalmenteng itinatampok an librong Nagkakasararo sa Pagsamba asin an sadit na edisyon kan librong Mabuhay Sagkod Lamang.
2 Igwa Iyan nin Tunay na Halaga: Minsan ngani an nagkapira sa sato tibaad naghohona na an mga librong ini lipas na kun ikokomparar sa satong bagong mga publikasyon, dapat niatong girumdomon na iyan igwa nin Makakasuratan na katotoohan. An mensahe kan Kahadean na ipinaliliwanag kaiyan mahalagang marhay sagkod ngonyan asin, kun hihimateon, puedeng magin nagliligtas-buhay. (Juan 17:3) Kun siring, maninigo kitang magtao nin orog pang paghihingoa na gamiton nin marahay an daan na mga librong ini.
3 An nagdodoon kan halaga kaiyan iyo an eksperyensia nin sarong babae na nagmana nin nagkapirang daan na publikasyon kan Watch Tower sa saiyang lola. Hinapot nin sarong Saksi an babae kun aram nia an tunay na halaga kan mga publikasyon. Nagsimbag an babae: “Dai ko aram an halaga kaiyan, alagad paano ko maaaraman?” An babae nag-ako nin pag-adal sa Biblia, nakanood kan katotoohan, asin pakatapos kaiyan minahal na nia an libreriya kan saiyang lola. Nagin kanigoan kahalagang pamana an koleksion na iyan nin daan na mga libro!
4 Idistribwir Iyan: Dugang pa sa pag-alok kan daan na mga libro sa harong-harong, seguradohon na ialok iyan kun nagdadalaw liwat sa mga tawo na aram nindong naoogmang magbasa kan satong mga publikasyon, kabale an mga nagsusukribir sa An Torrengbantayan asin Awake! patin an mga nasa saindong ruta sa magasin. Para sa mga inaadalan nindo sa Biblia, an piniling daan na mga libro puedeng makapagtao kan impormasyon na makapahihiwas kan saindang pakasabot sa katotoohan. Dai paglingawan na kumua kan arin man sa daan na mga libro na mayo sa saindong personal na koleksion, nangorogna an mga librong Nagkakasararo sa Pagsamba asin Mabuhay Sagkod Lamang. Paagi kaini, makatitipon kamo nin napakikinabangan na marhay na teokratikong libreriya, na magagamit sa pagpaoswag kan saindong mga panahon nin personal na pag-adal.
5 Imbes na isaray an satong daan na mga libro, gamiton niato nin marahay an mga iyan tangani na mapahiro an mga tawo na nanonompongan niato na ‘matakot sa tunay na Dios asin otobon an saiyang mga togon.’—Ecl. 12:13.