Pag-aatubang kan Maogmang Bareta—Dara an Mas Naenot na mga Publikasyon
1 An pagdesisyon na sumamba sa Dios mahalaga. Iyan nangangahulogan kan satong buhay. Kun siring, an pagkua nin kaaraman asin kan kadonongan na iaplikar iyan kapakipakinabang na pasohan.—Tal. 23:23; Juan 17:3.
2 Tanganing magkamit nin kaaraman asin magtalubo sa kadonongan, kaipuhan na maigot niatong adalan an Tataramon nin Dios. Si Jehova abundang nagtatao nin kaaraman asin kadonongan sa mga odok na naghahanap sa saiya. Sa nag-aging mga taon, sia nagtao paagi sa saiyang organisasyon nin abundang publikasyon na nagpapaliwanag nin dakol na langtad nin kaaraman sa Biblia. An mga ini puwedeng magtao nin dakulang pakinabang sa dakol na dai pa nakakamidbid ki Jehova.
AN HALAGA NIN MAS NAENOT NA MGA PUBLIKASYON
3 Ngonyan na Pebrero, an dakol sa sato mag-aalok nin mas naenot na 192-pahinas na mga libro sa langtad. Mayaman an impormasyon sa mga librong ini na may espirituwal na halaga sa mga tawo. (Helingon an Mateo 5:14-16.) Kaya pagmaigotan niato na iwaras an gabos na mas naenot na libro na nasa istak kan satong kongregasyon sa bulan na ini.
4 An sarong tugang na babae renegalohan an saiyang daing pagtubod na agom nin sarong mas naenot na libro. Sagkod kan panahon na idto dai sia nagpaheling nin interes. Sa pagngalas kan tugang, tinapos niang basahon an libro sa saro sanang banggi. Nagparigon na gayo ini sa saiyang pagtubod kaya nag-atender sia sa suminunod na pagtiripon kan kongregasyon asin naghagad nin pag-adal sa Biblia. Sa laog nin tolong bulan, nakikabtang na sia sa ministeryo sa langtad asin ngonyan bautisado na.
MAGKAIGWA NIN POSITIBONG KAISIPAN
5 Dai pagmenuson an puwersa kan Tataramon nin Dios na itinatampok sa mas naenot na mga librong ini. Kun an saindong kongregasyon mayo nin mas naenot na 192-pahinas na mga libro, kun siring ikaaalok nindo an librong Worldwide Security o an arin man na iba mas nahuhuring 192-pahinas na mga libro sa kontribusyon na ₱14.00.
6 Kita logod gabos magkaigwa nin mabungang ministeryo paagi sa paghiras kan kaaraman gikan sa Tataramon nin Dios paagi sa mas naenot na mga librong ini!