An Espesyal na mga Kabtang kan Kombension Nakabobogkos
1 “Uya! Kanigoan karahay asin kanigoan kaogma na an magturugang mag-ontok na sararo!” (Sal. 133:1) Pagkadangog sa programa kan satong “Banal na Hustisya” na Pandistritong Kombension, an mga tataramon na ini nagkaigwa nin dagdag na kahulogan para sa pankinaban na kasararoan nin magturugang kan banwaan ni Jehova.
2 Kan itao kan kada espiker an nakapahihirong impormasyon, naogma kita na kita yaon duman asin nakapakikabtang. Asin kanigoan nanggad na kagayagayahan na makasaro kan kadakol na tugang sa pagkurahaw nin “Iyo!” sa mapuwersang Resolusyon!
3 Espesyal man an pagluwas kan may duwang tomong publikasyon na may titulong Insight on the Scriptures. Kanigoan kagayon kan mga ilustrasyon sa publikasyon na ini! Iyan makabobogkos nanggad sato sa pagsiyasat sa mga tema sa Biblia tangani na kita oroyon na magtaram manongod sa tunay na kahulogan kan Kasuratan!—1 Cor. 1:10.
4 Maogmahon nanggad an sorpresa kan Sabadong hapon kan iluwas an publikasyon na Revelation—Its Grand Climax at Hand! An may 320 pahina na librong ini matabang sato na mabogkos an satong isip sa kahulogan kan simbolikong mga tataramon sa ultimong libro kan Biblia.
5 Dai malilingawan an kagayagayahan sa pagsaysay nin mga misyonero sa saindang mga eksperyensia sa dakol na kombension. Inaapresyar nanggad niato an mga taon nin saindang maimbod na paglilingkod! Sa ibong nin nagluluyang salud, mga problema sa tataramon, asin pagtumang, pinahiwas ninda an paghuhulit sa hararayong kadagaan.
6 Tunay na binendisyonan kita ni Jehova nin labi sa linaoman niato. Ngonyan desisyon niato na magpatotoo manongod sa banal na hustisya sa dakol pang iba.