Magin Alisto na Ialok an Librong Bible Stories
1 Kanigoan an pagpasalamat niato sa mga babasahon sa Biblia na dayaday na itinatagama ni Jehova paagi sa saiyang organisasyon! Pinahahalagahan na gayo niato an espirituwal na kakanon na ini, ta mantang iyan binabasa niato nin maingat, nag-oorog an satong pag-apresyar ki Jehova asin sa saiyang mga katuyohan.
2 An personal na mga pakinabang na inaako niato nagpapahiro sato na ihiras sa iba an mararahay na bagay na satong nanodan. (Mat. 24:14) Minamawot na gayo niato na ikapasakamot an mga publikasyon kan Sosyedad sa pinakadakol na tawong mapupuwede. Ini nagpapangyari man sainda na manodan an mga katotoohan na laog kan mga publikasyon na ini sa Biblia. Kun kita nakapag-andam nin marhay asin alistong magsadiring boot na ialok an presenteng alok na libro, tibaad matabangan niato an ibang tawong sinsero na dumolok ki Jehova asin umiba sa sato sa paglilingkod sa saiya.
SA PAGHARONGHARONG
3 Ngonyan na Disyembre iaalok niato an librong Bible Stories sa kontribusyon na ₱48.00. Isinusuherir an bagong Topikong Mapag-oolayan na gamiton kapadis kan alok na ini, na may titulong “Taano ta Maninigong Basahon an Biblia?” Pakapahelingan sa kagharong kan mga pakinabang nia asin kan saiyang pamilya sa regular na pagbasa sa Biblia, puwedeng ialok an libro bilang simpleng paagi na maaraman an tema kan Biblia asin nangorogna para sa pagtotokdo sa mga aki.
4 Kun an tawo talagang sibot tibaad booton niato na dumiretso na sa pag-alok kan libro arog kan isinusuherir sa pahina 19 asin 20 kan librong Reasoning. Dangan puwede kitang gumibo nin areglo na bumuwelta sa mas kombenyenteng oras. Ini pagpapaheling nin konsiderasyon sa kamugtakan kan kagharong.
5 Ano an magigibo kun an tawo dati nang igwa kan librong Bible Stories? Taano ta dai iaplikar an prinsipyo sa 1 Corinto 3:6-9? Ikinatanom na an banhi. Gamiton an oportunidad na baribian iyan paagi sa pagtao nin dugang pang patotoo. O puwede nindong sabihon: “Naoogma ako na igwa na kamo nin kopya kan librong ini. Daing duwa-duwa na nagustohan nindong basahon iyan. Kun puwede, boot kong ipaheling kun paano kamo orog pang makikinabang sa libro. Pira sanang minuto ini.” Dangan idemonstrar kun paano niato inaadalan an Biblia sa tabang kan libro. Girumdoma, an pangenot niatong pasohan ‘gumibo nin mga disipulo.’—Mat. 28:19.
IMPORMAL NA PAGPATOTOO
6 Maninigo man kitang mag-alisto na ialok an librong Bible Stories sa mga bisita, paryentes, katrabaho, kaeskuwela, mga nanonompongan niato kun nananaod, asin an mga nasasabat niato sa pag-oltanan nin mga harong kun kita nasa paglilingkod sa langtad. Magplano patienot pa, na dara an libro tanganing ialok kun lumataw an siring na mga okasyon. Dakula an karahayan na magigibo paagi sa impormal na pagpatotoo.—1 Ped. 3:15.
7 An organisasyon ni Jehova nagtao sato nin dakol na mararahay na babasahon tanganing gamiton. An pagigin alisto sa mga oportunidad na ikaalok iyan makatatabang sato na pamurawayon an ngaran ni Jehova.—Sal. 34:3.