Madonong na Gamiton an Satong Basado sa Bibliang mga Babasahon
1, 2. Ano an saboot kan dakol na tawo manongod sa satong mga babasahon, asin anong hapot an pinapalataw kaini?
1 “Nagbabasa na ako nin mga publikasyon nindo poon pa kan 1965. Kinokonsulta ko an Biblia kun nagbabasa, asin an gabos na nasa mga babasahon nindo kaoyon kan Biblia. Haloy ko nang gustong maaraman an tunay na katotoohan manongod sa Dios asin ki Jesus, asin sadiosan kong masasabi na nanonompongan ko an tamang mga simbag paagi sa saindong babasahon asin sa Biblia.” Iyan an isinurat nin sarong lalaki sa opisina prinsipal kan Mga Saksi ni Jehova. Sa iyo man sanang surat, sia naghagad na adalan sa Biblia.
2 Arog kan mapagpasalamat na lalaking iyan, minilyon na tawo sa bilog na kinaban an nagpapahalaga sa mga pantabang sa pag-adal sa Biblia na itinatao kan “maimbod asin mapagmansay na oripon.” (Mat. 24:45) Kada taon, kadakoldakol na babasahon an pinoprodusir tanganing tabangan an mga tawong sadiosan an puso na “makaabot sa tamang kaaraman sa katotoohan.” (1 Tim. 2:4) Paano niato madonong na magagamit an satong basado sa Bibliang mga babasahon?
3. Paano niato malilikayan na masayang an mga babasahon?
3 Likayan na May Masayang: Sa laog nin sarong peryodo nin panahon, puedeng makatipon kita nin mas dakol na babasahon kisa sa talagang gagamiton niato. Ano an magigibo niato tanganing malikayan na masayang an satong mahahalagang publikasyon? Kaipuhan an pagigin mapagrisa kun nagkukua nin mga babasahon na gagamiton sa ministeryo. Imbes na magkua nin dakol na kopya nin sarong publikasyon na iaalok niato, puedeng magkua sana kita nin saro o duwang kopya asin magbuelta na sana para sa dugang pa pagkatapos na ikapasakamot an mga iyan. Malilikayan kaini na matipon sa satong harong an dakol na suplay nin babasahon. Siring man, kun igwa kita nin kadakol na magasin na dai ikinapasakamot, magigin angay sana na inaan an bilang kan kinukua niato.
4. Ano an puedeng gibohon kun an sarong kongregasyon may nakaistak na sobrang mga babasahon?
4 Nakaistak na Sobrang mga Babasahon: Kun an kongregasyon may nakaistak na sobrang mga publikasyon, an parakoordinar kan mga babasahon tibaad gustong ihapot sa ibang mga kongregasyon sa lugar na iyan kun magagamit ninda an ekstrang mga babasahon. Puedeng ialok kan mga parahayag an haloy nang mga publikasyon sa daing pagtubod na mga miembro kan pamilya, mga inaadalan sa Biblia, asin iba pa. An mga bagong asosyado sa kongregasyon tibaad gusto man na magkaigwa kan haloy nang mga publikasyon na ini para sa saindang personal na teokratikong libreriya.
5. Paano niato ikakapaheling na pinapahalagahan niato an satong mga babasahon?
5 Gusto niato na magibo kan satong mga babasahon an katuyohan kaiyan, arin na baga, an matabangan an sinserong mga tawo na makanood nin orog pa manongod sa makangangalas na mga katuyohan ni Jehova. Kun paanong si Jesus dai nagsayang nin natadang pagkakan pagkatapos na milagroso niang pakakanon an kadaklan, an satong pasohan maninigo man na gamiton sa pinakamarahay na paagi an itinataong mahalaga asin basado sa Bibliang mga babasahon. (Juan 6:11-13) An nagliligtas-buhay na mensahe na yaon sa satong mga publikasyon dai makakataros sa puso nin matanos an inklinasyon na mga tawo kun iyan magdadanay sa satong mga estante o sa satong bag. Kun siring, dapat na magin rasonable kita kun nagkukua nin mga babasahon para sa ministeryo asin madonong na gamiton iyan sa kapakinabangan kan iba.—Fil. 4:5.