Pag-aatubang kan Maogmang Bareta—Paagi sa Madonong na Paggamit sa mga Publikasyon
1 An programa sa espesyal na aldaw nin asamblea kan 1991 taon nin paglilingkod itinampok an orolay manongod sa “An Satong Ministeryo—Bakong Ordinaryo, Kundi Banal.” Idinoon kaiyan na an gibohon niato banal asin dai maninigong basangbasangon. Mantang an paggamit nin inimprentang babasahon sarong kabtang kan satong ministeryo, makapaheheling kita nin tamang paggalang paagi sa madonong na paggamit sa satong mga publikasyon.
2 Kan 1990 taon nin paglilingkod, an Sosyedad naggibo nin 678 milyones na magasin asin labing 51 milyones na Biblia asin libro na gagamiton sa pankinaban na langtad. Ini nagrerepresentar nin dakulaon na gastos kan idinusay na mga kayamanan, kaiba na an oras, kosog, asin kuwarta. Ano an pirang paagi na ikaparirisa niato an odok sa pusong pag-apresyar sa satong mga babasahon mantang ihinahayag niato an mensahe kan Kahadean sa mga may sadiosan na puso?
3 Personal Asin Pampamilyang Pag-adal: Sa Roma 2:21 sinasabi ni apostol Pablo: “Alagad, ika daw na nagtotokdo sa iba, dai nagtotokdo sa saimong sadiri?” Kun kita nagtatao nin panahon na basahon, pag-adalan, asin may pagngayongayong horophoropon an satong mga babasahon na basado sa Biblia, personal niatong ipinaheheling kun gurano an pagpahalaga niato sa napapanahon na probisyon ni Jehova na espirituwal na pagkakan paagi sa saiyang grupong mayordomo. (Luc. 12:42) An pakasunod sa ihinahayag na mga katotoohan nagpapangyari sato na mapatalubo an halangkaw na pagpapahalaga sa gabos na ipinaniwala sa sato ni Jehova. An mga aki kaipuhan man na tokdoan nin tama na apresyaron asin asikasohon an saindang mga babasahon, na dai iyan minamarkahan o sinusuratsuratan. Dugang pa, an satong mga babasahon dapat na papagdanayon na malinig asin areglado tanganing magamit sa langtad.
4 Likayan an Pagsayang: Tanganing magin tunay na kapakipakinabang, an satong mga babasahon kaipuhan na ikapasakamot sa mga naghahanap nin katotoohan, an boot sabihon, an mga tunay na interesado sa satong mensahe asin gibo. (Mat. 10:11) Kun siring maninigong likayan niato na masayang an satong mga babasahon, na dai pinababayaan na matambak sa harong an mga magasin, libro, o iba pang babasahon.
5 Mantang may petsa an mga magasin, limitado an panahon niato na ialok iyan bilang bagong mga luwas. Kaya kaipuhan an desididong paghihingoa na ikapaabot an mga magasin na ini sa mga interesado. Kun marisa niato na natatambak pa an satong mga magasin, tibaad marahay na liwaton an satong iskedyul na mas dakol na oras an gamiton sa pagwaras nin magasin. Sa paggibo kaini, ipinaheheling niato na kita maimbod na mga pinaniwalaan kan dai na kutana maninigong kabootan nin Dios.—1 Cor. 4:2; 1 Ped. 4:10, 11; ikomparar an Lucas 16:1, 10.
6 “Ipinaniwala” ni Jehova sa saiyang nagdusay na banwaan an magabaton na paninimbagan asin gibohon, kaiba na an mga “rogaring” na dian may autoridad an saiyang maimbod na “mayordomo.” (2 Tim. 1:12; Luc. 12:42-44, 48b; 1 Tim. 6:20) May hararom na pag-apresyar sa satong mga pribilehiyo sa paglilingkod sa Dios, padagos logod niatong gamiton nin madonong an satong mga publikasyon sa pag-aatubang kan maogmang bareta sa iba.