Dai Pagsayangon an mga Publikasyon Niato
1. Paano niato maaarog an halimbawa ni Jesus sa pagpahalaga sa mga probisyon ni Jehova?
1 Pagkatapos na milagrosong pakakanon ni Jesus an sarong dakulang kadaklan, ipinagboot nia na tiponon an natadang kakanon. (Mat. 14:19-21) An siring na pagpahalaga sa mga probisyon ni Jehova nagtatao sa sato nin marahay na halimbawa na ‘ipaheling niato na kita mapagpasalamat’ paagi sa dai pagsayang kan gabos na itinatao ni Jehova paagi sa “maimbod na mayordomo.”—Col. 3:15; Luc. 12:42; Mat. 24:45-47.
2. Paano niato malilikayan na matambak an mga magasin?
2 Mga Magasin: An mga magasin madaling matambak. Kun pirme kitang may tadang mga magasin, maninigo niatong inaan an mga magasin na satong pinepedido. Paano man an daan na mga magasin? Dai nawawara an halaga kaini sa paglihis nin panahon. Kun may tambak na kitang daan na mga magasin, tibaad makatabang sa sato an paraataman sa paglilingkod o an saro pang magurang sa kongregasyon na makagibo nin epektibong mga paagi na ikapasakamot iyan.
3, 4. Anong mga punto an maninigo niatong isaisip kun kita nagkukua nin literatura sa Kingdom Hall?
3 Iba Pang Literatura: Kun nagbago an alok na publikasyon, helingon nguna kun igwa na kamo sa saindong harong nin mga kopya kan publikasyon na magagamit sa paglilingkod sa langtad bago magkua nin dagdag na mga kopya kan literatura sa Kingdom Hall. Isaisip na an kukuanon sana iyo an kaipuhan na kopya para sa semana, asin magbalik na sana sa literature counter para sa dagdag na kopya kun ikinapasakamot na an kinuang literatura.
4 Kun manongod sa mga publikasyon na gagamiton nindo nin personal, pedidohon sana an talagang kaipuhan nindo. Isurat an saindong ngaran sa espasyong itinao. Makakatabang iyan sa saindo na dai mawara an personal na kopya nindo. Kun naggagamit kamo nin Watchtower Library sa CD-ROM asin kun naingatan nindo an saindong personal na kopya kan mga magasin, tibaad dai na nindo kaipuhan na magpedido nin personal na kopya kan mga bound volume kan Watchtower asin Awake!
5. Ano an maninigo niatong girumdomon kun ipinapasakamot an satong mga publikasyon?
5 Pagpasakamot nin mga Publikasyon: Pinagmamaigotan niato na ipasakamot an satong mga publikasyon solamente sa mga nagpapaheling nin tunay na interes. Girumdomon na kita an may pangenot na paninimbagan sa gastos kan mahalagang mga kasangkapan na ini sa satong ministeryo. Kun nagwawalat nin publikasyon sa mga interesado, dai mag-alangan na sabihon sa sainda an pribilehio ninda na suportaran an pambilog na kinaban na gibohon paagi sa saindang donasyon.
6. Taano ta pinapahalagahan niatong marhay an satong mga publikasyon, asin huli kaini, ano an dapat niatong gibohon manongod dian?
6 Si Jesus milagrosong nagtao sa iba nin literal na kakanon, alagad sia mas parateng nagpakakan sa mga tawo sa espirituwal na paagi. Si Jesus nagsabi: “An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.” (Mat. 4:4) An satong mga publikasyon nagtotokdo nin mga katotoohan sa Biblia na mahalagang marhay sa pagkamit nin buhay na daing katapusan. (Juan 17:3) Mahalagang marhay nanggad iyan kaya dapat na dai pagsayangon iyan!