Areglo nin Pag-adal sa Libro kan Kongregasyon
Kabtang 4: Padagos na Magpakinosogkosogan
1 An kada saro sa grupo nin Pag-adal sa Libro kan Kongregasyon puwedeng magkaigwa nin makahulogan na kabtang sa espirituwal na pagtalubo nin iba sa grupo. Boot niato gabos na kuyogon an Makakasuratan na pagboot na ‘magpasaradolsadol kita sa pagkamoot asin sa marahay na mga gibo, lalo na ta an aldaw harani na.’—Heb. 10:24, 25.
2 Pagtinabangan: Kun an lambang saro sa sato nagpapaheling nin personal na interes sa ibang miembro, nagkakaigwa nin mainit, makikatood na espiritu sa grupo. Sa Galacia 6:10 sinasabihan kita na “gumibo kita nin marahay sa gabos, alagad orog na sa mga may relasyon sa sato sa pagtubod.” Halimbawa, naririsa daw nindo kun an iba sa pag-adal sa libro may helang asin mayo sa pagtiripon? Tibaad puwede nindo sindang kaolayon sa telepono o personal na songkoon. An siring na espiritu sa grupo nin pag-adal sa libro ginigibong orog na dayupot an mga tugang.
3 An iba daw nagkakaipo nin pagpakosog huli sa mga pangigipit sa aroaldaw, mga paninimbagan sa pamilya, o iba pang problema? Ano daw an magigibo nindo tanganing makatabang? Gumibo nin espesyal na paghihingoa na kaolayon an iba sa pagtiripon, bako sanang taratarahon sinda. An iba tibaad masosopgon pero naghahanap nin makakaolay. (uw p. 137-8) Dinagka ni apostol Pablo an mga Kristiano na “rangahon an mga kalag na nagmomondo, tabangan an maluya, magin matinios sa gabos.” (1 Tes. 5:14) Kun may naghehelang o nanluluya an boot, nakararanga nanggad kun an mga katood minasongko o minatabang! Sa parate, an kaipuhan sana maaraman na may nagmamakolog.
4 Boot man niatong magkooperar sa mga areglo sa paglilingkod sa langtad. Maninigong pagmaigotan niato na laen-laen an makaiba sa grupo. (2 Cor. 6:11-13; 12:15) Kun beses tibaad pakiolayan kita kan nangengenot sa pag-adal sa libro na tabangan niato an saro. Ano an reaksion niato? An grupo nin pag-adal sa libro napakokosog na gayo kun an mga parahayag asin payunir nagtatarabang sa ministeryo.
5 Personal na Halimbawa: Igwa pa nin ibang paagi na kamo makakokontribuwir sa areglo nin pag-adal sa libro. Mahalaga an saindong marahay na halimbawa. Halimbawa, kun an sulot nindo kapareho kun kamo maatender nin pagtiripon sa Kingdom Hall, nagpapaheling kamo nin paggalang. Nagtatao kamo nin positibong halimbawa sa mga tibaad ugale nang maggubing nin kaswal. Ginigibo daw nindong ugale na umabot nin nasa oras tanganing dai makaistorbo sa pagtiripon?
6 An Pag-adal sa Libro kan Kongregasyon lugar na dian kita makakukua nin personal na tabang asin makakokontribuwir man sa espirituwal na kaginhawahan nin iba. Kita logod gabos ‘padagos na magparangaranga asin magpakinosogkosogan’ paagi sa lubos na pagsuportar sa areglong ini.—1 Tes. 5:11.