Mag-otob sa Diosnon na Debosyon Arog ni Cristo
1 An ekspresyon sa Biblia na “diosnon na debosyon” nanonongod sa satong hararom na paggalang ki Jehova Dios asin maimbod na paglilingkod sa saiya. An pangenot na arogan nin diosnon na debosyon iyo an satong Kagurangnan na si Jesu-Cristo.
2 Paagi sa saiyang pamumuhay digdi sa daga, ipinamidbid ni Jesus an saiyang sadiri bilang tawo na may sangkap na diosnon na debosyon. Kaya, marahay na horophoropon niato an pirang bagay manongod sa saiyang buhay, nangorogna idtong may koneksion sa saiyang katongdan bilang pangenot na representante ni Jehova Dios.
3 Magin Maigot Asin Mapuso: Maigot si Jesus sa pagpahayag kan inaapod kan Isaias 61:2 na “taon nin marahay na boot ni Jehova.” Sa pag-arog ki Jesus, kita maninigong maigot na makikabtang sa nagliligtas-buhay na gibohon na ini sa huring mga aldaw kan maraot na palakaw na ini nin mga bagay. Kaipuhan na mapuso man kita kapareho ni Jesus. Taano? Huli ta an mensahe kan Kahadean na ibinabalangibog niato malanit asin ikinaaanggot nin iba, nangorogna kun kita nagtataram manongod sa aldaw kan pamalos ni Jehova.
4 Tanganing matabangan kita na magtaram na may kapusoan asin magpaheling nin diosnon na debosyon, kaipuhan niato an espiritu asin paggiya ni Jehova. Sa Lucas 4:18, sinasabi ni Jesus: “An espiritu ni Jehova yaon sako.” Paagi sa espiritu asin bendisyon ni Jehova, puwede man kitang mag-otob sa diosnon na debosyon asin makapaogma ki Jehova. An pag-otob sa sarong bagay nangangahulogan nin pagin nang ugaleng gibohon iyan. Iyan nangangahulogan na an sarong bagay iyo na an nagin satong pan-aroaldaw na dalan nin buhay. An diosnon na debosyon kaipuhan na magin dalan nin buhay para sa mga lingkod nin Dios. Si apostol Pablo nagsabi: “Kaya, kamo man nagkakakan o nag-iinom o ano man an saindong ginigibo, gibohon an gabos na bagay sa ikamumuraway nin Dios.”—1 Cor. 10:31.
5 Diosnon na Debosyon, an Satong Dalan nin Buhay: An Disyembre panahon nin mga kombension asin bakasyon. Alagad kaipuhan na dai niato malingawan an padagos na pangangaipo na arogon si Cristo paagi sa pag-aprobetsar sa mga oportunidad na ihiras sa iba an maogmang bareta. Mantang ginigibo niato ini, irinirekomendar na itampok niato an librong Bible Stories sa satong ministeryo sa langtad saka sa impormal na pagpatotoo. Marahay na magdara kamo kun kamo magbibiyahe o magsosongko sa mga katood asin paryentes.
6 Kita gabos maatender sa “Mga Mamomoton sa Katalingkasan” na Pandistritong Kombension. Pakalihis kaiyan, marahay na repasohon niato an satong mga nota tanganing helingon kun anong mga punto an nanodan niato asin ikaaaplikar sa satong buhay tanganing makaotob sa diosnon na debosyon. Puwede man niatong ipakipag-olay sa satong pagtaraed o kapamilya an espirituwal na pagkakan na inako niato sa kombension.—Efe. 4:25.
7 An kaiba sa satong dalan nin buhay bako sanang pagbalangibog kan aldaw nin pamalos asin taon nin marahay na boot ni Jehova kundi siring man an pagpaheling nin diosnon na debosyon sa satong personal asin pampamilyang buhay. Kaipuhan na arogon niato si Jesus, na tinotokdoan an iba paagi sa halimbawa kun ano man nanggad an diosnon na debosyon. Paagi sa pag-arog sa halimbawa ni Cristo sa diosnon na debosyon, permi kitang naghihingoa na magkaigwa kan tamang motibo sa gabos niatong ginigibo, na inoomaw si Jehova asin pinatutunayan na kita saiyang maimbod na mga lingkod.