Magin Bilog na Kalag sa Ministeryo sa Langtad
Kabtang 5: An Nagsosopay na mga Pakinabang sa Bilog na Kalag na Paglilingkod
1 Si Jehova nagtatao nin dakol na nagsosopay na pakinabang sa saiyang mga lingkod na bilog na kalag. (Sal. 116:12) Paano daw kita magkakamit nin kompletong sokol nin mga bendisyon gikan ki Jehova sa satong ministeryo? Ano an dapat niatong gibohon tanganing makaseguro kita sa saiyang pag-oyon asin pabor?
2 Kaipuhan an Personal na Paghihingoa: Mapadapit sa ministeryo, si Pablo nagsurat: “An lambang saro maako kan saiyang balos sono sa saiyang pagpapagal.” (1 Cor. 3:8) Kun siring makikabtang kita sa ministeryo sa pinakalubos na mahihimo niato. Si apostol Pablo nagkamit kan personal na balos na matabangan an dakol, pati bilog na mga kongregasyon, na makamidbid sa Dios. Kanigoan na kagayagayahan an namatean nia sa pagmamasid sa saindang karigonan sa pagtubod! (1 Tes. 2:19, 20) Posible na dai nindo kayang gibohon sa ministeryo an arog kan ginibo ni Pablo. Pero, bako daw na dakulaon na bendisyon an matabangan an saro na magin marigon sa dalan pasiring sa buhay? Ini dakulaon na pandagka na magmahigos sa ministeryo sa harong-harong asin pasundan iyan nin mga pagdalaw liwat asin pag-adal sa Biblia!
3 Dugang Pang mga Pakinabang: An daing kaagid na pakinabang sa bilog na kalag na paglilingkod iyo na, bilang katabang, an saro orog na nakararani ki Jehova asin ki Jesu-Cristo. (Mat. 11:29, 30; 1 Cor. 3:9) Kanigoan na kagayagayahan na mamatean an pagtabang saindo kan espiritu nin Dios sa ministeryo! (Mat. 10:20; Juan 14:26) Dugang pa, an maimbod na pakikipagtabangan sa iba sa kongregasyon nagpapakosog sa bogkos kan satong pagkamoot asin pagkasararo.
4 Dai niato makakamtan an lubos na mga pakinabang gikan ki Jehova kun dai niato lubos na susuportaran an organisasyon na ginagamit nia sa pag-otob sa saiyang kabotan sa huring mga aldaw na ini. (Ikomparar an 2 Hade 10:15.) Kun kita bilog na kalag na nagkukuyog sa paggiyang inaako niato paagi sa pinakapaagihan nin Dios asin aktibo sa mga aktibidad kan kongregasyon, natatawan kita nin espirituwal na proteksion sa tusong mga pakana ni Satanas.
5 An may limang kabtang na seryeng ini nin mga artikulo manongod sa pagigin bilog na kalag sa ministeryo sa langtad nagtampok nin nagkapirang bagay na kalabot. Nagigirumdoman daw nindo kun paano pakokosogon an pag-apresyar ki Jehova, na nagmomotibar sato na magin bilog na kalag? (Agosto) Taano ta kaipuhan an pag-andam tanganing kumosog an entusiasmo sa ministeryo sa langtad? Paano kita makapag-aandam? (Setyembre) Paano matatabangan nin eksperyensiadong mga parahayag an iba na magin bilog na kalag? (Oktubre) Paano an marahay na personal na pag-organisar makatatabang sato na magin bilog na kalag sa ministeryo? (Nobyembre) Iinaaplikar daw nindo an mga suhestion na ini?
6 Makasisierto kamo na mantang kamo maimbod sa paghihingoa sa gibohon, ini mamamasdan ni Jehova asin “mag-aako kamo kan tamang balos nin pamana,” an buhay na daing katapusan.—Col. 3:23, 24.