Magin Bilog na Kalag sa Ministeryo sa Langtad
Kabtang 4: Organisado Tanganing Epektibong Mahaman an Satong Ministeryo
1 An bilog na kalag na ministeryo sa publiko nagkakaipo nin marahay na personal na organisasyon. Si Jesus asin an saiyang mga disipulo nagtao nin pambihirang arogan para sa satong ministeryo ngonyan. (Luc. 10:1, 2; Gibo 5:42; 2 Tim. 4:5) Pero paano daw kamo magigin orog na organisado asin magkakamit nin kaagid na marahay na mga resulta ngonyan?
2 Mag-iskedyul nin Panahon Para sa Paglilingkod sa Langtad: Tanganing maorganisar an satong ministeryo nin epektibo, kaipuhan na magtagama kita nin panahon para sa laen-laen na kabtang kaiyan. (Efe. 5:15, 16) An dakol na parahayag nakarisa na nakatatabang na magbugtak nin pasohan kun pirang oras an idudusay ninda sa ministeryo kada bulan. Parate na hinahagad kaini na areglaron ninda an saindang mga gibo-gibo tanganing makapakikabtang sa paglilingkod sa langtad kada semana. An mga magurang na Kristiano maninigong tabangan an saindang mga aki na mag-iskedyul nin panahon para sa regular na pakikikabtang sa laen-laen na kabtang kan ministeryo sa langtad.—Deut. 6:7; Tal. 22:6.
3 Magbugtak nin Determinadong mga Pasohan: An realistikong mga pasohan nakatatabang sa pagkaotob kan saindong ministeryo. Kun maotob an saindong pasohan, makakaeksperyensia kamo nin kagayagayahan sa pakahaman kaiyan. (Tal. 13:12) Si apostol Pablo nagsadol: “Minsan paano, sagkod sa inabot na kan satong pag-oswag, magpadagos kitang maglakaw na husay sa iyo man sanang paagi.” (Fil. 3:16) Iyo, an saindong aktibidad sa langtad maninigong magtao nin ebidensia nin aregladong paagi.
4 Halimbawa, igwa daw kamo nin bastanteng tract asin handbill? Igwa daw kamo nin igong suplay nin bagong mga magasin? Ginagamit daw nindo an house-to-house record?
5 Bago makikabtang sa ministeryo, tawan nin panahon an pagrepaso kan presenteng Topikong Mapag-oolayan. Pumili nin mga puntong ipakikipag-olay sa publikasyon na iinaalok, asin magin andam na gamiton ini nin epektibo tanganing mapukaw an interes. Saro pa, magin andam na gamiton an Reasoning From the Scriptures. Dawa sa pag-oltanan nin mga harong, puwede nindong helingon sa madali an pira sa dakol na suhestion kaiyan.
6 Maninigo niatong pagmaigotan na mahaman an satong ministeryo paagi sa pagtao kan pinakamarahay na patotoo, “an bunga nin mga ngabil.” (Heb. 13:15; ikomparar an Oseas 14:2.) Tanganing magibo ini, mag-iskedyul kita nin panahon para sa regular na pakikikabtang sa paglilingkod sa langtad asin magbugtak nin rasonableng mga pasohan na magpapangyari sato na mahaman an satong ministeryo sa ikaoomaw ni Jehova.