Pag-aatubang kan Maogmang Bareta—Paagi sa mga Pag-adal sa Biblia
1 Sa nakaaging taon na ini nin paglilingkod digdi sa Pilipinas, labing 76,000 na pag-adal sa Biblia an ginibo kada bulan. Seguro kulang pa sa kabanga kan mga parahayag sa nasyon na ini an nakikabtang sa magayagayang gibohon na ini. Siyempre, ini nangangahulogan na an kabanga dai nakikabtang dian. Paano daw magkakamit an mas dakol sa sato kan espesyal na satispaksion sa pagtotokdo sa iba kan katotoohan?
2 Huling namomotan niato an Dios asin pagtaraed, boot niatong ihiras sa iba an katotoohan. Pero kaipuhan niato an tabang ni Jehova. (1 Cor. 3:6, 7) Kun siring, bako daw marahay na dumolok ki Jehova sa pamibi asin arangon sa saiya na tabangan kitang makapoon nin pag-adal sa Biblia? (1 Juan 5:14, 15) Dangan kaipuhan na kita gumawe oyon sa satong pamibi asin lubos na makikabtang sa ministeryo sa langtad, na iinaalok an pag-adal sa Biblia basta magkaoportunidad.
KADAKOL KAN OPORTUNIDAD
3 Sa nakaaging pirang taon, minilyon na libro, pulyeto, asin pampleta an ikinawaras sa mga tawo sa teritoryo. An mga librong Mabuhay Sagkod Lamang, Tunay na Katoninongan, asin Katotoohan yaon sa harong nin rinibo na bako man na mga Saksi ni Jehova. Ini mahiwas na langtad nin oportunidad sa pagpopoon nin bagong mga pag-adal.
4 Kun sinasabi kan kagharong na pamilyar sa saiya an satong gibohon o igwa na kan satong babasahon, maninigong sabihon niato sa saiya na naoogmang gayo kita. (Helingon an Reasoning, pahina 20.) Kun sia may babasahon na, puwede niatong isuherir na kuanon nia iyan asin togotan kitang itokdo an pirang punto na pakikinabangan nia asin kan saiyang pamilya. Kun positibo an reaksion, puwede kitang mag-alok nin pag-adal sa Biblia.
5 Puwede man niatong gibohon an inisyatiba asin ihapot kun an kagharong igwa na kan satong babasahon. Pakatapos nin makikatood na introduksion, puwede niatong sabihon na huli sa satong parateng pagsongko, an kadaklan kan mga nasa palibot igwa na kan satong babasahon. Dangan puwede niatong ihapot sa kagharong kun igwa man sia. Kun igwa, puwede niatong ihapot kun puwedeng maheling iyan asin mag-opresir na ipaheling saiya kun paano niato iyan pinag-aadalan. An halipot na demonstrasyon tibaad magbunga nin pag-adal sa Biblia. Kun mayo pa sia kan satong babasahon, puwede niatong ialok an presenteng alok o hapoton sia nin direkta kun an saiyang pamilya gusto nin libreng pag-adal sa Biblia.
GAMITON AN PAGMANSAY
6 Mantang sibot an mga tawo, madonong na magin mapagmansay asin dai maghaloy na gayo. Tibaad puwedeng mga 15 minutos sana an enot na pirang pag-adal. Kun aram kan kagharong na dai man uuboson an dakulang kabtang kan saiyang oras, tibaad magusto siang regular niatong songkoon. Oras na establisado na an pag-adal asin tuminubo na an interes kan kagharong, puwede nang gumamit nin mas halawig na oras sa pag-adal.
7 May mga arog-karnero sa langtad na nagkakaipo kan satong tabang, asin an dakol sa sainda igwa kan satong babasahon. Daing duwa-duwa na an iba sa sainda nag-aagrangay asin nag-aaragagha huli sa makababaldeng mga bagay na ginigibo sa daga ngonyan. (Ezeq. 9:4) Pribilehiyo niato na bako sanang magwaras nin babasahon kundi darahon man an katotoohan sa mga may sadiosan na puso paagi sa pag-adal sa Biblia.—Mat. 28:19, 20.