Hapot

◼ Anong mga publikasyon an maninigong ilaag sa libreriya kan Teokratikong Paadalan sa Pagmiministro?

An libreriya kan Teokratikong Paadalan sa Pagmiministro sa Kingdom Hall nagtatao kan mga materyal para sa pagsiyasat sa mga publikasyon na tibaad dai na makukua. Sa siring, maninigo iyan na kompleto nin manlaenlaen na traduksion kan Biblia, bagong mga publikasyon kan Sosyedad, mga kopya nin An Satong Ministeryo sa Kahadean, mga tomo kan The Watchtower asin Awake!, patin Watch Tower Publications Indexes. Dugang pa, maninigong idagdag an sarong marahay na modernong diksionaryo. Kun igwa, puedeng magin kapakipakinabang an mga ensiklopedya, libro nin mga mapa, o mga librong reperensia sa gramatika asin historya.

Bakong angay na iiba an mga librong eroestorya sana, mga komentaryo sa Biblia na nagtatampok nin mas halangkaw na gradong pagkritika, o mga libro manongod sa pilosopiya o espiritismo. An libreriya kan Teokratikong Paadalan sa Pagmiministro maninigong kabale sana an materyal na magpapangyari sa mga naggagamit kaiyan na magpadagos sa espirituwal na pag-oswag.​—1 Tim. 4:15.

An paraataman sa paadalan an may paninimbagan sa libreriya, dawa ngani puedeng iasignar an saro pang tugang na lalaki na tumabang sa saiya sa pag-asikaso kaiyan. Maninigong siertohon nia na idagdag an bagong mga publikasyon sa pinakamadaling panahon na magkaigwa kaiyan. Maninigo na an kada libro malinaw na markahan sa laog kan tutob kan ngaran kan kongregasyon na kagsadiri kaiyan. Taon-taon, maninigong siyasaton an mga libro tanganing helingon kun may kaipuhan na pakarhayon o salidahan.

Paagi sa pagsunod sa mga suhestion na nasa enotan, tatabangan kan libreriya kan Teokratikong Paadalan sa Pagmiministro an gabos na maheling an natatagong mga kayamanan kan Tataramon nin Dios, na nagtataong kaaraman, kadonongan, asin pakasabot.​—Tal. 2:​4-6.