An Librariya kan Teokratikong Paadalan sa Pagmiministro
1 Sinadol ni apostol Pablo si Timoteo na ‘magmahigos sa pampublikong pagbasa, pagsadol, pagtotokdo, asin horophoropon an mga bagay na saiyang nanodan, ipanongod dian an bilog niang buhay, tanganing an saiyang pag-oswag mahayag sa gabos.’ (1 Tim. 4:13, 15) An sarong paagi na ikaaplikar niato an hatol na ini iyo an personal na pag-adal asin pagsiyasat. An marahay na teokratikong librariya makatatabang na gayo sa katuyohan na ini. Marahay na magkaigwa nin asin gamiton an satong personal na librariya sa harong. Alagad an librariya kan Teokratikong Paadalan sa Pagmiministro na yaon sa Kingdom Hall tibaad may dugang pang mga reperensia, nangorogna para sa mga bagohan na mayo nin personal na kopya kan daan na mga publikasyon. Kaya dinadagka mi an gabos na kongregasyon na magkaigwa nin librariya kan Teokratikong Paadalan sa Pagmiministro sa Kingdom Hall.
KUN ANO AN IBUBUGTAK DIAN
2 Anong mga publikasyon an maninigong ibugtak sa librariya kan Teokratikong Paadalan sa Pagmiministro? Mantang an katuyohan kaiyan tabangan kita sa pag-adal kan Biblia, iyan maninigong igwa kan presenteng mga publikasyon kan Sosyedad asin nin laen-laen na traduksion kan Biblia. Siring man, puwedeng magkaigwa nin marahay na diksionaryo. An The Watchtower Publications Index 1930-1985, na sinadya para sa pagsiyasat asin pag-adal, kaipuhan sa marahay na teokratikong librariya. Minsan siring, an dakol na Kingdom Hall mayo kan gabos na publikasyon na sinasabi sa Index. Tanganing magkaigwa nin mas dakol na materyal, pinaplano kan Sosyedad na imprentahon liwat an mga tomo kan The Watchtower para sa taon 1960 sagkod 1979, sa Ingles sana. Ini magigin marahay na dagdag sa mga librariya kan Teokratikong Paadalan sa Pagmiministro na mayo pa kan mga reperensiang ini.
3 An paraataman sa Teokratikong Paadalan sa Pagmiministro iyo an responsable sa librariya. An sarong ministeryal na lingkod puwedeng iasignar na tabangan sia sa pag-asikaso kaiyan. An paraataman sa paadalan maninigong alisto na an angay na bagong mga publikasyon ikinadadagdag asin may malinaw na marka an mga libro na nagpapaheling na iyan rogaring kan kongregasyon. An gabos maninigong magkooperar sa paraataman sa paadalan sa pagpapadanay sa librariya na malinig asin areglado. Kun igwa kamo nin mga publikasyon na gusto nindong idonar sa librariya, puwede nindong isabi sa paraataman sa paadalan kun ano an yaon sa saindo.
PAPAGDANAYON NA NASA MARAHAY NA KAMUGTAKAN
4 An paraataman sa paadalan mag-aareglo nin panapanahon na pagsiyasat sa librariya tanganing masierto na iyan areglado asin naaasikaso an ano man na mga hihirahayon o sasalidahan. Dai mag-alangan na gamiton an librariya bago asin pagkatapos kan pagtiripon. Minsan siring, dai maninigong iluwas sa Kingdom Hall an arin man na libro.
5 An librariya kan Teokratikong Paadalan sa Pagmiministro may kapakipakinabang na katuyohan. Mantang inaaprobetsaran niato an probisyon na ini sa pagsiyasat, makakamtan niato an kagayagayahan sa pakanompong sa ‘natatagong mga kayamanan’ kan Tataramon nin Dios na nagtatao nin kaaraman, kadonongan, asin pakasabot.—Tal. 2:4-6.