Areglo nin Pag-adal sa Libro kan Kongregasyon
Kabtang 1: Paninimbagan kan Nangengenot sa Pag-adal
1 An Pag-adal sa Libro kan Kongregasyon may mahalagang kabtang sa espirituwal na pagtalubo kan banwaan ni Jehova. Sa masurunod na bulan, sisiyasaton niato an laen-laen na kabtang kan areglong ini asin pag-oolayan niato kun paano kita makikinabang. Sa luwas na ini isesentro niato an orolay sa kun paano magigibo kan nangengenot na nakadadagka asin nakapakokosog sa pagtubod an pag-adal.
2 Tanganing magin epektibo sa pagtotokdo, an nangengenot maninigong mag-andam nin marhay. Kaipuhan na bako sanang aram nia an simbag sa kada hapot kundi nasasabotan man nia kun taano ta tama an simbag na iyan. Kaipuhan na pagmaigotan niang matabangan an gabos na nag-aadal na maaraman an mga dahelan para sa mga simbag. (1 Ped. 3:15) Parararomon kaini an saindang pagpahalaga sa pinag-aadalan.
MGA PASOHAN SA PANGENGENOT SA PAG-ADAL
3 An sarong pasohan kan nangengenot pakosogon an pagtubod kan gabos na nag-atender asin pahiroon sinda na mas lubos na otobon an kabotan nin Dios. (Sal. 110:3; 2 Tes. 1:3-5) Tanganing magibo ini, dapat na sia pumondo sa angay na mga lugar tanganing idoon an mga punto na nagpaparigon sa pagsarig ki Jehova, sa saiyang Tataramon, asin sa saiyang organisasyon. (Gal. 6:6) Puwedeng gumamit nin mga hapot tanganing mapaluwas an mga detalyeng ini sagkod sa itinotogot kan panahon.
4 An saro pang pasohan tabangan an gabos na gamiton an pinag-adalan sa praktikal na paagi. Paano daw ninda iyan magagamit sa ministeryo sa langtad? Sa pagpakosog sa mga tugang saka sa mga bagohan? Sa pagpakosog sa saindang pamilya? Sa pag-andam kan mga nangengenot sa pag-adal sa kada leksion, maninigong pagmaigotan nindang mamansayan an praktikal na gamit nin espisipikong mga punto sa pag-adal.
5 An nagkapirang impormasyon magagamit sa pagtabang sa daing pagtubod na mga paryente, kaklase, o katrabaho. An iba man na pinag-aadalan puwedeng makatabang sa mga nasa nababangang pamilya. Puwede sindang tabangan kan nangengenot na gumibo nin praktikal na pag-aplikar kan pinag-aadalan. Maninigong papagdanayon niang kawiliwili an pag-adal, bako sanang hapot-simbagan.—Ikomparar an 1 Corinto 14:9, 19.
MAGPAHELING NIN PERSONAL NA INTERES
6 Paagi sa pagpaheling nin personal na interes sa kada saro, madadagka kan nangengenot na makikabtang an gabos. An mga masosopgon puwedeng patienot na asignaran na bumasa nin mga teksto, o patienot na tawan nin hapot tanganing maandam an simbag. An gabos maninigong maghingoa na magkomento sa sadiri nindang tataramon. Paagi sa maingat na paghinanyog sa mga komento, maririsa kan nangengenot kun an iba nagkakaipo nin personal na tabang.
7 An Pag-adal sa Libro kan Kongregasyon nagtatao sato kan oportunidad na magtiripon sa saradit na grupo asin umako nin mas personal na atension. Nungka na ibilang niato iyan na bakong arog kahalaga nin ibang pagtiripon. An nangengenot sa saindong pag-adal ginagamit an pag-adal tanganing parigonon an saindong pagtubod asin pakosogon an saindong pagpahalaga sa mga probisyon nin Dios.