Siisay an Naggigibo kan Kabotan ni Jehova Ngonyan?
1. Nuarin ta pupunan na gamiton an brosyur na Siisay an Naggigibo kan Kabotan ni Jehova Ngonyan? asin paano kita makikinabang?
1 Puon sa semana nin Oktubre 28, an bagong brosyur na Siisay an Naggigibo kan Kabotan ni Jehova Ngonyan? an gagamiton sa Pag-adal sa Bibliya kan Kongregasyon. Ilinuwas ini sa “Ingatan an Saimong Puso!” na Pandistritong Kumbensiyon asin dinisenyo para giyahan an mga tinutukduan sa Bibliya pasiring sa organisasyon. Sa pag-adal ta kaini, bako sanang urog niyatong mapapahalagahan an pagigin kabilang ta sa organisasyon ni Jehova kundi matatabangan man kitang magin pamilyar sa mahalagang pantabang na ini sa ministeryo.—Sal. 48:13.
2. Paano pag-aadalan sa kongregasyon an brosyur?
2 Kun Paano Iyan Pag-aadalan: Kaipuhan na banga-bangaon kan nagkokondukta an saiyang oras para matawan nin igong panahon an kada leksiyon. Pupunan niya an pagtukar kan kada saro sa 28 leksiyon paagi sa pagbasa kan hapot na iyo an titulo kan leksiyon. Dangan, ipapabasa niya sa tagabasa an inot na parapo. Sunod, ihahapot niya sa mga nagdadangog an hapot na inandam niya para diyan. Tapos, saro-sarong babasahon asin tutukaron an kada parapo na nagpupuon sa mga letrang naka-bold. Pagkabasa kan parapo, ihahapot kan nagkokondukta kun paano sinisimbag kaiyan an hapot na iyo an titulo kan leksiyon. Dakul man na ritrato sa brosyur an puwedeng komentuhan. Maninigong basahon an importanteng marhay na mga teksto sagkod na may oras pa. Bago bumalyo sa sunod na leksiyon, ihahapot kan nagkokondukta an mga hapot na nasa ibaba kan pahina bilang repaso. Kun may kahon na “Aramon nin Orog Pa,” ipapabasa niya ini, dangan papakomentuhon an mga nagdadangog kun paano makikinabang an tinutukduan sa Bibliya kun susunudon an suhestiyon. Kun may oras pa bago matapos an pag-adal, puwede niyang gamiton an titulo kan mga leksiyon bilang mga hapot sa repaso. Tandaan na dai man buot sabihon na arog man kaini an paaging susunudon sa pagkondukta nin pag-adal sa Bibliya.
3. Paano kita lubos na makikinabang sa pag-adal kan brosyur?
3 Para lubos na makinabang, mag-andam nin marhay bago umatender. Pagmaigutan na makapagkomento. Durante kan pag-adal, pag-isipan kun taano ta kapakipakinabang an brosyur sa mga tinutukduan sa Bibliya. Lugod na an pag-adal ta sa bagong brosyur na ini makatabang sa sato na madagka an iba na gibuhon man an kabutan nin Diyos tanganing magkaigwa man sinda nin paglaom na magdanay sagkod lamang.—1 Juan 2:17.