Pag-adal sa Pulyetong Divine Name
1 “Magpasalamat kamo ki Jehova, banwaan! Mag-apod kamo sa saiyang ngaran. . . . Sambiton nindo na an saiyang ngaran halangkaw.” (Isa. 12:4) Ini an gusto niato gabos na gibohon, asin saro iyan sa mga dahelan na ipinublikar an pulyetong The Divine Name That Will Endure Forever. Poon kan iyan iluwas, tinabangan kita kan pulyetong ini na mas epektibong makuyog an pagboot na ini. Daing duwa-duwa, an kadaklan sa sato nabasa na an pulyeto.
2 Tanganing maseguro na an gabos biyong nakaaaram sa laog kaiyan, iinareglo kan Sosyedad na iyan pag-adalan sa Pag-adal sa Libro kan Kongregasyon poon sa semana nin Setyembre 13-19 asin sagkod sa katapusan nin Oktubre. Boot niato gabos na kamtan an pinakadakol sa mga pag-adal na ini. Paano niato iyan magigibo?
PAG-ANDAM
3 An sekreto iyo an pag-andam. An pulyeto pag-aadalan sa dating paagi, na binabasa an mga parapo asin an sitadong mga teksto sagkod sa itinotogot kan panahon. Alagad mantang an Sosyedad dai nagtao nin mga hapot sa mga parapo, paano kita makapag-aandam nin patienot? Sa kaparehong paagi na kita nag-aandam na magkomento sa mga artikulo sa An Satong Ministeryo sa Kahadean. Maingat na basahon an kada parapo, basahon an sitadong mga teksto, dangan linyahan an pangenot na mga punto.
4 Igwa nin dagdag na tangga para sa mangengenot sa pag-adal. Pagkakua nia sa pangenot na punto sa parapo, magibo sia nin hapot sa pagdodoon kan puntong iyan. Halimbawa, sa enot na parapo sa pahina 3, ipinaliliwanag an Pamibi kan Kagurangnan, partikularmente an enot na mga tataramon dian. Kaya, tibaad gustong ihapot kan nangengenot: “Anong pamibi an pamilyar sa kadaklan na relihiyosong tawo? Ano an kapinonan kan pamibing iyan?” Ipinaliliwanag kan parapo dos kun ano an ipinaririsa kan pagkasunodsunod nin mga tema sa Pamibi kan Kagurangnan. Kaya puwedeng ihapot kan nangengenot: “Ano an pinakamahalagang bagay na ikapamimibi niato? Ini mas mahalaga kisa anong ibang bagay?” An mga hapot maninigong halipot, klaro, asin diretso sa punto. Parate na an hapot maninigong saro-sarong itao.
5 An darakulang kahon igwa nin importanteng impormasyon na maninigong pag-olayan kasunod kan parapo na dian iyan konektado. Halimbawa, an kahon sa parapo 7 puwedeng pag-olayan pakatapos kan parapo 2 sa pahina 11. An dakulang kahon sa pahina 21 puwedeng pag-olayan kun matapos nang pag-adalan an nakaasignar na kabtang sa semanang iyan. Asin an kahon sa pahina 25 puwedeng pag-olayan pakatapos kan parapo 4 sa pahina 25.
6 Sa nagkapirang kaso tibaad gusto kan nangengenot sa pag-adal na durungan na ipabasa an gabos na parapo sa laog kan kahon dangan pag-olayan an kahon sa kabilogan, imbes na parapo por parapo. (Dai na kaipuhan na basahon an nasa kahon sa pahina 8.) An mga nag-atender puwedeng magkomento sa saradit na kahon asin ilustrasyon. Kun dai, maninigo na apodon an atension kan nangengenot sa impormasyon kun noarin angay.
7 An pag-adal niato sa pulyetong The Divine Name That Will Endure Forever matabang sato na horophoropon an ngaran ni Jehova. (Mal. 3:16) Kun kita maimbod na mag-aandam asin presente kita sa kada pag-adal, magigin kuwalipikado kita na tabangan man an iba na maghorophorop sa ngaran ni Jehova.