Paano Gagamiton an Brosyur na Siisay an Naggigibo kan Kabotan ni Jehova Ngonyan?
Bagong Brosyur na Dinisenyo Para Giyahan an mga Tinutukduan sa Bibliya Pasiring sa Organisasyon
1. Ano an tulong katuyuhan kan brosyur na Kabotan ni Jehova?
1 Pinunan na daw nindong gamiton an bagong brosyur na Siisay an Naggigibo kan Kabotan ni Jehova Ngonyan? An katuyuhan kaiyan iyo na (1) an mga tinutukduan sa Bibliya magin pamilyar sa sato bilang Mga Saksi ni Jehova, (2) matabangan sinda na maaraman an aktibidad niyato, asin (3) ipahiling sa sainda kun paano nagpupunsiyonar an organisasyon. An brosyur na Kabotan ni Jehova may tigsararong pahinang leksiyon na madali sanang mapag-uulayan sa laog nin 5 sagkod 10 minutos sa katapusan kan kada pag-adal.
2. Iladawan an disenyo asin mga itinatampok kan brosyur na ini.
2 Kun Paano Iyan Dinisenyo: Binaranga iyan sa tulong seksiyon, na an kada saro nagtutukar nin lain-lain na aspekto kan organisasyon ni Jehova, arog kan nasambit sa inutan. An titulo kan kada saro sa 28 leksiyon nasa pormang hapot, asin an simbag diyan iyo an kasunod na naka-bold na mga subtema. An mga ritrato na hali sa labing 50 nasyon linagan nin kapsiyon para ipahiling na pambilog na kinaban an gibuhon ta. An nagkapira sa mga leksiyon may kahon na “Aramon nin Orog Pa,” na igwang mga suhestiyon. Puwede nindong enkaminaron an tinutukduan nindo sa Bibliya na sunudon iyan.
3. Paano ta gagamiton an brosyur na Kabotan ni Jehova?
3 Kun Paano Nindo Iyan Gagamiton: Punan paagi sa pagpahiling kan hapot na iyo an titulo kan leksiyon. Dangan, mantang magkaibanan nindong binabasa an leksiyon, iduon an mga subtemang naka-bold. Pagkatapos, pag-ulayan an mga hapot sa repaso na nasa ibaba kan pahina. Puwede nindong basahon nin sararuan an bilog na leksiyon o basahon asin pag-ulayan an kada seksiyon. Kamo an madesisyon kun arin na sitadong teksto an babasahon. Dai paglingawan na pag-ulayan an mga ritrato asin kahon na “Aramon nin Orog Pa.” Sa kadaklan na kamugtakan, maninigong pag-ulayan an mga leksiyon suno sa pagkasunod-sunod. Minsan siring, dai mag-alangan na pag-ulayan an sarong leksiyon na nagkakaipo tulos-tulos nin atensiyon. Halimbawa, kun may maabot na asamblea o kumbensiyon, puwede na nindong pag-ulayan tulos an leksiyon 11.
4. Taano ta nauugma kamong magkaigwa kan bagong brosyur na ini?
4 Kun may tinutukduan kita sa Bibliya, tinatabangan ta siyang mamidbid an satong langitnon na Ama. Minsan siring, kaipuhan ta man na itukdo sa saiya an dapit sa organisasyon ni Jehova. (Tal. 6:20) Nauugma nanggad kitang magkaigwa kan bagong brosyur na ini na magpapagin pasil sa paggibo kaiyan!