Hapot

◼ Ano an masasabing tamang gubing kun nagpapabautismo?

Minsan ngani laen-laen an mga pamantayan nin gubing sa laen-laen na parte nin kinaban, an sadol kan Biblia na maggubing nin “may kabinian asin marahay na kaisipan” dai nagliliwat para sa gabos na Kristiano, saen man sinda nag-iistar. (1 Tim. 2:9) An prinsipyong ini maninigong iaplikar kun pinag-oorolayan kun ano an tamang gubing sa pagpabautismo.

An Hunyo 1, 1985 Watchtower, pahina 30, nagtatao kan sadol na ini sa sarong magpapabautismo: “Sierto nanggad na an kabinian an maninigong masunod sa klase nin pankarigos na gagamiton. Mahalaga ini ngonyan mantang an mga paradisenyo nin usong mga bado gustong ipagpasikat an seksuwalidad asin maabot an haros biyong pagkahuba. An saro pang bagay na dapat horophoropon iyo na an pirang gubing na garo baga mabini sa pagheling kun mara bako nang siring kun ini basa. Mayong magpapabautismo an boot na makadistorbo o makapasingkog sa okasyon na siring kaseryoso kan pagpabautismo.​—Filipos 1:10.”

Kaoyon sa sadol na ini, idtong mga babautismohan bobooton na magsulog nin mabining bado, na isinasaisip an kahalagahan kan okasyon. Kaya an pankarigos na garo kinulang nin tela o bako nang mabini an pagkalapat sa hawak kun basa dai magigin angay na gubing para sa Kristiano asin maninigong likayan. Siring man, dai magigin angay para sa saro na magin daing kahusayan o bagla an itsura. Dugang pa, bakong tama na magsulog nin mga T-shirt na may kinabanon na mga pananaram o komersial na mga sarabihon.

Kun an naasignaran na mga magurang rinirepaso an mga hapot sa bautismo sa kandidato sa bautismo, marahay na panahon ini na ipaliwanag an halaga nin pagsulog nin tamang gubing. Sa paaging ini an dignidad kan okasyon mapagdadanay, asin padagos kitang mamimidbid na napapalaen sa kinaban.​—Ikomparar an Juan 15:19.