Panghuring Pakikipag-ulay sa mga Kandidato sa Bawtismo

An pagbawtismo parating ginigibo sa mga asembleya asin kumbensiyon kan Mga Saksi ni Jehova. Sa pagtatapos kan pahayag sa bawtismo, sasabihan kan ispiker an mga kandidato sa bawtismo na tumindog asin simbagon nin makusog an minasunod na duwang hapot:

1. Pinagsulsulan mo na daw an saimong mga kasalan, idinusay na an saimong sadiri ki Jehova, asin inako na an pagliligtas niya paagi ki Jesu-Cristo?

2. Nasasabutan mo daw na paagi sa saimong pagpabawtismo, ipinapamidbid mo na saro ka nang Saksi ni Jehova asin kabilang ka na sa organisasyon ni Jehova?

Paagi sa pagsimbag nin iyo sa mga hapot na ini, “hayagan na ipinapahayag” kan mga kandidato sa bawtismo na nagtutubod sinda sa pantubos asin lubos na nindang idinusay an saindang sadiri ki Jehova. (Roma 10:9, 10) Marahay na patiinot nang pag-isipan asin ipamibi kan mga kandidato sa bawtismo an mga hapot na ini tanganing makasimbag sinda kauyon kan sadiri nindang desisyon.

Idinusay mo na daw an saimong sadiri ki Jehova paagi sa pamibi, na nangangakong siya sana an sasambahon mo asin na an paggibo kan saiyang kabutan an magigin pinakaimportante sa buhay mo?

Kumbinsido ka na daw talaga na dapat ka nang magpabawtismo sa pinakamadaling panahon?

Ano an angay na isulot sa bawtismo? (1 Tim. 2:9, 10; Juan 15:19; Fil. 1:10)

Dapat na an satong pagbado “may kabinian asin tultol na isip” tanganing maipahiling niyato an satong “debosyon sa Diyos.” Kaya an mga mapabawtismo dai masulot nin mapang-akit na badong pambasâ o pangkarigos, o bado na may mga surat, islogan, o ritrato. An saindang bado dapat na maayos, malinig, asin angay sa okasyon.

Paano dapat gumawi an saro sa panahon kan saiyang bawtismo? (Luc. 3:21, 22)

An bawtismo ni Jesus nagseserbing halimbawa para sa bawtismo nin mga Kristiyano sa ngunyan. Nasabutan niya na seryosong bagay an pagpabawtismo, asin nahiling ini sa saiyang sabuot asin paghiro. Kaya an lugar kan bawtismo bakong lugar para sa surubahan, pagkawat, paglangoy, o iba pang paggawi na makakabawas sa pagigin seryoso kan okasyon; asin dai man magawi an bagong mabawtismuhan na garo baga nanggana siya sa kontest. Dawa ngani an bawtismo sarong maugmang okasyon, an kaugmahan na iyan dapat na ipahayag nin may dignidad.

Paano makakatabang sa saimo an regular na pag-atender asin pakikiiba-iba sa kongregasyon para mautob mo an saimong pagdusay ki Jehova?

Dawa bawtisado ka na, taano ta mahalagang marhay na ipagpadagos mo an iskedyul nin personal na pag-adal asin regular na pagpartisipar sa ministeryo?

INSTRUKSIYON PARA SA MGA ELDER

Kun an sarong dai pa bawtisadong parahayag magsabi na gusto na niyang magpabawtismo, dagkahon siya na repasuhon na marhay an “Mga Hapot Para sa mga Gusto Nang Magpabawtismo,” na yaon sa pahina 185-207 kan librong ini. Sabihan man siya na basahon an “Mensahe Para sa Dai Pa Bawtisadong Parahayag,” puon sa pahina 182, na nagpapaliwanag kun paano siya makakapaghanda para sa pakikipag-ulay sa saiya kan mga elder. Arog kan binanggit diyan, puwedeng gamiton kan potensiyal na kandidato sa bawtismo an sadiri niyang mga nota asin puwede niyang buksan an librong ini sa panahon kan pakikipag-ulay sa saiya. Pero dai kaipuhan na may magrepaso sa saiya kan mga hapot bago siya makipag-ulay sa mga elder.

An siisay man na gusto nang magpabawtismo dapat na magsabi sa koordineytor kan grupo nin kamagurangan. Pagkatapos na mabasa kan saro na nagsabing gusto na niyang magpabawtismo an “Mga Hapot Para sa mga Gusto Nang Magpabawtismo,” hahaputon siya kan koordineytor kan grupo nin kamagurangan kun personal na siyang nagdusay ki Jehova paagi sa pamibi asin nangako na gigibuhon niya an Saiyang kabutan. Kun nagdusay na siya, an koordineytor kan grupo nin kamagurangan maasignar nin duwang elder para ipakipag-ulay sa saiya an “Mga Hapot Para sa mga Gusto Nang Magpabawtismo.” Iba-ibang elder an dapat iasignar na makipag-ulay kan kada seksiyon. Dawa mayo pang paisi kun nuarin an asembleya o kumbensiyon, puwede nang gibuhon an pakikipag-ulay na ini.

Sa parati, an duwang seksiyon puwedeng pag-ulayan sa duwang sesyon na mga tigsarong oras, pero puwede man sumobra pa diyan kun kaipuhan. An kada sesyon dapat na punan asin tapuson paagi sa pamibi. Dai dapat maghidali an kandidato sa bawtismo o an elder sa pagtukar kan mga hapot. Dapat na magin priyoridad kan inasignaran na mga elder an pakikipag-ulay na ini.

Sa parati, pinakamarahay na repasuhon an mga kandidato sa bawtismo nin pasaro-saro, bako bilang grupo. Kun papakomentuhon sa kada hapot an kandidato, malinaw na mahihiling kan mga elder an rarom kan saiyang pakasabot sa katotoohan asin kun baga handa na siya para sa bawtismo o dai pa. Saka pag arog kaiyan, puwedeng mas buwelo siyang makakapagsabi kan saiyang sabuot. An mag-agom puwedeng sabay na repasuhon.

Kun sister an rerepasuhon, an pagrepaso saiya dapat gibuhon sa lugar na nahihiling kan iba pero dai nadadangog an pag-uulay. Kun kaipuhan mag-iba nin saro pa, dapat na elder o ministeryal na lingkod an iiba, depende sa seksiyon na rerepasuhon, arog kan sinasabi sa sunod na parapo.

Sa mga kongregasyon na kadikit an elder, an may kakayahan na mga ministeryal na lingkod na may marahay na paghusgar asin pagmansay puwedeng gamiton sa pagrepaso sa mga kandidato kan mga hapot para sa bawtismo na yaon sa “Seksiyon 1: Mga Tinutubod kan mga Kristiyano.” Mga elder sana an dapat na makipag-ulay kan “Seksiyon 2: Pamumuhay Bilang Kristiyano.” Kun kulang nin kuwalipikadong brother sa kongregasyon, puwedeng kontakon an paraataman nin sirkito para maaraman kun may elder na makakatabang sa kaharaning kongregasyon.

Kun menor de-edad an kandidato sa bawtismo, dapat na presente sa pagrepaso an saiyang Saksing (mga) magurang. Kun dai puwede an (mga) magurang, duwang elder (o sarong elder asin sarong ministeryal na lingkod, depende sa seksiyon na rinerepaso) an marepaso sa saiya sa kada sesyon.

Sisiguraduhon kan mga elder na an gusto nang magpabawtismo igwa na nin rasonableng rarom nin pakasabot sa panginot na mga katukduan sa Bibliya. Saro pa, sisiyertuhon man ninda kun talagang pinapahalagahan niya an katotoohan asin nagpapahiling siya nin tamang paggalang sa organisasyon ni Jehova. Kun dai niya nasasabutan an panginot na mga katukduan sa Bibliya, maasignar an mga elder nin tugang na matabang saiya tanganing makuwalipikar siya sa bawtismo sa sunod na pagkakataon. An iba tibaad kaipuhan na tawan pa nin panahon para maipahiling ninda an pagpapahalaga sa paglilingkod sa langtad o pagpapasakop sa mga areglo kan organisasyon. An mga elder na an bahala kun paano babanga-bangaon an sarong oras o labi pa na gagamiton sa kada sesyon tanganing masigurado kun baga andam na an kandidato para sa bawtismo. Puwedeng iba-iba an lawig nin pagtukar sa kada hapot, pero dapat marepaso an gabos na hapot.

Pagkatapos kan ikaduwang sesyon, mamiting an mga elder na inasignaran na magrepaso kan mga hapot na ini para desisyunan kun baga kuwalipikado na an kandidato para sa bawtismo o dai pa. Kokonsideraron kan mga elder an background, kakayahan, asin iba pang sitwasyon kan kada kandidato. An mahalagang mahiling kan mga elder iyo na kun baga an kandidato igwa na nin haraning relasyon ki Jehova asin nasasabutan niya an panginot na mga katotoohan sa Bibliya. Paagi sa mamumuton na tabang nindo, magigin handa nanggad an mga mapabawtismo na utubon an mahalagang asignasyon sa sainda bilang mga ministro kan maugmang bareta.

Pagkatapos, an saro o duwang elder na nagrepaso dapat na makipag-ulay sa kandidato para sabihon kun baga kuwalipikado na siya para sa bawtismo o dai pa. Kun kuwalipikado na siya, dapat na repasuhon sa saiya kan mga elder an “Panghuring Pakikipag-ulay sa mga Kandidato sa Bawtismo,” na yaon sa pahina 206-207. Kun dai pa tapos kan kandidato sa bawtismo an pag-adal niya sa librong Mabuhay nin Maugma Sagkod Pa Man!, dapat na dagkahon siya kan mga elder na tapuson iyan pagkabawtismo. Sabihon sa kandidato na an petsa kan saiyang bawtismo ilalaag sa Congregation’s Publisher Record na nakangaran saiya. Ipapagirumdom saiya na kinukua kan mga elder an personal na mga impormasyon na iyan tanganing maasikaso kan organisasyon an mga aktibidad na pangrelihiyon kan Mga Saksi ni Jehova sa bilog na kinaban asin tanganing makapagpartisipar siya sa mga aktibidad na inorganisar kan kongregasyon asin mag-ako nin pampakusog asin giya hali sa mga elder. Sasabihon man kan mga elder sa bagong parahayag na an ano man na kinuang personal na impormasyon iniingatan kauyon kan Global Data Protection Policy kan Mga Saksi ni Jehova na mahihiling sa jw.org. Sa parati, an pakikipag-ulay na ini dapat na sampulong minuto sana o mas halipot pa.

Sarong taon pagkabawtismo kan parahayag, duwang elder an dapat na makipag-ulay saiya para pakusugon siya asin tawan nin mga suhestiyon na makakatabang saiya. An saro sa mga elder na makikipag-ulay dapat na su paraataman ninda sa grupo. Kun menor de-edad an kakaulayon, dapat na presente an saiyang Saksing (mga) magurang. An pakikipag-ulay na ini dapat na mamumuton asin nakakapakusog na marhay. Sasambiton kan mga elder an saiyang pag-uswag sa espirituwal asin matao sinda nin praktikal na mga suhestiyon kun paano niya maipapadagos an marahay na rutina nin personal na pag-adal asin pagbasa nin Bibliya aroaldaw, semanal na pampamilyang pagsamba, regular na pag-atender asin pagpartisipar sa mga pagtiripon, asin semanal na paglilingkod sa langtad. (Efe. 5:15, 16) Kun dai pa tapos an pag-adal niya sa librong Mabuhay nin Maugma Sagkod Pa Man!, dapat na iareglo kan mga elder na may tumabang sa saiya para matapos iyan. Dapat na magtao an mga elder nin mamumuton na komendasyon. Sa parati, igo na an sadol asin mga suhestiyon manungod sa saro o duwang punto.