Apendise

Mensahe Para sa mga Magurang na Kristiyano:

Bilang magurang, gusto mong tabangan an namumutan mong mga aki na mamutan si Jehova asin magdusay sa saiya. Paano mo sinda matatabangan na makapaghanda para sa bawtismo? Nuarin masasabi na handa na sinda para sa importanteng lakdang na ini?

Ininstruksiyunan ni Jesus an mga parasunod niya: “Gumibo kamo nin mga disipulo sa mga tawo kan gabos na nasyon, na binabawtismuhan sinda.” (Mat. 28:19) Uyon digdi, an panginot na kahagadan para sa bawtismo iyo an magin disipulo—saro na dai sana nakakasabot asin nagtutubod sa mga tukdo ni Cristo kundi talagang nagsusunod man diyan. Magigibo iyan dawa kan mga medyo aki pa.

Magin marahay na halimbawa sa saimong mga aki, asin itadom mo sa puso ninda an mga tukdo ni Jehova. (Deut. 6:6-9) Puwede mong gamiton an impormasyon sa libro na Mabuhay nin Maugma Sagkod Pa Man! para itukdo sa sainda an panginot na mga katotoohan sa Bibliya saka ihanda sinda kun paano mangangatanusan basado sa mga prinsipyo sa Bibliya asin isabuhay iyan. Tabangan an saimong mga aki na maipaliwanag sa sadiri nindang tataramon an mga tinutubod ninda. (1 Ped. 3:15) An kaaraman asin pampakusog na nakukua ninda sa saimo asin sa personal na pag-adal, pampamilyang pagsamba, mga pagtiripon kan kongregasyon, saka marahay na kairiba makakatabang sa sainda na magin kuwalipikado sa bawtismo asin padagos pang umuswag pagkatapos kaiyan. Tabangan sinda na magkaigwa nin espirituwal na mga pasuhan.

Sinasabi kan Talinhaga 20:11: “Namimidbid paagi sa saiyang mga gibo dawa an sarong aki, kun baga dalisay asin tama an saiyang paggawi.” Anong mga gibo an magpapahiling na an aki, lalaki man o babayi, saro nang disipulo ni Jesu-Cristo asin handa nang magpabawtismo?

An aki na nag-uuswag na para magpabawtismo dapat na masinunod sa (mga) magurang niya. (Gibo 5:29; Col. 3:20) Manungod ki Jesus kan 12 anyos siya, sinasabi kan Bibliya: “Padagos siyang nagpasakop sa [mga magurang niya].” (Luc. 2:51) Siyempre, dai mo dapat asahan na magigin perpekto an aki mo. Pero an aki na gusto nang magpabawtismo magmamaigot na arugon an halimbawa ni Jesus asin magin masinunod sa mga magurang niya.

Dapat man na mahiling sa saiya na gusto niyang manudan an mga katotoohan sa Bibliya. (Luc. 2:46) Gusto daw kan aki mo na mag-atender asin magpartisipar sa mga pagtiripon? (Sal. 122:1) Gusto daw niyang basahon nin regular an Bibliya asin mag-personal study?—Mat. 4:4.

An aki na nag-uuswag na para magpabawtismo naghihinguwang inuton sa saiyang buhay an Kahadian. (Mat. 6:33) Aram niya na may paninimbagan siyang sabihon sa iba an manungod sa saiyang pagtubod. Nagpapartisipar siya sa iba-ibang aspekto kan ministeryo asin dai nasusupog na magpabisto sa mga maestra saka kaeskuwela niya na siya Saksi ni Jehova. Pinaghahandaan niyang marhay an mga asignasyon niya sa Pagtiripon na Pamumuhay Asin Ministeryo.

Pagmamaigutan man niyang magin malinig sa moral paagi sa paglikay sa maraot na kairiba-iba. (Tal. 13:20; 1 Cor. 15:33) Mahihiling ini sa pinipili niyang mga musika, pelikula, programa sa telebisyon, video game, asin sa paggamit nin Internet.

Dakul na aki an napahiro dahil sa paghihinguwa kan mga magurang ninda, isinapuso ninda an katotoohan, asin nagin kuwalipikado para sa bawtismo. Lugod na bendisyunan kamo ni Jehova sa pagtabang nindo sa saindong mga aki na magibo an importanteng marhay na lakdang na ini para magin harani sinda ki Jehova.

Mensahe Para sa Dai Pa Bawtisadong Parahayag:

Sarong pribilehiyo an maglingkod kaiba kan kongregasyon bilang dai pa bawtisadong parahayag. Kinokomendaran ka sa nagibo mo nang pag-uswag sa paglilingkod sa Diyos. Namidbid mo an Diyos paagi sa pag-adal kan saiyang Tataramon asin nagtubod ka sa mga panuga niya.—Juan 17:3; Heb. 11:6.

Bago ka nakipag-adal sa mga Saksi ni Jehova, tibaad iba an relihiyon mo o tibaad ngani wara kang relihiyon. Tibaad may ginigibo ka pa kaidto na bakong kauyon kan mga prinsipyo sa Bibliya. Pero ngunyan, ipinahiling mo na an saimong pagtubod paagi sa pagsulsol, o udok na pagbasol sa nagibo mong mga pagkakasala, asin paagi sa pagkakumbertir, o pagtalikod sa salang gibo saka pagigin determinadong gibuhon an tama sa paghiling nin Diyos.—Gibo 3:19.

O puwedeng naaraman mo an banal na mga Kasuratan “puon sa pagkaumboy.” Kaya naprotektaran ka kaiyan para dai gumawi nin bakong sa Kristiyano saka dai makagibo nin magabat na pagkakasala. (2 Tim. 3:15) Nanudan mong labanan an panggigipit nin kairiba asin iba pang mga sugot na gumibo nin maraot sa paghiling ni Jehova. Nagpahiling ka nin pagtubod paagi sa pagsuportar sa tunay na pagsamba asin pakikipag-ulay sa iba manungod sa mga tinutubod mo. Sinanay ka man sa Kristiyanong ministeryo. Ngunyan personal ka nang nagdesisyon na maglingkod ki Jehova bilang dai pa bawtisadong parahayag.

Kun namidbid mo man si Jehova kan adulto ka na o naaraman mo an mga pamantayan ni Jehova puon sa pagkaumboy, tibaad iniisip mo ngunyan an duwa pang bagay na kaiba sa saimong pag-uswag sa espirituwal—an pagdusay asin pagpabawtismo. Tanganing maidusay mo ki Jehova an saimong sadiri, marani ka sa saiya paagi sa pamibi asin sasabihon mo saiya an saimong desisyon na sa saiya mo sana itatao an saimong lubos na debosyon habangbuhay. (Mat. 16:24) Dangan, bilang simbolo kan pagdusay na iyan, babawtismuhan ka sa tubig. (Mat. 28:19, 20) Paagi sa pagdusay asin pagpabawtismo, ika magigin ordenadong ministro nin Diyos na Jehova. Magayunon nanggad na pribilehiyo iyan!

Pero, arog kan naaraman mo sa pag-adal nin Bibliya, puwede kang mapaatubang sa iba-ibang kadipisilan. Girumdumon na dai nahaloy pagkabawtismo ki Jesus, “giniyahan [siya] kan espiritu pasiring sa kaawagan, asin tinentaran siya duman kan Diyablo.” (Mat. 4:1) Pagkatapos na mabawtismuhan ka bilang disipulo ni Cristo, asahan mong may mga pagbalo pang maabot sa saimo. (Juan 15:20) Iba-iba an pagbalo. Tibaad kontrahon ka kan mga kapamilya mo. (Mat. 10:36) Tibaad tuyaon ka nin mga kaeskuwela, katrabaho, asin dating kairiba-iba. Pero pirming rumdumon an sinabi ni Jesus sa Marcos 10:29, 30: “Sinisigurado ko sa saindo, mayong nagbaya nin harong o mga tugang na lalaki o mga tugang na babayi o ina o ama o mga aki o mga uma nin dahil sa sako asin nin dahil sa maugmang bareta an dai maako nin 100 na doble ngunyan sa panahon na ini—mga harong, mga tugang na lalaki, mga tugang na babayi, mga ina, mga aki, asin mga uma, na may kasabay na mga pagpersegir—asin sa maabot na sistema nin mga bagay, nin buhay na daing katapusan.” Kaya padagos na magmaigot na magin harani ki Jehova asin mamuhay kauyon kan matanos na mga pamantayan niya.

Kun gusto mo nang magpabawtismo, magsabi ka sa koordineytor kan grupo nin kamagurangan. An mga hapot na kasunod kan mensaheng ini iyo an gagamiton sa pakikipag-ulay sa saimo kan mga elder tanganing maaraman ninda kun baga kuwalipikado ka na para sa bawtismo. Puwede mo nang punan na repasuhon an mga hapot na ini sa saimong regular na iskedyul nin personal study.

Para magin preparado ka sa pag-urulay, magtao ka nin panahon para basahon asin hurop-hurupon an ginamit na mga teksto. Puwede kang magsurat nin mga nota sa librong ini o sa ibang masusuratan. Sa pakikipag-ulay sa saimo kan mga elder, puwede mong gamiton an mga notang iyan mantang nakabukas an librong ini. Kun may hapot na nadidipisilan kang sabuton, dai mag-alangan na magpatabang sa nagtutukdo sa saimo sa Bibliya o sa mga elder.

Sa pakikipag-ulay sa saimo kan mga elder, dai kaipuhan na halaba o komplikado an simbag mo sa mga hapot. Pinakamarahay an simple saka direktang simbag sa sadiri mong tataramon. Sa kadaklan na hapot, magayon man na magsambit ka nin saro o duwang teksto na pinagbasehan kan simbag mo.

Kun kulang pa an aram mo sa panginot na mga tukdo kan Bibliya, may papakiulayan an mga elder na sarong tugang para magtabang saimo na maipaliwanag mo nin tama an Kasuratan sa sadiri mong tataramon asin magin kuwalipikado ka sa bawtismo sa sunod na pagkakataon.

[Pasabot sa mga elder: An mga instruksiyon para sa pakikipag-ulay sa mga kandidato sa bawtismo yaon sa pahina 208-212.]