Hapot
◼ Bago maaprubaran para sa bawtismo an sarong dai pa bawtisadong parahayag, sagkod sain na dapat an nagibo niyang pag-uswag sa pag-atender sa mga pagtiripon sa kongregasyon asin pakikikabtang sa ministeryo?
An pagpabawtismo an pinakaimportanteng desisyon na magigibo nin saro. Kaya, bago maaprubaran para sa bawtismo, an saro dapat igwa na nin tamang pakasabot sa kun ano an hinahagad nin Diyos sa saiya. Maninigo man na ipinapahiling na niya an saiyang determinasyon na mamuhay suno sa mga kahagadan nin Diyos.
An mga Kristiyano pinagbubutan na dai pagpabayaan an saindang pagturutiripon, kaya an dai pa bawtisadong parahayag maninigo na nagpapahiling na nin kahigusan sa pag-atender sa mga pagtiripon. (Heb. 10:24, 25) Nagkokomento na man siya. Puwedeng nakaenrol na siya sa Teokratikong Paadalan sa Pagmiministro, dawa ngani bako ining kahagadan.
Saro pa, huling an mga Kristiyano isinugo na maghulit kan maugmang bareta asin gumibo nin mga disipulo, an dai pa bawtisadong parahayag maninigo na regular nang nakikikabtang sa ministeryo bago magpabawtismo. (Mat. 24:14; 28:19, 20) Pirang bulan na siya dapat na parahayag bago mabawtismuhan? Rasonable sanang tawan siya nin igong panahon na ipahiling na determinado siyang marhay na magin regular asin maigot sa ministeryo kada bulan. (Sal. 78:37) Pero, dai man kaipuhan na haluyon nguna siyang dapat magin parahayag bago makuwalipikar sa bawtismo, tibaad mga pirang bulan sana. Gurano kadakul na oras nin paglilingkod sa langtad an maninigong irinereport na niya? Mayo man nin istriktong mga susundon. Dapat konsideraron kan mga elder an kamugtakan kan lambang parahayag asin magin rasonable saka timbang.—Luc. 21:1-4.
Dapat tandaan kan mga elder (o mga ministeryal na lingkod sa kongregasyon na dikiton an elder) na makaulay sa kandidato sa bawtismo na magkakalain an lambang tawo, asin pag-isipan na marhay kun baga kuwalipikado siya sa bawtismo. Inaasahan ninda na igwa siya nin tunay na pagmawot na magin saro sa Mga Saksi ni Jehova asin na ipahiling an pagpapahalaga sa pribilehiyo na makiasosyar sa organisasyon ni Jehova saka makikabtang sa ministeryo. Nasasabutan kan mga elder na bako pa siya maygurang sa espirituwal o mayo pa siya nin kakayahan na arog nin eksperyensiyado na bawtisadong ebanghelisador. Kun sa hiling kan mga elder dai pa siya kuwalipikado sa bawtismo, dapat na may kabuutan nindang sabihon sa saiya an suno sa Kasuratan na mga dahilan kan desisyon ninda asin tabangan siya sa espirituwal na paagi.