Mga Bendisyon na Minagikan sa Paggibo na Kaiba kan Iba
1 Namamatean daw nindo na igwa nin mga pakinabang na makakamit sa paggibo sa ministeryo na kaiba kan iba? Si Jesus iyo. Maski ngani dakol an anihon asin an mga trabahador pipira, nagsugo sia sa langtad nin 70 disipulo na “manduwaduwa.” Nagkaigwa nanggad sinda gabos nin kapakipakinabang na panahon sa paghuhulit sa “kada siudad asin lugar na saiya mismong dudumanan”!—Luc. 10:1; Mat. 9:37.
2 Nakakapakosog na gumibo kaiba kan iba. An iba sa sato masosopgon asin nadedepisilan na dolokon an mga estranghero. An pagkakaigwa nin saro na kaiba niato puwedeng magtao sato nin pagsarig na itaram an Tataramon nin Dios na may kapusoan. Kun may kaiba kita, tibaad mas pasil para sa sato na otobon an gibohon sa paagi na sinanay kita. (Tal. 27:17) An madonong na tawo nagsabi: “Marahay an duwa kisa saro.”—Ecl. 4:9.
3 Marahay na gumibo kaiba nin manlaenlaen na parahayag asin payunir. An mga kaiba ni apostol Pablo sa paglilingkod kabale sinda Bernabe, Silas, Timoteo, asin Juan Marcos, asin sinda nagkamit nin dakol na bendisyon mientras na iribang naghuhulit. Totoo man iyan ngonyan. Naggibo na daw kamo kaiba kan saro na haloy nang panahon na nasa katotoohan? Pakamasid sa saiyang abilidad sa pagtao nin patotoo, posibleng nakakua na kamo nin nagkapirang marahay na ideya na nakatabang saindo na umoswag. Inibanan na daw nindo an mga parahayag na bagohan pang marhay? Sa siring ikinahiras na nindo an saindong nanodan asin kun siring natabangan sindang magin mas epektibo asin na makanompong nin mas dakulang kagayagayahan sa saindang ministeryo.
4 Kamo daw sa presente nagkokondukta nin pag-adal sa Biblia? Kun iyo, taano ta dai agdahon an saro sa mga magurang o an paraataman sa sirkito na ibanan kamo? Kapakipakinabang para sa satong mga estudyante sa Biblia na makabisto an mga paraataman. Kun nagduduwaduwa kamo manongod sa pagkondukta kan pag-adal na yaon an sarong magurang, tibaad andam siang magkondukta kaiyan asin papagmasidon kamo. Pakatapos kaiyan, humagad saiya nin mga suhestion kun paano nindo matatabangan an estudyante na umoswag nin mas marikas.
5 Magin nakakapakosog na kaiba kun kamo naggigibo kaiba kan iba. Magin positibo sa saindong mga komento dapit sa teritoryo. Nungkang magtsismis dapit sa iba o magreklamo dapit sa mga areglo sa kongregasyon. Papagdanayon an saindong isip na nakasentro sa ministeryo asin mga bendisyon gikan ki Jehova. Kun ginigibo nindo iyan, kamo asin an saindong mga kaiba pareho mapuli na narepreskohan sa espirituwal.
6 An saindong mga kamugtakan tibaad gibohon na masakit para sa saindo na gumibo nin regular kaiba kan iba. Alagad, kun kaya nindo, taano ta dai probaran na magkaigwa nin panahon para sa paggibo kaiba nin saro pang parahayag? Kamong duwa bebendisyonan!—Roma 1:11, 12.