Pagtabang sa Iba na Hanapon an Dios
1 Tinawan kita ni Jehova nin abundang espirituwal na kakanon tanganing tabangan an mga tawo na hanapon sia. (Gibo 17:27) Ngonyan na Enero iaalok niato an librong Mankind’s Search for God o, bilang pansalida, an librong True Peace and Security. An minasunod na mga suhestion tatabangan kita na magin andam na ipaheling sa satong mga kataed an pangangaipo na ‘hanapon si Jehova’ asin “mag-apod sa saiya mantang sia harani pa.” (Isa. 55:6) An mga suhestion puwedeng ibagay sa lokal na mga kamugtakan.
2 Kun iinaalok an librong “Mankind’s Search for God,” puwede kamong magpoon paagi sa pagsabing:
◼ “Interesanteng manompongan an mga tawo na may dakol na laen-laen na relihiyon. Pero dai daw kamo minaoyon na sa parate sinusunod sana kan mga tawo an relihiyon kan saindang mga magurang imbes na hanapon ninda mismo an Dios? [Pakomentohon.] An librong ini, Mankind’s Search for God, nagpapaliwanag kan ginikanan asin mga katokdoan kan darakulang relihiyon. Sinisimbag kaiyan an mga hapot na kaipuhan niato gabos na maaraman tanganing mahanap an Dios.” Buksan sa pahina 17, parapo 28, asin ipaheling an limang hapot na ipinaliliwanag kan libro. Dangan ialok an libro.
3 O, pakapamidbid nindo, puwede nindong sabihon:
◼ “Huli sa kadakoldakol na relihiyon ngonyan, napag-isip-isip na daw nindo kun paano kita makakasierto na inooyonan nin Dios an satong relihiyon?” Pakakomento kan kagharong, darahon an saiyang atension sa kahon sa pahina 377 kan librong Mankind’s Search for God, na nagpapaheling kan sampulong paagi na mamimidbid an tunay na relihiyon, na rinirisa partikularmente an punto bilang 7. Hapoton an kagharong kun minaoyon sia na an saro na naggigibo nin tunay na relihiyon maninigong makamate nin siring dapit sa ibang rasa asin nasyonalidad. Kun itinotogot nin panahon, basahon an sitadong mga teksto, dangan ialok an libro.
4 Dakol an nakanompong na an pagbukas nin sarong kapitulo sa librong Search for God na nagpapaliwanag kan relihiyon nin kagharong nakakatabang na makua an saiyang atension. Puwedeng boot nindong probaran ini kun iinaalok an libro.
5 Kun ginagamit nindo an librong “True Peace and Security—How Can You Find It?,” puwedeng boot nindong probaran ini:
◼ “Gabos boot na mag-istar sa sarong kinaban na kun saen igwa nin katoninongan asin katiwasayan. Makamomondong sabihon, dai pa niato iyan naeksperyensiahan sa satong bilog na buhay. Ano daw sa paghona nindo an kaipuhan niatong gibohon tanganing magin totoo an katoninongan asin katiwasayan? [Pasimbagon.] An Dios igwa nin kapangyarihan na magdara nin katoninongan sa dagang ini, asin nanuga sia na gigibohon nia iyan.” Buksan an retrato sa pahina 98, dangan basahon an Miqueas 4:3, 4. Ialok an libro, asin mag-areglo nin pagdalaw liwat.
6 An satong mga publikasyon minotibar an rinibong tawo na orog na siyasaton an Biblia sa saindang paghanap sa Dios. Pribilehiyo niatong tabangan sinda ngonyan na Enero.