Ipaheling na Nagmamakolog Kamo Paagi sa Paggibo nin mga Pagdalaw Liwat
1 An paghanap nin mga interesado sa harong-harong nagpapaheling kan saindong pagmawot na itao sa iba an oportunidad na madangog an mensahe kan Kahadean. Kaya siertohon na dumalaw liwat sa mga napapasakamotan nindo nin literatura ngonyan na Enero, ta ini an marahay na paagi na ipaheling na kamo nagmamakolog sa iba.
2 Kun nakawalat kamo kan librong “Search for God,” probaran na ipadagos an saindong pag-orolay nin siring kaini:
◼ “Kan nakaagi pinag-olayan niato kun paanong minana sana kan dakol na tawo an saindang relihiyon sa saindang mga magurang. Pero napaghorophorop na daw nindo kun taano ta kadakoldakol kan relihiyon na naghihingakong Kristiano? [Pasimbagon.] An librong iwinalat ko saindo nagtatao nin kompletong paliwanag sa kapitulo 11, poon sa pahina 261. Puwede daw na kuanon nindo an saindong libro asin puwede niatong helingon an pirang parapo?” Ipakipag-olay an enot na tolong parapo asin iareglo na madalaw liwat tanganing ipadagos an pag-adal.
3 Uya an saro pang suhestion na puwedeng probaran nindo:
◼ “Kan nakaagi pinag-olayan niato an nagkapirang midbidan na tanda nin tunay na relihiyon. An saro sa pinakaimportante nasambitan digdi sa Juan 13:34, 35. [Basahon.] Sa paghona daw nindo ipinaheheling sa lambang saro kan gabos na relihiyon an klaseng ini nin pagkamoot? An librong iwinalat ko saindo nagpapaliwanag kan mismong temang ini sa kapitulo 15, digdi sa pahina 344. Boot kong ipaheling saindo an nagkapirang punto na ikinaogma ko sa kapitulong iyan.” Pag-olayan an pirang parapo dangan iareglo an masunod na pag-orolay.
4 Puwede nindong balikan an napasakamotan kan librong “True Peace and Security—How Can You Find It?” paagi sa halipot na pag-atubang na arog kaini:
◼ “An mga namomoon sa kinaban ngonyan dai nakapagtao nin katoninongan asin katiwasayan. Si Jehova Dios an solamenteng makagigibo kaiyan. Ipinaheheling kan Biblia an kaipuhan niatong gibohon. [Pag-olayan an mga punto sa parapo 1 asin 2 sa pahina 175, dangan basahon an Isaias 26:4.] Boot kong ipaheling saindo kun paano an librong ini makakatabang saindo.”
5 An pag-adal puwedeng ponan sa arin man na kapitulo kan librong Search for God, pero sa pankagabsan boot niatong giyahan sinda sa kapitulo 15 asin 16. Dangan, pakatapos nin nagkapirang pag-adal, tibaad boot niatong bumalyo sa librong Mabuhay Sagkod Lamang.
6 Nagtao si Jehova nin sangkap na halimbawa bilang mamomoton na Pastor na nagmamakolog sa saiyang mga karnero. (Ezeq. 34:11-14) An satong sinserong paghihingoa na arogon an saiyang mamomoton na pagmakolog nakakapaogma sa saiya, nagpapaheling kan satuyang pagkamoot, asin nagtatao nin mga bendisyon sa iba.