Dumalaw Liwat Para sa Mabungang Ministeryo
1 Inomaw ni apostol Pablo an mga taga-Filipos huli ta ‘binuhay giraray ninda an saindang pag-isip para sa saiya.’ (Fil. 4:10) Kun iaaplikar niato an saindang halimbawa sa ministeryo sa langtad, ‘bubuhayon giraray’ niato ‘an satong pag-isip’ para sa mga pinatotoohan niato asin mapahihiro kitang dumalaw liwat.
2 Kun nakapasakamot kamo kan brochure na “The Government That Will Bring Paradise,” puede nindong sabihon an arog kaini:
◼ “Naiisip ko an pag-orolay niato kan sarong aldaw. Tibaad nagigirumdoman nindo na napag-olayan niato an manongod sa pamamahala nin Dios sa daga. Sa Biblia, nanuga si Jehova Dios na ini mangyayari. [Basahon an Daniel 2:44.] Nagtutubod daw kamo na talagang puedeng mangyari iyan? [Pasimbagon.] Hinanyoga an sabi nin Dios manongod sa pag-otob nia kan saiyang mga panuga. [Basahon an Isaias 55:11.] Alagad noarin daw ootobon nin Dios an saiyang mga panuga?” Ipaliwanag na sisimbagon nindo an hapot na iyan sa masunod nindong pagdalaw.
3 Puede nindong gamiton an paaging ini kun minadalaw liwat sa tawong nag-ako kan brochure na “Kun Magadan an Sarong Namomotan”:
◼ “Ginibo ko an espesyal na pagmamaigot na bumalik, huli sa satong napag-olayan manongod sa pagkawara nin sarong namomotan sa kagadanan.” Ipaheling an ilustrasyon sa pahina 30 mantang nagsasabi: “Nagigirumdoman nindo an maogmang eksenang ini nin mga tawong binuhay liwat asin nakaibahan giraray kan saindang mga namomotan? Hinapot ko kamo kun saen ini mangyayari, sa langit o sa daga. Puedeng nanompongan nindo an simbag kan Biblia sa pahina 26 kan brochure na ini.” Ipakipag-olay an mayor na mga punto sa ikatolo sagkod sa ikalimang parapo, asin basahon an Juan 5:21, 28, 29.
4 Nakapoon daw kamo nin pag-adal sa “Uya! Ginigibo Kong Bago an Gabos na Bagay?” Sa pagdalaw liwat, puede nindong gibohon ini:
◼ Darahon liwat an atension sa pahina 30, asin itokdo sa hapot na: “Sa anong mga paagi na pambihira an Biblia?” Buksan sa pahina 3 asin 4, asin repasohon an parapo 1-4 pati an ilustrasyon sa tutob. Basahon an saro o duwang sitadong teksto sa nota sa ibaba sa parapo 4. Ipaliwanag na an Biblia iyo an solamenteng libro na nag-aalok nin siring na makangangalas na paglaom. Mag-areglo para sa masunod nindong pagdalaw.
5 Puede nindong ipadagos an pag-orolay sa “The Divine Name That Will Endure Forever” sa paaging ini:
◼ “Kan nakaagi, ipinaheling ko saindo an ngaran nin Dios sa Biblia. An pakaaram asin an paggamit kan ngaran na Jehova importanteng kabtang kan satong pagsamba.” Buksan sa pahina 31, repasohon an mga punto sa huring apat na parapo, asin basahon an Juan 17:3 asin Miqueas 4:5. Ipaliwanag an satong programa sa pag-adal sa Biblia.
6 Kaya, buhayon giraray an saindong pag-isip para sa mga nasompongan nindo. Magin desidido sa pagbalik, asin mag-andam nin sarong kapakipakinabang na bagay na ihihiras. Puede kamong magin saro “na tunay na nagbubunga” sa paggibo nin bagong mga disipulo.—Mat. 13:23.