Hapot
◼ Siisay an puwedeng pabasahon nin mga parapo durante kan Pag-adal sa Libro kan Kongregasyon asin kan Pag-adal sa Torrengbantayan?
An bautisadong mga tugang na lalaki kun igwa. Maninigo sindang pilion gikan sa may kakayahan na mga magurang, ministeryal na lingkod, asin iba pang bautisadong tugang na lalaki sa kongregasyon. An mga iinasignar kaipuhan na may kakayahan na bumasa nin marikas asin diridiretso, na igwa nin tamang entusiasmo, pagdodoon, asin pagliwatliwat kan boses siring kan sinasabi sa Theocratic Ministry School Guidebook, kapitulo 6. (Ikomparar an Nehemias 8:8.) Maninigo man sindang magin arogan sa saindang paggawe.
Mantang mas sadit an pag-adal sa libro, tibaad dai perming igwa nin kuwalipikado, bautisadong tugang na lalaki na puwedeng bumasa. Sa siring na mga kamugtakan, an nangengenot sa pag-adal puwedeng iyo na mismo an bumasa kan mga parapo, o puwede niang hagadon sa sarong kuwalipikado, bautisadong tugang na babae na bumasa. Kun sarong babae an nagbabasa, dai na nia kaipuhan na magkolbong, huling dai man sia naglilingkod bilang paratokdo.
Sa Pag-adal sa Torrengbantayan, posibleng gayo na igwa nin kuwalipikadong mga tugang na lalaki na puwedeng bumasa. An nangengenot sa Pag-adal sa Torrengbantayan maninigong patienot na gumibo nin iskedyul para sa mga parabasa asin ibugtak iyan sa information board. Paninimbagan kan bilog na grupo nin kamagurangan na pilion an mga iaasignar na mabasa sa Pag-adal sa Torrengbantayan. Kun maluyang bumasa an sarong tugang na lalaki, an nangengenot sa Pag-adal sa Torrengbantayan maninigong mag-enot na dumolok sa pagtao nin maboot na sadol asin tabang. Puwedeng rebisaron an lista nin mga parabasa sagkod sa kinakaipuhan tanganing masierto na an kuwalidad nin pagbasa namamantener sa halangkaw na grado. Kun haleon sa lista an sarong tugang na lalaki, maninigo siang impormaran manongod sa dahelan kun taano asin kun anong mga kuwalidad an kaipuhan pa niang paoswagon tanganing makuwalipikar giraray.
Baga man nagbabasa para sa sarong sadit na grupo sa Pag-adal sa Libro kan Kongregasyon o para sa bilog na kongregasyon sa Pag-adal sa Torrengbantayan, an sarong iinasignar maninigong odok na isaboot an saiyang pribilehiyo.—1 Tim. 4:13.