May Naheheling daw Kamong Pangangaipo?
1 Sinasabi na si Jehova sarong Paratabang asin sarong Pailihan. Aram niato na makakadolok kita sa saiya sa panahon nin pangangaipo asin tatabangan nia kita. (Sal. 18:2; 46:1) Maaarog niato an kuwalidad na ini paagi sa pag-alok na tabangan an iba kun may naheheling kitang pangangaipo.
2 Ano an nagmomotibar sa saro na gumibo nin espesyal na paghihingoa na tabangan an iba? Minimidbid ini nin kadaklan na tawo na mamomoton, maheherakon na bagay na dapat gibohon. Sierto nanggad na idinadagka iyan kan Tataramon nin Dios. (Roma 15:1) Dinagka kita ni Pablo na ‘magrisa, bako sanang sa personal na interes sa satong sadiri, kundi siring man sa personal na interes kaidto man na iba.’—Fil. 2:4.
3 Ini sarong bagay na makakanompong kita nin kagayagayahan sa paggibo. (Gibo 20:35) Sinambit ni Pablo si Timoteo bilang saro na “mangangataman nin tunay sa mga bagay mapadapit sa” saiyang mga tugang. (Fil. 2:20) Baga man kita hoben o gurang, igwang mga bagay na magigibo niato kun may naheheling kitang pangangaipo.
4 Namatean na daw nindo na an nagkapira igwang mga pangangaipo na puwedeng tawan nin orog na atension? Tibaad sarong tugang an nasa ospital asin kakadikit na tugang an minasongko; o tibaad an saro nagkadiperensia, pero mayo ni saro na makakatabang sa mga gibohon sa harong. Minamansay ni Jesus an mga naglilingkod ki Jehova bilang mga miembro nin sarong pamilya na tunay na nagmamakolog sa lambang saro.—Mar. 3:33-35.
5 Paano daw Ako Makakatabang? Ano an magigibo tanganing makatao nin tabang kun igwang naheheling na pangangaipo? Puwede daw kitang magboluntaryo na tumabang minsan paano? Tibaad igwang mga gurang na nangangaipo nin pagpapakosog, pero mayo sinda nin dayupot na kairiba na makakatabang sainda. Tibaad igwang mga hobenes na nangangaipo nin tabang. An sarong bagong interesadong pamilya na igwa nin nagkapirang aki tibaad umatender sa Kingdom Hall kun mayo an parahayag na nag-aadal sa sainda. Puwedeng apresyaron ninda kun may saro na tumabang sa pag-asikaso sa mga aki.
6 Mantang nagtatalubo kita sa pagkamoot sa organisasyon ni Jehova, nagtatalubo man kita sa pag-apresyar sa iba sa kongregasyon. Pinakosog kita ni Pablo na humiwas mapadapit kaini. (2 Cor. 6:11-13) Idinoon ni Jesus na an satong pagpaheling nin pagkamoot sa lambang saro pangenot na paagi na ipinaheheling niato na kita tunay na mga parasunod nia.—Juan 13:35.
7 Kaya kun may naheheling kitang pangangaipo, an tunay na pagkamoot sa satong mga tugang asin sa kongregasyon maninigong magmotibar sa sato na magboluntaryo asin tumabang sa ano man na paaging kaya niato. (Gal. 6:9, 10) An pagmakolog na ini para sa iba pinagsasararo kita sa bogkos nin pagkamoot asin pagkasararo.—1 Cor. 10:24.