Sarong Tabang na Tolos na Makukua
1. Paano puedeng lumuya an espirituwalidad nin saro?
1 Para ki Ana, sarong tugang na babae na daing pagtubod an agom asin masakit an iskedyul sa trabaho, depisil na regular na umatender sa Kristianong mga pagtiripon, makikabtang sa ministeryo, asin mag-adal kan Tataramon nin Dios. Minsan ngani namomotan pa nia si Jehova, sia nagin inaktibo. Marahay sana ta sia nag-ako nin espirituwal na tabang hale sa may pagmakolog na kamagurangan.
2. Sa anong paagi mapapatunayan kan gabos na Kristiano na sinda tabang na tolos na makukua?
2 An pag-ako nin espirituwal na tabang na itinatao paagi sa Kristianong kongregasyon nagpapaheling nin pagsarig ki Jehova mismo. Bilang pag-arog sa mamomoton na pagmakolog ni Jesu-Cristo, an kamagurangan na lalaki sa kongregasyon naghahanap nin mga oportunidad na magtao nin pamparigon sa boot asin praktikal na tabang sa mga nakakaeksperyensia nin kadepisilan sa espirituwal. (1 Tes. 5:14) Sa parate, tibaad an kaipuhan sana iyo an maboot na tataramon nin pagparigon sa boot na nakasentro sa nakakapakosog liwat sa boot na mga teksto sa Kasuratan. Interesado an gabos na Kristiano, bako sanang an kamagurangan, na mangenot sa pagsuportar sa mga temporaryong maluya an kamugtakan. Daing duwa-duwa na an lambang saro sa sato nakaeksperyensia kan puersa nin maginirumdom na “tataramon na itinaram sa tamang kapanahonan kaiyan.”—Tal. 25:11; Isa. 35:3, 4.
3, 4. Ano an kalabot sa pagtabang sa iba, asin paano niato iyan puedeng magibo?
3 Kamo an Mangenot: An pagpaheling nin mamomoton na interes sa mga nangangaipo nin tabang naghahagad na kita iyo an mangenot, magpaheling nin pakikipagkapwa, asin magin maigot. Kan maaraman ni Jonatan an makamomondong situwasyon ni David, sia “nagduman ki David sa Hores, tangani na mapakosog nia an saiyang kamot.” (1 Sam. 23:15, 16) Tabangan an iba sa maboot na paagi. An mga tataramon na motibado nin tunay na pagmakolog nagbubunga nin pinakamarahay na mga resulta. Apuera kaini, malinaw na ipinaheling ni Jesus na kalabot an maigot asin determinadong paghihingoa tangani na mabawi an sarong espirituwal na tugang na lalaki o babae. (Luc. 15:4) An pagkaigwa nin odok na pagmawot na matabangan an sarong tawo mapahiro sa sato na magmaigot sa pagtao nin tabang dawa kun dai tolos naheheling an pag-oswag.
4 Kanigoan kanakakaparigon sa boot kun kita an mangengenot na imbitaran an iba, arog baga kan mga nasa satong grupo nin pag-adal sa libro, na ibanan kita sa ministeryo! Mantang tinatabangan niato an sarong kapwa lingkod ni Jehova na makikabtang sa ministeryo, puede niatong gamiton an oportunidad na pakosogon an sarong iyan na gumibo nin orog pa. An siring na magayagayang mga panahon na iribang ginagamit sa paglilingkod ki Jehova nangorognang nakakaparigon sa boot para sa mga nagbabawi kan saindang pagigin timbang sa espirituwal.
5. Sa nagkapirang kamugtakan, anong tabang an puedeng itao kan kamagurangan?
5 Sarong Mamomoton na Probisyon: An mga dai nakikikabtang sa paghuhulit o dai nakikiasosyar sa kongregasyon sa laog nin kadikit na panahon tibaad nangangaipo nin dugang pang tabang tangani na pakosogon an saindang pagtubod. Tibaad an talagang kaipuhan iyo an personal na pag-adal sa Biblia sa sarong publikasyon na arog kan Nagkakasararo sa Pagsamba sa Iyo Sanang Tunay na Dios, Rumani ki Jehova, o Ano Man Nanggad an Itinotokdo kan Biblia? Huling bautisado na an tawong iyan, sa pankagabsan an pag-adal dai kaipuhan na ipagpadagos sa halawig na panahon. An Komite sa Paglilingkod kan Kongregasyon maninigong magin listo na mag-obserbar kun siisay an puedeng makinabang sa probisyon na ini.—Helingon an “Hapot” sa mga isyu kan An Satong Ministeryo sa Kahadean na Nobyembre 1998 asin Nobyembre 2000.
6. Paano nabawi nin sarong tugang na babae an kosog sa espirituwal?
6 Si Ana, na nasambitan kasubago, mapagpasalamat na inako an alok kan kamagurangan na adalan sia sa Biblia nin sarong tugang na babae na maygurang sa espirituwal. Kinaipuhan sana an apat na sesyon sa pag-adal tangani na matabangan sia na rumani giraray ki Jehova. Sia nagpoon liwat na umatender sa mga pagtiripon kan kongregasyon asin nagmawot giraray sia na omawon nin hayagan si Jehova Dios. Tinabangan man sia sa ministeryo kan maygurang na tugang na babae paagi sa pag-iba sa saiya sa iba pang mga inaadalan sa Biblia sagkod na napakosog na siang marhay na maghulit sa harong-harong. An kaipuhan sana nia iyo an maboot na tabang tangani na magpoon giraray sa espirituwal na mga aktibidad!
7. Anong mga pakinabang an resulta kan pagpapakosog sa iba sa espirituwal?
7 An pagpapakosog sa mga nangangaipo nagtatao nin mga bendisyon para sa gabos. An saro na tinatabangan igwa nin kaogmahan na rumani ki Jehova asin magin imbuelto sa mga aktibidad kan Saiyang organisasyon. An kamagurangan naggagayagayang maheling an siring na espirituwal na pag-oswag. (Luc. 15:5, 6) An mga miembro kan kongregasyon nagigin dayupot na may pagkasararo mantang an gabos nagpapaheling nin mamomoton na pagmakolog sa lambang saro. (Col. 3:12-14) Igwa nanggad kita nin marahay na mga dahelan na arogon si Jehova, sarong tabang na tolos na makukua!—Efe. 5:1.