Hapot
◼ Tama daw na konduktahan pa nin pag-adal sa Biblia sa harong an sarong inaktibong tugang na lalaki o babae sa instruksion kan saro sa mga miembro kan Komite sa Paglilingkod kan Kongregasyon?
An kamagurangan may paninimbagan na pastoran an kongregasyon, kabale an siisay man na miembro na nagin inaktibo. Dinadalaw ninda an mga iyan asin dinedeterminaran kun anong personal na tabang an kinakaipuhan. Kun angay, puedeng kaiba digdi an pag-alok sa inaktibo kan pakinabang sa personal na pag-adal sa Biblia. An Organized to Accomplish Our Ministry, pahina 103, nagpapaliwanag na an Komite sa Paglilingkod kan Kongregasyon an madesisyon kun siisay an puedeng makinabang sa siring na probisyon.
An paraataman sa paglilingkod an madeterminar kun siisay an puedeng pinakamarahay na makatatabang, kun anong mga tema an maninigong pag-adalan, asin kun anong publikasyon an pinakamakatatabang. Tibaad nasa marahay na kamugtakan na tumabang an dating nag-adal sa saiya o saro na kamidbid asin iginagalang nia. Puedeng hagadon sa sarong may kakayahan asin maygurang na tugang na babae na tabangan an sarong inaktibong tugang na babae. Sa parate dai na kaipuhan na ibanan nin saro pang parahayag an asignadong magkondukta. Kun inasignaran, an parahayag na nagkokondukta kan pag-adal puedeng ireport an oras, mga pagdalaw liwat, asin pag-adal.—Helingon an Disyembre 1987 An Satong Ministeryo sa Kahadean, pahina 1 asin 3.
Huling bautisado na an inaadalan, sa pankagabsan an pag-adal dai kaipuhan na ipadagos sa halawig na panahon. An pasohan iyo na tabangan an inaktibo na ipagpadagos an pag-atender sa gabos na pagtiripon kan kongregasyon asin magin regular na parahayag kan maogmang bareta. Susubaybayan kan paraataman sa paglilingkod an pag-oswag kan siring na mga pag-adal. An maninigong magin resulta kan mamomoton na tabang na ini iyo na makaya kan mga tugang na lalaki asin babae na ini na isaabaga an saindang sadiring pasan na paninimbagan sa atubangan ni Jehova asin magin marigon na ‘nakagamot asin napapatindog’ sa katotoohan.—Efe. 3:17; Gal. 6:5.