Pagtabang sa mga Inaktibo
1 An saro sa mga parabola ni Jesus manongod sa pagbaya nin sarong pastor sa 99 na karnero tanganing hanapon an saro na nawara. Nagigirumdoman daw nindo an magigin resulta kan pakakua sa saro na nawara? “Asin kun mangyari na makua nia iyan, talagang sinasabi ko saindo, sia naoogma kaiyan nin orog pa kisa siyam na polo may siyam na dai nagkaralagalag..” (Mat. 18:13) An siring na kaogmahan naeeksperyensiahan kun an mga inaktbo minabalik sa aripompon nin Dios.
2 Sa nakaaging pirang taon tinawan nin dagdag na atension an pagtabang sa mga nagin inaktibo. An mga paraataman iyo na mismo an nagsadiring boot na bisitahon an mga inaktibo. (Gibo 20:28) Bilang resulta, dakol an nagkuyog asin nagin giraray aktibong mga parahayag kan Kahadean. Igwa pa daw nin pira sa saindong kongregasyon na nagin inaktibo sa nakakaagi pa sanang mga taon? Ano daw an magigibo tanganing tabangan sinda?
KUN ANO AN MAGIGIBO
3 An paraataman sa paglilingkod asin sekretaryo iyo an nangengenot sa pag-organisar sa mga paghihingoa na atamanon an mga inaktibo. Maninigong iareglo kan kamagurangan na iyo an enot na bumisita. Sa nagkapirang kaso, tibaad apresyaron nin inaktibo kun may makikipag-adal sa saiya sa Biblia. Kun iyo, aaramon kan paraataman sa paglilingkod kun siisay an maninigong iasignar na mangenot sa pag-adal. Tibaad makatabang an dating nakipag-adal sa tawo. Kun bilog na pamilya an kalabot, tibaad puwedeng makipag-adal sa sainda an saro sa kamagurangan o kuwalipikadong ministeryal na lingkod. An tugang na babae na inaktibo tibaad matabangan nin sarong eksperyensiadong tugang na babae. An sarong hoben tibaad mapahiro nin sarong hoben pang ministeryal na lingkod o payunir.
4 Naheling nin pirang kamagurangan na kapakipakinabang na repasohon sa enot na pagsongko an artikulong “Return to the Shepherd of Your Souls” sa Mayo 1, 1982 Watchtower (Nobyembre 1, 1982 sa Tagalog). Sa kaso nin sarong hoben, an artikulong “Bring Your Heart Back to Jehovah” sa Oktubre 1, 1982 Watchtower (Abril 1, 1983 sa Tagalog) tibaad makatabang. Dangan, puwedeng iareglo an regular na pag-adal sa Biblia.
5 An mga parahayag na nangengenot sa siring na mga pag-adal maninigong magpaheling nin personal na interes sa mga tawong ini. Amigohon sinda. Idoon an halaga nin pagbawi sa saindang espirituwal na kosog.
6 Minsan ngani an nagkapirang parahayag pinakikiolayan na tumabang sa mga inaktibo, dai ini nangangahulogan na an iba dai man puwedeng tumabang. An gabos puwedeng mangumusta sa mga tawong ini kun sinda minaatender sa Kingdom Hall asin kaolayon sinda nin nakapagpapakosog. Ipaheling na ikinaoogma niatong makaibanan sinda asin na linalaoman niato na padagos sindang maoswag. An mamomoton na interes na ini maninigong padagos na ipaheling mantang sinda nag-ooswag sa espirituwal. Nakakamtan an positibong mga resulta sa siring na sararong paghihingoa.—Efe. 4:16.
7 Iyo, tunay na ikinaoogma niatong maheling na an dating mga inaktibo nakikiasosyar giraray sa sato. Ipinamimibi niato na bendisyonan logod ni Jehova an satong mga paghihingoa na ‘gumibo nin marahay’ sa mga inaktibo na “may relasyon sa sato sa pagtubod.”—Gal. 6:10.