‘Papagdanayon an Marahay na mga Gibo’ Ngonyan na Disyembre
1 An marahay na mga gibo iyo an mga aktibidad na direktang konektado sa katanosan nin Dios asin sa maogmang bareta nin kaligtasan. Sinadol ni Pablo si Tito na ipagirumdom sa mga tugang “na magin andam para sa gabos na marahay na gibo” asin “danay na gumibo nin marigon na mga kapahayagan, tanganing an mga nagturubod sa Dios danay na isipon an pagpapadanay sa marahay na mga gibo.” (Tito 3:1, 8) Paagi sa pag-enot sa maogmang bareta asin pamumuhay kaoyon sa matanos na mga pamantayan ni Jehova, an mga tugang dai malalagalag.—Mat. 6:33.
2 An hatol ni Pablo aplikado sa sato ngonyan. Mantang kita napalilibotan nin maraot na palakaw nin mga bagay na kayang irayo an satong atension sa paglilingkod ki Jehova, kaipuhan kitang magbantay. Paano daw niato magigibo ini?
AN TABANG NA ITINAO
3 Kaipuhan na aprobetsaran niato an espirituwal na mga probisyon ni Jehova paagi sa Kristianong kongregasyon. (Heb. 13:20, 21) Itinao nia sa sato an saiyang Tataramon, an Biblia, kaiba an kadakol na marahayon na mga pantabang sa pag-adal. An kamagurangan na lalaki sa espirituwal ninombrahan na tumao nin personal na tabang bilang mga pastor kan aripompon. An regular na semanal na mga pagtiripon sa Kingdom Hall asin ta pribadong mga harong, saka an mga asamblea asin kombension, nagtatao nin nakapakokosog na asosasyon asin pagtotokdo.
4 An kombenyenteng mga areglo para sa paglilingkod sa langtad ginigibo paagi sa kongregasyon. An mga areglong arog kaiyan nakatatabang sato na masangkap na maghulit kan “maogmang bareta” asin tumabang sa iba na magin mga kapwa parasamba ki Jehova.—Mat. 24:14; Mat. 28:19, 20.
AKTIBIDAD PARA SA DISYEMBRE
5 An Disyembre magigin masibot na bulan para sa kadaklan sa sato. An dakol maatender sa “Manarig ki Jehova” na Pandistritong Kombension. Rinibo an makikikabtang sa pag-auxiliary payunir. Kita gabos maninigong maghingoa na iwaras an Bible Stories o pulyetong “Look!” saen man puwede.
6 Kun may kaibang bakasyon an saindong aktibidad sa Disyembre, posible na magkakaigwa kamo nin dakol na oportunidad na may makamidbid asin makaolay sa impormal. Magin andam na kaolayon sinda manongod sa paglaom sa Kahadean. Dakol an nakadiskobre na paagi sa pagdara nin babasahon, natabangan sinda na makapoon nin pakikipag-olay na parateng nagbubunga nin marahay na patotoo. Kaya magdara kamo nin mga magasin, pulyeto asin libro sa saindong pagbiyahe.
7 Narisa niamo sa nakaaging mga taon na an Disyembre parateng nagbubunga nin pagbaba kan bilang nin mga parahayag na nagrereport. Halimbawa, kan Nobyembre, 1986, an report niato 91,879 parahayag, mantang kan Disyembre buminaba iyan sa 85,609, labing 6,000 na parahayag an ibinaba! Taano daw? Parate na iyan huli ta an mga parahayag dai nakapagrereport kan saindang ginibo mantang yaon sa kombension. Paano daw niato mareremedyohan an problemang ini ngonyan na taon? Bueno, kun an kombension nindo sa Enero 1-3, 1988, isinusuherir mi na siertohon nindo na itao an saindong report sa kongregasyon bago kamo humale pasiring sa kombension. Dawa an mga maatender sa Disyembre 25-27, tibaad marahay na ireport an saindong nagibo bago kamo humale pasiring sa kombension, nangorogna kun nagpaplano kamong magbakasyon pakatapos kan kombension asin dai tolos mapuli. Maninigo na idoon ini kan kamagurangan, asin siertohon na an gabos may oportunidad na umiba sa paglilingkod sa langtad bago an kombension asin magreport tolos.
8 Paagi sa “danay na dakol an gigibohon sa gibohon kan Kagurangnan,” mapagdadanay niato an marahay na mga gibo sa kaomawan ni Jehova ngonyan na Disyembre.—1 Cor. 15:58.