Padagos na Hingoahon an Teokratikong mga Aktibidad Ngonyan na Mayo
1 An Mayo nagtatao nin mga oportunidad na makikabtang sa manlaenlaen na aktibidad. Dakol an gustong aprobetsaran an bakasyon sa eskuwelahan asin marahay na kamugtakan nin panahon paagi sa mga pagpaharohayahay. Alagad kaipuhan kitang magmaan tumang sa pagtogot na maolang an satong teokratikong rutina.—Fil. 3:16.
2 Kun magkakaigwa kamo nin bakanteng panahon, siring baga kan bakasyon sa eskuwelahan, napag-isip-isip na daw nindo an dapit sa pag-aabot para sa mas dakulang pakikikabtang sa ministeryo? Dakol an nanompongan ini na sarong marahay na panahon sa pagpalista bilang auxiliary payunir. Parateng nagbukas ini kan pinto pasiring sa mas dakulang mga pribilehiyo bilang regular payunir. Puwedeng makaeksperyensia an mga pamilya nin tunay na kagayagayahan sa paggamit sa bilog na mga aldaw na iribanan sa ministeryo. Mantang mas dakol an oras na maliwanag pa, dakol pa an maninigong makahimo na anihon an mga pakinabang sa pakikikabtang sa pagpatotoo sa banggi.
3 Kumusta man an pagtabang sa kongregasyon na nagkakaipo nin tabang sa pagkobre sa teritoryo kaiyan? Tibaad an iba sa saindong kongregasyon boot na umiba sa saindo sa paglilingkod sa laog nin saro o duwang semana kun saen mas dakula an pangangaipo. Kun sadit an saindong grupo, tibaad an mga parahayag sa kataed na kongregasyon boot na umiba sa saindo. Kun may limitasyon kamo sa kun gurano kamo karayo na makakabiyahe, puwedeng makarekomendar an paraataman sa sirkito nin haraning kongregasyon na pahahalagahan an saindong tabang.
4 Nagpaplano daw kamong magbakasyon na harayo sa harong? Kun iyo, naggigibo daw kamo nin mga plano na umatender sa mga pagtiripon kun saen kamo masongko? Kumusta man an pag-iba sa mga tugang duman sa paglilingkod sa langtad? An pag-iba kaini sa saindong bakasyon puwedeng magin kapakipakinabang na gayo sa saindo asin sa iba. (Roma 1:11, 12) Siring man, makakagibo daw kamo nin impormal na pagpatotoo mantang kamo nagbibiyahe? Siertohon na darahon an saindong Biblia asin suplay nin literatura. Gamiton an iba sa saindong bakanteng panahon sa pagbasabasa asin pag-adal sa Biblia. Girumdomon na dawa paminsanminsan nagkakaipo kita nin bakasyon sa sekular na mga gibohon, habo niatong magbakasyon sa paglilingkod ki Jehova.
5 Maninigong magin alisto an mga magurang na papagdanayon na organisadong marhay an mga aktibidad sa kongregasyon. Kun may mahaleng mga magurang asin ministeryal na lingkod, maninigong gibohon an mga areglo tanganing an iba an mag-asikaso kan saindang mga paninimbagan. An pagpapadanay na naimpormaran nin patienot an nangengenot na paraataman manongod sa mga petsa na mahale an mga tugang na ini makakatabang saiya sa paggibo nin angay na mga pagliliwat.
6 Iyo, an panahon nin bakasyon puwedeng magin sarong sibot-sibot na panahon. Pero an nakalilingling na mga bagay puwedeng madaling makaistorbo sa saindong marahay na rutina nin paglilingkod sa Kahadean. Pakinabangan nin marhay an saindong bakanteng panahon ngonyan na bulan. Determinaran kun ano an mas mahalagang mga bagay asin enoton an mga iyan sa saindong iskedyul.—Fil. 1:10.