Pag-aatubang kan Maogmang Bareta—Kun Nagbabakasyon
1 Magbabakasyon daw kamo sa tig-initan na ini? Kun iyo, ano an gigibohon nindo? An dakol inaasikaso an mga bagay-bagay sa harong. An iba nagsosongko sa mga katood asin paryentes. An panahon nin bakasyon nagtatao man nin oportunidad na magkaigwa nin mas lubos na pakikikabtang sa paghuhulit kan Kahadean.—Mar. 6:30-34.
OROG NA PAGLILINGKOD SA LANGTAD
2 Sa panahon nin bakasyon, puwede kitang orog na makikabtang sa paghuhulit kan maogmang bareta kan Kahadean. May listahan daw kamo nin mga interesado na nahaloyhaloy nang dai nadalaw? Makagigibo daw kamo nin mas dakol na pagdalaw liwat asin tibaad makapoon nin pag-adal? Nagpaplano daw kamong mag-auxiliary payunir sa saindong bakasyon? Kun iyo, aagdahon daw nindo an ibang parahayag na umiba sa saindo? Ini gabos oportunidad na ipaheling na talagang may pagmakolog kita sa ibang tawo asin dugangan an satong pakikikabtang sa ministeryo.
IMPORMAL NA PAGPATOTOO
3 Mantang nagbibiyahe o nagrerelaks, parate na kita may marahay na mga oportunidad para sa impormal na pagpatotoo. Ini daw kabtang nin paglilingkod na dian puwedeng dugangan an saindong pakikikabtang ngonyan na tig-initan? (Juan 4:7-9, 23) An mga mapanggana sa gibohon na ini nagsasabi na pinakamarahay na magin makikatood asin odok na interesado sa iba. Siring man, marahay na patienot na isipon an saindong sasabihon tanganing magin orog na epektibo.
4 Sa pagbiyahe, dakol na tugang an nakikipag-olay sa iba. Dangan sa panahon kan orolay sinda naghahapot sana, “Apisyonado kamong magbasa?” Kun an simbag iyo, sinda nagpapadagos: “May nabasa akong kawiliwili sa magasin na ini. [Ipaheling an tema asin komentohan iyan.] Tapos ko nang basahon iyan. Kun gusto nindong basahon, saindo na iyan.” Ini magigibo sa daan na mga isyu kan magasin. An iba tibaad magusto man na magdonar para sa bagong mga isyu kun iaalok nin arog kaini. An mga nagsasayuma parateng nag-aako nin tract bilang regalo.
5 An iba nagpapamidbid na mga Saksi ni Jehova asin naghahapot, “Ano an saboot nindo manongod sa Biblia asin sa itinotokdo kaiyan?” Ini parateng nagbubukas kan dalan para sa marahay na orolay. Kun kamo perming may darang tract, magasin, o presenteng alok, makakanompong kamo nin mga oportunidad na ialok iyan sa iba.
PAGPATOTOO SA MGA PARYENTES
6 Parate na aram kan satong mga paryentes na kita mga Saksi ni Jehova. Tibaad gusto nindang maaraman an satong mga tinutubod pero nag-aalangan na maghapot ta habo nindang ‘sermonan’ o mapasubo sa halawig na orolay. An ibang tugang saro sanang kapahayagan an sinasabi manongod sa katotoohan dangan pinababayaan an paryente na magdesisyon kun gusto niang ipagpadagos an orolay. Halimbawa, puwede nindong sambiton kun saen kamo nag-atender kan kombension o ipaheling an saro sa bagong mga publikasyon kan Sosyedad. O magkomento sa mga kamugtakan sa kinaban, mahal na barakalon o problema sa pamilya, na tibaad magbukas kan dalan para sa orolay. An mga hobenes parateng hinihinanyog nin mga paryentes.
7 Mantang kita maigot sa paghuhulit asin naghihingoang makataram nin kadikit sa tamang panahon, kaipuhan kitang perming mapagmansay asin makonsiderasyon sa iba. Girumdoma an halaga nin pagigin makikatood asin pagpaheling nin tunay na interes sa iba.—Tal. 15:23; 1 Ped. 3:15.
8 An bakasyon asin tig-initan madaling umabot asin lumihis. Para sa banwaan ni Jehova, parateng kaiba sa pinakadai malilingawan na mga oras an maogmang mga eksperyensia na bunga kan oras na ginamit sa pagpatotoo sa Kahadean. Magsadiring boot na isabi sa iba an manongod sa satong mamomoton na Dios asin sa saiyang Kahadean. Mantang ginigibo nindo iyan, maglaom na bebendisyonan ni Jehova an saindong mga paghihingoa.