Epektibong mga Introduksion
1 Kun nakikikabtang sa ministeryo, napapaatubang kita sa hapot na, “Ano daw an enot kong sasabihon?” An eksperyensiadong mga parahayag nagtatao nin pirang nakatatabang na mga suhestion. Ano an nagkapira sa mga ini?
2 Enot, mahalaga na kita odok na interesado sa mga kaolay niato. Ini ipinaheheling kapwa sa tataramon asin hiro. Mahalaga na konsideraron an punto-de-vista kan kagharong. Hinanyogon an saiyang simbag sa saindong mga hapot. Ipaliwanag kun paano sia personal na makikinabang.
KONSIDERARON AN SAINDANG PUNTO-DE-VISTA
3 Kan si Jesus magpatotoo sa sarong Samaritana, an iba sa saiyang mga isinabi garo baga pambihira sa pagdangog kan Samaritana. Si Jesus maingat na naghinanyog, asin sa pagsimbag, kinonsiderar nia an isinabi kan Samaritana. Boot niang tabangan an Samaritana. (Juan 4:13, 14, 19-26) Hinihingoa daw niatong arogon an halimbawa ni Jesus sa bagay na ini?
4 Kun an simbag nin mga tawo sa saindong introduksion, “May relihiyon na ako,” ano daw an magigibo nindo? Nakonsiderar na daw nindo an impormasyon sa pahina 18-19 kan librong Reasoning? Sa mga lugar na ginagamit nin dakol an pagtumang na ini, tibaad marisa nindo na kapakipakinabang na antisiparon an saindang komento asin enotan na nindong palatawon an tema. Halimbawa, puwede nindong sabihon, “May sadiri na po kamong relihiyon? [Hinanyogon an saindang simbag.] Iyan an paghona ko ta an kadaklan na tawo sa lugar na ini igwa na. Minsan siring, an dahelan kan sakong pagsongko ngonyan na aga . . . ” Dangan ipagpadagos an temang gusto nindong ipakipag-olay.
5 Kun an dakol na kagharong nagsasabi, “Sibot ako,” puwede kamong pumili nin saro o labi pang ideya sa pahina 19-20 kan librong Reasoning asin iangay iyan sa saindong teritoryo. An laen-laen na mga tataramon magagamit bilang pag-antisipar sa mga pagtumang na parateng nadadangog.
PAGGAMIT NIN MGA INTRODUKSION HALE SA LIBRONG REASONING
6 Maririsa nindo na an mga introduksion sa pahina 9-15 kan librong Reasoning manongod sa mga tema na parateng iniisip nin mga tawo, arog baga nin presenteng mga pangyayari, personal na kaligtasan, trabaho, istaran, buhay pampamilya, asin ngapit. Minsan siring, mangnohon man na inaagda kaiyan an kagharong na ipahayag an nasa saiyang boot. Iyan nagtatabang saiya na masabotan na an tema mahalaga asin personal na nakakaapektar sa saiya.
7 Pag-adalan na gamiton an mga introduksion sa librong Reasoning. Makinabang sa eksperyensia nin ibang parahayag. Arangon an bendisyon ni Jehova sa saindong mga paghihingoa. Sa paggibo kaini, tibaad mas dakol sa saindong teritoryo an maghinanyog sa maogmang bareta.