Mga Introduksion na Makapupukaw nin Interes
1 Ekspertong marhay si Jesus sa saiyang paggamit nin mga introduksion. Baga man nakikipag-olay sa dakulang grupo o sa sarong indibiduwal, nakua ni Jesus an atension kan saiyang mga paradangog paagi sa personal na paglabot sainda. Ipinaheling nia sainda an halaga kan saiyang tema.—Mat. 5:3-12; Juan 4:7-30.
2 Kaipuhan an Patienot na Pag-andam: Tanganing mapukaw an interes, an satong introduksion kaipuhan na ilabot an indibiduwal, ikonektar sa saiyang mga pinaghahaditan, asin ipaheling na an mensahe kan Kahadean personalmenteng makatatabang saiya.
3 Sa pag-andam para sa paglilingkod, repasohon an mga pinaghahaditan nin mga tawo sa komunidad. Ano an makaiinteres sa sarong hoben? Sa sarong gurang? Sa mga agom na lalaki, agom na babae, o mga magurang? Imbes na maggamit nin pararehong introduksion sa kada pinto, mag-andam nin nagkapirang introduksion asin magin andam na liwaton an mga iyan mientras na inoobserbaran nindo an simbag kan mga kagharong. An iba sa mga parahayag nagkaigwa nin marahay na kapangganahan paagi sa paggamit kan laen-laen na introduksion sa librong Reasoning sa kada pagluwas ninda sa ministeryo sa harong-harong.—rs p. 9-15.
4 Sa bulan nin Setyembre, tibaad boot nindong gamiton an pag-aatubang na arog kaini:
◼ “Marahay na aldaw. Hinahapot mi an nagkapira sa saindong mga kataed kun anong mga kuwalidad an boot nindang maheling sa tawo na namamahala sa iba. Puwede daw akong maghapot kan mga kuwalidad na iniisip nindong pinakaimportante? [Pasimbagon. Umoyon kun tama.] Aram daw nindo na sinasabi kan Biblia an mga kuwalipikasyon kan Saro na mamamahala sa katawohan? Yaon iyan digdi sa Isaias 9:6, 7. [Basahon.] Ano sa paghona nindo an magigin buhay sa irarom kan siring na poon?” Pasimbagon dangan darahon an atension sa Salmo 146:3, 4 asin sa materyal na nasa librong Reasoning sa pahina 153-4 manongod sa pamamahala ni Jesus. O puwedeng gamiton an brochure na Government sa pahina 19 asin 20 tanganing pukawon pa an dugang na pag-orolay.
5 Kun kamo nakikipag-olay sa mga igwa nin pamilya, an minasunod na pag-aatubang tibaad epektibo kun itinatampok an brochure na Enjoy Life.
Pakataratara sa lokal, puwede nindong sabihon:
◼ “Naobserbaran daw nindo na an pan-aroaldaw na mga kagipitan nag-aatubang nin tunay na angat sa mga pamilya ngonyan? [Pasimbagon.] Igwa daw kamong ideya kun saen makadodolok an mga pamilya para sa marahay na hatol? [Pasimbagon.] Mangnoha an sinabi kan Kagpundar kan pag-aragoman sa enot na mag-agom.” Basahon an Genesis 1:28 dangan helingon an mga punto 55, 56, 68, asin 69 sa brochure na Enjoy Life asin ipadagos an saindong pag-orolay.
6 Paagi sa pag-arog sa mga paagi ni Jesus na pagkua nin interes asin paglabot sa mga nagdadangog sa mga pag-orolay, ipinaheheling niato sa mga sadiosan an halaga kan espirituwal na mga bagay.