Epektibong Pag-introdusir kan Librong Mabuhay Sagkod Lamang
1 Eksperto si Jesus sa saiyang paggamit nin mga introduksion. Sa sarong okasyon pinonan nia an pakipag-olay sa sarong Samaritana paagi sa paghagad sana sa saiya nin tubig na inomon. Tolos na naakit kaini an saiyang atension huli ta “an mga Judio dai nakikilabot sa mga Samaritano.” (Juan 4:7-9) Makakanood kita sa saiyang halimbawa.
2 Kun nag-aandam sa pag-alok kan librong Mabuhay Sagkod Lamang, hapoton an sadiri, ‘Ano an makakaakit sa sarong tin-edyer, gurang, agom na lalaki, o agom na babae?’ Puwede kamong mag-andam nin labi sa sarong introduksion asin gamiton an saro na malinaw na pinakaangay sa situwasyon.
3 Huling an pagruro kan buhay pampamilya ikinahahadit nin dakol, puwede kamong magsabi:
◼ “An aroaldaw na mga pangigipit sa buhay nagtao nin grabeng tension sa mga pamilya ngonyan. Saen daw sinda makakakua nin tabang? [Pasimbagon.] An Biblia tunay na tabang sa sato. [Basahon an 2 Timoteo 3:16, 17.] Mangnoha an parapo 3 sa pahina 238 kan publikasyon na ini, Puwede Kamong Mabuhay Sagkod Lamang sa Paraiso Digdi sa Daga.” Basahon an parapo 3, asin ialok an libro.
4 Kun ginagamit nindo an sarong lokal na bareta, puwede nindong sabihon:
◼ “Nadangog daw nindo an bareta manongod sa [sambiton an saro na ikinahahadit sa lokal]? Ano an paghona nindo dapit kaiyan? [Pasimbagon.] Pinahohorophorop kamo kaiyan kun saen na paduman an kinaban na ini, bako daw? Ihinula kan Biblia an siring na mga bagay bilang ebidensia na nabubuhay na kita sa huring mga aldaw.” Dangan pag-olayan an impormasyon sa librong Mabuhay Sagkod Lamang, pahina 150-3.
5 Dakol an nahahadit manongod sa nagdadakol na problema sa krimen. Puwede nindong gamiton an enot na introduksion sa irarom kan temang “Crime/Safety” sa pahina 10 kan librong “Reasoning”:
◼ “Nakikipag-olay kami sa mga tawo manongod sa personal na kaligtasan. Kadakoldakol kan krimen sa palibot niato, asin iyan nakakaapektar sa satong buhay. Ano sa paghona nindo an dapat gibohon tanganing an mga tawo makamateng ligtas sa mga kalye sa banggi?” Basahon an Salmo 37:10, 11 asin ipaliwanag an mga bendisyon kan Kahadean nin Dios, na ginagamit an pahina 156-8 kan librong Mabuhay Sagkod Lamang.
6 Kun gusto nindo nin mas simpleng pag-atubang, puwede nindong gamiton an introduksion na kapareho kan makukua sa pahina 11 kan librong “Reasoning,” sa irarom kan temang “Future/Security”:
◼ “Dinadagka mi an satong mga kataed na horophoropon an makangangalas na ngapit na iinoopresir sa sato kan Biblia. [Basahon an Kapahayagan 21:3, 4.] Ini daw marahay para sa saindo? [Pasimbagon.] An kapitulo 19 kaining libro nagtatampok kan mga bendisyon na maeeksperyensiahan nin katawohan sa pamamahala kan Kahadean nin Dios.” Ialok an libro.
7 An pag-andam nin epektibong mga introduksion makakatabang saindo na aboton an mga nagugutom sa katotoohan asin katanosan.—Mat. 5:6.