Ginagamit Daw Nindo an Maninigong Introduksion?
1 Kun an kagharong minabukas nin pinto, napapaatubang kita sa angat na iatubang an mensahe nin Kahadean sa sarong maninigong paagi. Sa laog kan masunod na sampulong segundo, an kagharong parateng nagdedesisyon kun baga maghihinanyog o pahahaleon an Saksi. Aram niatong an impormasyon na satong dinadara importante nanggad, asin talagang boot niatong tabangan an makakaolay niato. (Rom. 10:14) Alagad magigibo ta sana ini kun an satong introduksion makakapukaw sa atension kan tawo.—Col. 4:6; ikomparar an Talinhaga 25:11.
2 Manongod sa pagigin angay kan satong introduksion, hapoton an satong sadiri ta tibaad natood kita sa paggamit nin parehong introduksion na paoro-otro huli ta pasil iyan girumdumon o pasil gamiton. Igwa daw nin mga ekspresyon sa satong introduksion na tibaad magin dahelan nin pagkanegatibo sa nagkapira niatong teritoryo? Iyan daw espesipiko tanganing makapukaw nin interes sa pagpoon pa sana, o iyan daw nagtataong lugar sa kagharong na potolon an orolay antes kita makaabot sa satong tema? Paano ta mapupukaw an interes kan kagharong nin amay pa sa orolay? An epektibong mga introduksion dai basta nangyayari. Iyan nangangaipo nin pihadong pag-andam asin regular na pag-ensayo.
PAGPILI KAN TAMANG INTRODUKSION
3 Magpoon sa pahina 9 kan librong Reasoning, igwa nin ekselenteng seksion sa “Introductions for Use in the Field Ministry.” Makakatabang an pagrepaso kan pambukas na mga tataramon sa seksion na ini. Pinagigirumdom kita na an iba-ibang paagi kaipuhan para sa manlaenlaen na teritoryo, mga tawo, asin mga kamugtakan.
4 Mantang iniintrodusir nindo an mensahe nin Kahadean, ikakapaheling daw nindo kun paano iyan personal na mapakikinabangan kan kagharong? Bilang halimbawa, helingon an enot na introduksion sa irarom kan “Crime/Safety” sa pahina 10 kan librong Reasoning (p. 11 sa Tagalog). Sa enot na kabtang, sarong tema na mahalagang gayo sa kagharong an binukasan. An orolay na suminonod nagpapaheling kan kabtang kan Kahadean sa paghale nin krimen.
5 Paano niato mahahale an mga olang sa interes kan kagharong na maghinanyog? An mga tema sa pahina 14 asin 15 sa librong Reasoning nagtatao nin ekselenteng mga suhestion. Halimbawa, isipon kun paano nindo magagamit an introduksion sa irarom kan “When Many People Say: ‘I Have My Own Religion.’” Magagamit daw nindo an paaging ini sa saindong teritoryo?
6 Paano nindo ikakapaheling an tunay na interes sa kagharong? (Marcos 6:34) Makakatabang an makikatood na huyom. An pagkamakikatood nagpaparani sa iba. Ikakapeheling man an satong interes paagi sa pagdagka saiya na magtao nin sadiring komento. An halimbawa kaini maheheling sa ikaduwang introduksion sa irarom na “Kingdom” sa pahina 12 (p. 11 sa Tagalog). Ginamit na daw nindo ini? Parateng gusto nin mga tawo na magtao kan saindang opinyon, asin nagigin interesado sinda sa saindong ihahapot. Alagad dapat kitang maghinanyog sa simbag ninda dangan ibagay an satong presentasyon tanganing gamiton an naaraman niato sa saindang mga pananaw.
PAGIGIN ALISTO SA MGA KAMUGTAKAN
7 Kun yaon na kamo sa pinto, obserbaran an palibot. Igwa daw nin mga kawatan sa lagwerta, bado sa sampayan, relihiyosong mga gamit sa puertahan, abpa.? Kun an kagharong nagbukas kan pinto, kita daw sinasabat nin lalaki o babae, sarong hoben o maedad na, sarong ina, sarong ama, o sarong aki? Arin man sa mga bagay na ini makakatabang sato na pumili nin angay na introduksion na ibabagay sa pangangaipo kan tawo na satong nasumpongan.
8 An mga introduksion sa librong Reasoning gabos naprobaran na asin nadiskubreng mapanggana. Taano ta dai maghingoa na gamiton iyan sa saindong teritoryo? Siguradong maheheling nindo na sa pagkaigwa nin marahay na pag-andam an saindong mga introduksion magigin orog kaepektibo asin magigin orog na mapanggana an saindong ministeryo.—Mat. 13:18-23.