Kultibaron an Interes na Nanompongan Nindo
1 Kun naghaharongharong, limitado sana an panahon niato na magagamit sa interesadong tawo. An tunay na gibohon na pagtotokdo nagigibo kun kita nagdadalaw liwat asin nagkokondukta nin mga pag-adal sa Biblia. (Mat. 28:19, 20) Tanganing epektibong makapagtokdo kun kita minadalaw liwat, kaipuhan niatong repasohon an pinag-olayan niato kan enot na pagsongko dangan ipaliwanag pa iyan.
2 Kun nag-olay kamo dapit sa pagkadaing karigonan kan areglo nin pamilya, puwede nindong gamiton an kapitulo 29 kan librong “Mabuhay Sagkod Lamang.” Puwede kamong magsabi:
◼ “Kan nakaagi napag-olayan niato an manongod sa kadonongan nin pagsunod sa sadol kan Biblia tanganing magkaigwa nin maogmang pamilya. Ano sa paghona nindo an liyabe sa pagkasararo nin mga pamilya ngonyan?” Pasimbagon. Buksan an parapo 27 sa pahina 247, asin basahon an Colosas 3:12-14. Ipaliwanag kun paano an regular na pag-adal sa librong Mabuhay Sagkod Lamang makakatabang na maresolberan an mga problema.
3 Kun pinag-olayan nindo kan enot nindong pagdalaw an nagrururong mga kamugtakan sa kinaban, puwede nindong sabihon:
◼ “Ipinaheheling kan Biblia na si Satanas an pinakacausa kan presenteng mga kamugtakan sa kinaban. Dakol an naghohorophorop kun taano ta tinogotan sia nin Dios na magpadagos sa haloy na panahon. Ano sa paghona nindo?” Pasimbagon. Buksan sa pahina 20, parapo 14 asin 15, kan librong Mabuhay Sagkod Lamang, asin ipaliwanag kun taano si Satanas ta dai pa linalaglag. Dangan basahon an Roma 16:20.
4 Kun napag-olayan nindo an manongod sa mga bendisyon sa irarom kan pamamahala nin Kahadean, sa saindong pagdalaw liwat puwede kamong magsabi:
◼ “An makangangalas na mga bendisyon na dadarahon kan Kahadean nin Dios digdi sa daga asin katawohan iiniilustrar digdi sa pahina 12 asin 13. Ano an naheheling nindong nakakaakit saindo? [Pasimbagon.] Isipon kun ano an magigin kamugtakan nin buhay sa sarong kinaban na arog kaini.” Basahon an parapo 12. Kun igwa nin interes, ihapot an hapot sa parapo 13, asin pag-olayan an simbag. Iareglo na ipagpadagos an pag-orolay sa masunod nindong pagdalaw.
5 Puwede kamong makapoon nin pag-adal paagi sa pagsabing:
◼ “Dakol na tawo an nanompongan an mga simbag sa saindang mga hapot sa Biblia paagi sa paggamit kan librong ini.” Buksan sa mga laog, asin hapoton: “Arin na tema digdi an pinakainteresante para sa saindo?” Pasimbagon, buksan sa kapitulo na nakaakit kan saindang interes, asin basahon an enot na parapo. Ipaliwanag an paagi nin pag-adal asin iilustrar paagi sa pag-orolay sa saro o duwang parapo. Gumibo nin mga areglo sa pagsongko giraray.
6 An pagkultibar nin interes sa librong Mabuhay Sagkod Lamang nagpapaheling kan satong pagmawot na lubos na otobon an satong ministeryo. (2 Tim. 4:5) Sa paggibo nin siring, puwede niatong matabangan an mga paradangog sato na maghingoang kamtan an buhay na daing katapusan.—Juan 17:3.